ތަފާތު ކުށްކުށުގައި ޖަލުތަކުގައި ބަންދުކޮށްފައިތިބި މީހުން ވަކިން ގެންގުޅެފިނަމަ ޖަލުތަކުގެ ތެރޭގައި ހަރުކަށި ފިކުރު ފެތުރުން ހުއްޓުވުމަށް ވަރަށްބޮޑު ހައްލެއް ލިބިގެންދާނެކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މާފުށި ޖަލުގައި މިއަދު "ސްޕެޝަލް މެނޭޖްމަންޓް ޔުނިޓް" ހުޅުއްވައިދެއްވުމަށްފަހު ވާހަކަފުޅުދައްކަވަމުންނެވެ.
"ސްޕެޝަލް މެނޭޖްމަންޓް ޔުނިޓް"އަކީ ޖަލުތަކުގައި ތިބި ހަރުކަށި ފިކުރުގެ މީހުން ދެނެގަނެ އެމީހުން ރިހިބިލިޓޭޓްކޮށް، ފަރުވާ ދިނުމަށް ޚާއްޞަ ޔުނިޓެކެވެ. 50 ގޮޅި ހިމެނޭ ޔުނިޓް ހުޅުއްވައިދެއްވުމަށްފަހު ދެއްކެވި ވާހަކަފުޅުގައި މިނިސްޓަރ ވިދާޅުވީ މިމަސައްކަތުގެ ސަބަބުން ޖަލުތަކުގެ ތެރޭގައި ހަރުކަށި ފިކުރު ފެތުރުން ހުއްޓުވުމަށް ވަރަށްބޮޑު ހައްލެއް ލިބޭނެކަމަށެވެ. އަދިވެސް ޖަލުގައި ތަފާތު ކުށްތަކުގައި ބަންދުކޮށްފައި ތިބި މީހުން ވަކިން ގެންގުޅެން އިސްކަންދީ މަސައްކަތްކުރައްވާނެކަމަށް ވިދާޅުވިއެވެ.
އެއީ ކުށްވެރިން ރިހިބިލިޓޭޓްކުރަންވެސް އެޅޭ މުހިއްމު ފިޔަވަޅެއްކަން ފާހަގަކުރައްވައި މިނިސްޓަރ ވިދާޅުވީ، ތަފާތު ކުށްވެރިންނަށް ތަފާތުގޮތުގައި ރިހިބިލިޓޭޓް ޕްރޮގްރާމް ހިންގައި ދޭންޖެހޭ ފަރުވާ ދެވި، ކަންކަން ތަރުތީބުކުރުން އެއީ އެންމެމުހިއްމު އެއްކަންތައްކަމަށެވެ.
ސްޕެޝަލް މެނޭޖްމަންޓް ޔުނިޓް ހުޅުވުމުން އެފަދަ ކުށްވެރިން އެތަނަށް ބަދަލުކުރެވި އެމީހުންނަށް ޚާއްޞަ ޕްރޮގްރާމްތައް ހިންގައި އެމަސައްކަތް ފެށިގެން ދިއުމުން ޖުމްލަގޮތެއްގައި ޖަލުގައި ހަރުކަށި ފިރުކު ފެތުރުން ހުއްޓޭނެކަން މިނިސްޓަރ ފާހަގަކުރެއްވިއެވެ. އޭގެއިތުރުން މިނިސްޓަރ ވިދާޅުވީ އިންފްރާސްޓްރަކްޗަރ ބިނާކުރުމަކީ މަސައްކަތުގެ ކުޑަ މިންވަރެއްކަމަށެވެ. ޖަލުތަކުގެ ޙާލަތު ރަނގަޅުކުރެވޭނީ ޖަލު ބަލަހައްޓާ އޮފިސަރުންގެ ވިސްނުމާއި ފިކުރު އެކަމަށް ތަމްރީނުކޮށް ބޭނުންވާ ހުނަރުތައް ދަސްކޮށްދީ އެއަށް ހާނުވައިގެންކަމަށްވެސް މިނިސްޓަރ ވިދާޅުވިއެވެ.
"މިތަނަށް ގެނެވޭ އެފަދަ ފިކުރެއްގައިހުރި މީހަކު ހެޔޮލަފާ ރަނގަޅު މީހެއްގެ ގޮތުގައި ނިކުމެ އުފެއްދުންތެރި ފަރާތަކަށް ހެދޭ ދުވަސް އެއީ އަޅުގަނޑުމެން މިކުރާ މަސައްކަތުން ނެރެން ބޭނުންވާ ނަތީޖާއަކީ. މިމަސައްކަތް ކުރިއަށްގެންދިއުމުގައި ދުނިޔޭގެ މިންގަނޑުތަކުން ބަލައިގަންނަ ގޮތަށް ކަންކަން ބައްޓަންކުރެވެމުން ދިއުމަކީ ރާއްޖެއަށް ލިބޭ ވަރަށް ބޮޑު ކާމިޔާބީއެއް. ޖަލުތަކުގައި ކަންކުރާގޮތް ދުނިޔޭގެ މިންގަނޑުތަކުން ބަލައިގަންނަ ހިސާބަށް ގެންދިއުމަކީ ރައްޔިތުން އެދޭ އަދި އުއްމީދުކުރައްވާ ގޮތް. އޭގެނަތީޖާއަކަށް ވެގެންދާނީ އަޅުގަނޑުމެންގެ ކުށުގެ ވެށި ބަދަލުވެ، އިޞްލާހުވެ، ހެޔޮލަފާ މުޖުތަމައުއެއް ބިނާކުރަން މަގުފަހިވެގެން ދިއުން" ހޯމް މިނިސްޓަރ އިމްރާން އަބްދުﷲ ވިދާޅުވިއެވެ.
މަޤާމާ ޙަވާލުވެ ފުރަތަމަ އިސްކަންދެއްވި އެއްކަމަކީ ޖަލުތަކުގެ ހާލަތު ދެނެގަތުންކަމަށާ، އެމަސައްކަތުގެ ތެރެއިން ފާހަގަކުރެވުނު މުހިންމު އެއްކަމަކީ ތަފާތު ކުށްތަކުގައި ބަންދުކޮށްފައިވާ މީހުން އެއްތަނެއްގައި އެއްކޮށް ގެންގުޅުމުން ދިމާވާ މައްސަލަތައްކަމަށް މިނިސްޓަރ ވިދާޅުވިއެވެ.
"ސްޕެޝަލް މެނޭޖްމަންޓް ޔުނިޓް" ހުޅުވުމާހިސާބަށް އައިއިރު ހަރުކަށި ފިކުރުގެ މީހުން ދެނެގަނެ، އެމީހުންނާމެދު މުއާމަލާތްކުރާނެ ޚާއްޞަ ހުނަރުތައް އޮފިސަރުންނަށް ދިނުމަކީ މިއަދު ކުރެވިފައިއޮތް މުހިއްމު ކަމެއްކަން މިނިސްޓަރ ފާހަގަކުރެއްވިއެވެ. އެކަމުގައި ޔޫއެންއޯޑީސީން ދިން އެހީތެރިކަމަށް މިނިސްޓަރ ޝުކުރު އަދާކުރެއްވިއެވެ. އަދި ފަންޑު ކޮށްދެއްވި ޔޫރަޕިއަން ޔޫނިއަންއަށްވެސް މިނިސްޓަރ ޝުކުރު އަދާކުރެއްވިއެވެ.