ބަންގްލަދޭޝާއެކު އިޖްތިމާޢީ ، އިޤްތިޞާދީ ދާއިރާއިން އިތުރަށް ގުޅުން ބަދަހިކުރާނަން - މިނިސްޓަރ ޝާހިދު
ބަންގްލަދޭޝާއެކު އިޖްތިމާޢީ ދާއިރާއިންނާއި އިޤްތިޞާދީ ދާއިރާއިން އިތުރަށް ގުޅުން ބަދަހިކުރައްވާނެކަމަށް ފޮރިން މިނިސްޓަރ ޢަބްދުﷲ ޝާހިދު ވިދާޅުވެއްޖެއެވެ.
މިނިސްޓަރ ޢަބްދުﷲ ޝާހިދު މިހެން ވިދާޅުވެފައިވަނީ ދިވެހިރާއްޖެއާއި ބަންގްލަދޭޝާ ދެމެދު ކުރިއަށްގެންދިޔަ މަތީ ފަންތީގެ މަޝްވަރާ ބައްދަލުވުމުގައެވެ.
ބަންގްލަދޭޝްގެ ވެރިރަށް ޑާކާގައި ކުރިއަށްގެންދިޔަ ބައިލެޓްރަލް ޓޯކްސްގައި ފޮރިން މިނިސްޓަރ ޢަބްދުﷲ ޝާހިދު ވަނީ ދިވެހިރާއްޖެއާއި ބަންގްލަދޭޝާ ދެމެދު އޮތް ޒަމާންވީ ގާތްގުޅުމުގެ މައްޗަށް އަލިއަޅުއްވާލައްވާފައެވެ. އަދި މިގުޅުން އިތުރަށް ހަރުދަނާކޮށް، ދެޤައުމުގެ ދެމެދު ޢިޤްތިޞާދީ އަދި އިޖްތިމާޢީ ދާއިރާއިން މިހާރަށްވުރެ ބޮޑަށް ގުޅުން ބަދަހިކުރަން ބޭނުންވާކަމަށް މިނިސްޓަރ ޝާހިދު ވިދާޅުވެފައިވެއެވެ. އަދި ރާއްޖޭގައި ޤަވާއިދާ ޚިލާފަށް ދިރިއުޅޭ ބަންގްލަދޭޝްގެ މީހުންގެ މައްސަލައަށް ޙައްލެއް ގެނައުމަށް ދެ ޤައުމު ގުޅިގެން ކުރެވިދާނެ ކަންކަމާގުޅޭގޮތުންވެސް ފުޅާ ދާއިރާއެއްގައި މަޝްވަރާކުރައްވާފައިވެއެވެ.
މި މަޝްވަރާތަކަށްފަހު ރާއްޖެއާއި ބަންގްލަދޭޝްގެ ފޮރިން މިނިސްޓަރުން ވަނީ ޖޮއިންޓް ޕްރެސް ސްޓޭޓްމަންޓެއްވެސް ދެއްވާފައެވެ.
ধন্যবাদ my dear friend @AKAbdulMomen for your kind invitation to visit your beautiful country, and to the people of #Bangaldesh for your warmth & hospitality. Bangladesh has & continues to be a great neighbor and a true friend of the Maldives. pic.twitter.com/CuuJMwUP96
— Abdulla Shahid (@abdulla_shahid) February 9, 2021
ފޮރިން މިނިސްޓަރ ޢަބްދުﷲ ޝާހިދު ބަންގްލަދޭޝްއަށް ވަޑައިގެންފައިވަނީ ބަންގްލަދޭޝްގެ މިނިސްޓަރ އޮފް ފޮރިން އެފެއަރޒް ޑރ. އޭ. ކޭ. އަބްދުލް މޮމެންގެ ދަޢުވަތަކަށެވެ. 2 ދުވަހުގެ މުއްދަތަކަށް ކުރައްވާ މި ރަސްމީ ދަތުރުފުޅުގެ ތެރެއިން ދެ ޤައުމުގެ ދެމެދު މުހިއްމު ދެ އެއްބަސްވުމެއްގައި ވަނީ ސޮއިކުރައްވާފައެވެ.
އޭގެ ތެރޭގައި ހިމެނީ ރާއްޖޭގައި ޤަވާއިދާއި ޚިލާފަށް އުޅޭ ބަންގްލަދޭޝް މީހުންގެ މައްސަލައަށް ހައްލެއް ގެނައުމަށް ހިއުމަން ރިސޯސް ޕްލޭސްމަންޓް އެއްބަސްވުމަކާއި، ރާއްޖޭގެ ފޮރިން ސަރވިސް އިންސްޓިޓިއުޓާއި ބަންގްލަދޭޝްގެ ފޮރިން އެކަޑަމީއާއި ދެމެދު ވެވުނު އެއްބަސްވުމެކެވެ.
FM Shahid & FM Momen witnessed the signing of 2 MoUs today during FM @abdulla_shahid’s official visit to #Bangladesh.
— Ministry of Foreign Affairs ?? (@MoFAmv) February 9, 2021
1. MoU between the Foreign Service Institute of Maldives & Foreign Service Academy, Bangladesh.
2. MoU on Placement of Human Resources @MoFA_Bangladesh pic.twitter.com/MOd0YJtTir
މި ދަތުރުފުޅުގައި ފޮރިން މިނިސްޓަރ ޢަބްދުﷲ ޝާހިދު ބަންގްލަދޭޝްގެ ރައީސް އެމްޑީ އަބްދުލް ހާމިދާއި ބޮޑުވަޒީރު ޝެއިޚް ޙަސީނާގެ އަރިހަށް އިހްތިރާމްގެ ޒިޔާރަތެއް ކުރައްވާނެކަމަށް ފޮރިން މިނިސްޓްރީން މަޢުލޫމާތުދެއްވައެވެ.
ފޮރިން މިނިސްޓަރ ޝާހިދުގެ އަރިހުގައި މި ދަތުރުފުޅުގައި ފޮރިން ސެކްރެޓަރީ އަބްދުލްޣަފޫރު މުޙައްމަދު އާއި ޖޮއިންޓް ސެކްރެޓަރީ ފާތުމަތު ގިނާ ބައިވެރިވެވަޑައިގަންނަވައެވެ.
ދިވެހިރާއްޖެއިން ބަންގްލަދޭޝްއާއެކު ސިޔާސީ ގުޅުން ޤާއިމުކޮށްފައިވަނީ 22 ސެޕްޓެމްބަރު 1978 ގައެވެ. މިއަހަރު މި ގުޅުމަށް 43 އަހަރު ފުރޭނެއެވެ.