ފަތުރުވެރިކަމަށް ދޫކޮށްފައިވާ ބިމުގެ އަގު އަންނަ އަހަރު ދަށަށް ދާނެކަމަށް ބެލެވޭ: މިނިސްޓަރ
ރާއްޖޭގައި ފަތުރުވެރިކަމަށް ދޫކޮށްފައިވާ ބިންތަކުގެ އަގު އަންނަ އަހަރު ދަށަށް ދިއުމުގެ ފުރުޞަތު އެބައޮތްކަމަށް ޓުއަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ ވިދާޅުވީ ކުރިއަށް އޮތްތަނުގައި ރާއްޖޭގެ ރަށްތައް ވިއްކައިގެން ފައިދާ ހޯދުމުގެ ފުރުސަތު ކުޑަވާނެކަމަށް ދެކެވަޑައި ގަންނަވާ ކަމަށެވެ.
ޓީވީ ޕްރޮގްރާމެއްގައި ވާހަކަފުޅުދައްކަވަމުން ޓުއަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވީ މި އަހަރަށް ވުރެ އަންނަ އަހަރު ފަތުރުވެރިކަމަށް ދޫކޮށްފައިވާ ބިންތަކުގެ އަގު ދަށަށް ދިއުމުގެ ފުރުސަތު އެބައޮތްކަމަށެވެ. އަދި ފަތުރުވެރިކަމަށް ދޫކޮށްފައިވާ ރަށްތަކުގެ ތެރެއިން ނުހަދާ އޮތް 85 ރަށް ހިފައްޓައިގެން ތިބި ބަޔަކު އެ ރަށްތަކުން ފައިދާ ހޯދުމުގެ ފުރުޞަތުވެސް ކުޑަވާނެކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސަރުކާރުގެ އަމާޒަކީ މި އަހަރަކީ އިންވެސްޓްމަންޓުގެ އަހަރަކަށް ހަދައި ރާއްޖެއަށް އިންވެސްޓްމަންޓުތަކެއް ގެނައުން ކަމަށެވެ. އަދި ޓޫރިޒަމް ޤާނޫނަށް ސަރުކާރުން ގެނެސްފައިވާ އިސްލާހުތަކާއެކު ރާއްޖެ އަންނަ އިންވެސްޓްމަންޓުގެ އަދަދު އިތުރު ވެގެން ދާނެކަމަށް މިނިސްޓަރ ވިދާޅުވިއެވެ. މީގެ އިތުރުން އިންވެސްޓްމަންޓްގެ އަހަރުގައި އެންމެ އިސްކަމެއް ދެއްވާނީ ޓޫރިޒަމް ސިނާއަތުގެ ވެރިންނަކީ ދިވެހިންނަށްވުމުގެ ފުރުސަތު ފަހިކޮށް ދިނުމަށް ކަމަށްވެސް ޓުއަރިޒަމް މިނިސްޓަރ ވިދާޅުވިއެވެ.
"މި ރަށްތަކުގެ ލޭންޑް ވެލިއު މާބޮޑަށް މައްޗަށް ދާނެ ކަމަށް ހިފަހައްޓައިގެން ތިއްބަވާނެ ކަމެއް ނެތް. ވިޔަފާރި ކޮށްގެން މީގެ ފައިދާ ނަގަން ވިސްނަންވީ. ރަނގަޅު ރިސޯޓުތައް ހަދަންވީ. އިންވެސްޓްމަންޓަކީ ގައުމެއްގެ އިންޑަސްޓްރީއެއް ކުރިއަރުވާލަން އެންމެ މުހިންމު ކަންތައް. މި ބަލަނީ ވީހާ ވެސް ގިނަ ދިވެހިންނަށް ޓޫރިޒަމްގެ އޯނާޝިޕް ލިބޭތޯ. އެހެން ނަމަވެސް އެނގިވަޑައިގަންނަވާނެ ރާއްޖޭގައި އިންވެސްޓްމަންޓް ބޭންކް ތަކެއް ނެތް. އެކަމަކު ދިވެހިންނަށް އޯނާޝިޕް ލިބޭނެ އެކިއެކި ފޯމިއުލާ އެބަހުރި" ޓުއަރިޒަމް މިނިސްޓަރ ޑރ.އަބްދުﷲ މައުސޫމް ވިދާޅުވިއެވެ.
ފަތުރުވެރިކަމަށް ދޫކޮށްފައިވާ ބިންތަކުގެ ތެރެއިން މިހާތަނަށް 85 ތަނެއް ނުހެދިވާކަމަށާއި އޭގެ ތެރޭގައި 61 ރަށާއި 24 ފަޅު ހިމެނޭކަމަށް މިނިސްޓަރ ވިދާޅުވިއެވެ. މިނިސްޓަރ ވިދާޅުވީ ޓޫރިޒަމް ޤާނޫނަށް ގެނެސްފައިވާ އިސްލާހާއެކު ރަށްތައް ނަގާފައިވާ ފަރާތްތަކަށް ރިސޯޓް ތަރައްޤީކުރުމަށް ލިބޭނީ ވަކި މުއްދަތެއް ކަމަށެވެ.
މިނިސްޓަރ ވަނީ މިހާރު ކުއްޔަށް ދޫކުރަން ނިންމާފައިވާ 28 ރަށް ވަކި ތާވަލެއްގެ ދަށުން ޚިދުމަތަށް ނެރުމުގެ މަސައްކަތް ކުރައްވާނެކަަން ފާހަގަކުރައްވާފައެވެ.
ދުބާއީގައި މި އަހަރު އޮންނަ "ވޯލްޑް އެކްސްޕޯ 2020" ގައި އިންވެސްޓް ކުރަން ތިބި މީހުންނާއި އެއްކޮށް ނެޓްވޯކެއް ގާއިމް ކުރައްވާނެކަން ފާހަގަކޮށް މިނިސްޓަރ ވިދާޅުވީ ރަށްރަށުގައި ކުދި ހޮޓާ ހަދަން ތިބި މީހުންނަށް ވެސް އިންވެސްޓަރުންނާއެކު ނެޓްވޯކް ހަދައި ދޭނެކަމަށެވެ.