އެމް.ޕީ.އެލް ސަރަޙައްދުގައި ހިނގި ނުރައްކާތެރި އެކްސިޑެންޓުގައި އަނިޔާވި މީހާގެ ހާލު ސީރިއަސްކަމަށް އައިޖީއެމްއެޗްއިން ވިދާޅުވެއްޖެއެވެ.
އައިޖީއެމްއެޗްއިން ވިދާޅުވީ އަނިޔާވި މީހާކާގެ އޮޕަރޭޝަންތަކެއް ކޮށްފައިވާކަމަށާއި އެމީހާ މިވަގުތުވެސް އޮތީ އައިސީޔޫގައިކަމަށެވެ. އަދި އެމީގެ ހާލު ކްރިޓިކަލްކަމަށެވެ. ނަމަވެސް އެމީހާގެ އޮޕަރޭޝަނާ ގުޅޭ އިތުރު ތަފްސީލެއް އައިޖީއެމްއެޗްއިން ހާމަކޮށްފައެއް ނުވެއެވެ.
ކާޕެޓް ރޯލެއް ވެއްޓި ހިނގި މި އެކްސިޑެންޓުގައި އަނިޔާވެފައިވަނީ މަޖޫރީއަކަށެވެ. މި ޙާދިސާ ހިނގާފައިވަނީ ރޭ މެންދަމު 2:15 ހާއިރުއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އެމް.ޕީ.އެލްއިން ވިދާޅުވީ، ހާދިސާގައި އަނިޔާވެފައިވަނީ މިނާ އިންވެސްޓްމަންޓް ގްރޫޕް، ނަމަކަށް ކިޔާ ކްލިއަރެންސް ކުންފުންޏެއްގެ މަޖޫރީއަކަށް ކަމަށެވެ. މި ހާދިސާގައި އަނިޔާވެފައިވަނީ ޓާފް ކާޕެޓް ރޯލްތަކެއް ކެރޭނަކުން ޕިކަޕަށް ލޯޑުކުރުމުގެ ތެރޭގައި ކާޕެޓް ރޯލެއް ވެއްޓިގެންކަމަށްވެސް އެމްޕީއެލްއިން ވިދާޅުވެއެވެ.
މިދިޔަމަހުގެ 7ވަނަ ދުވަހު ބިއްލޫރި ޕެލެޓެއް ނެރުމުގެ ތެރޭގައި ހިނގި ހާދިސާގައިވެސް ޒުވާނަކު ވަނީ ނިޔާވެފައެވެ. މިހާދިސާއާ ގުޅިގެން ފަރުވާދެމުންދަނިކޮށް އުމުރުން 27 އަހަރުގެ އެ ޒުވާނާ ނިޔާވެފައިވަނީ މިދިޔަމަހުގެ 16 ވަނަ ދުވަހުއެވެ.
އެމްޕީއެލް ސަރަހައްދުގައި މިއަދު ހިނގި ހާދިސާއާއި ގުޅިގެން ބަލަންޖެހޭ ކަންކަން ބަލައި، މި ފަދަ ކަމެއް ތަކުރާރުވިޔަނުދިނުމަށް، އަޅަންޖެހޭ ފިޔަވަޅުތައް އަޅާނެކަމަށްވެސް އެމްޕީއެލްއިން ވިދާޅުވެއެވެ. މާލޭ ވިޔަފާރި ބަނދަރަކީ ނުރައްކާތެރި މަސައްކަތްތަކެއް ކުރާ ތަނަކަށްވާތީ، ވިޔަފާރި ބަނދަރުގެ ސަރަހައްދުގައި ހަރަކާތްތެރިވާ މީހުންގެ ސަލާމަތާއި ރައްކާތެރިކަމަށް އެކުންފުނިން ބޮޑު އަހައްމިއްޔަތެއް ދެއްވާކަމަށްވެސް އެކުންފުނިން ވިދާޅުވެއެވެ.