އެމްބިއުލާންސްގެ ޙިދުމަތް މިވަގުތު ލިބެން ނެތް ރަށްރަށަށް މިއަހަރުގެ މެދުތެރޭގައި އެމްބިއުލާންސް ފޯރުކޮށްދެވޭނެކަމަށް ހެލްތު މިނިސްޓަރ އަޙްމަދު ނަޞީމް ވިދާޅުވެއްޖެއެވެ.
މިނިސްޓަރ ނަޞީމް މިހެން ވިދާޅުވީ، ވެރިކަންކުރާ މައި ޕާޓީ، އެމް.ޑީ.ޕީން ކުރިއަށްގެންދާ ރަށްވެހި ފަތިސް ކެނޑިޑޭޓުންނާއި ކެމްޕޭން ޓީމުތަކާއެކު ބާއްވާ ސިލްސިލާ ބައްދަލުވުމުގައި ވަރޗުއަލްކޮށް ބައިވެރިވެވަޑައިގެން ދެއްކެވި ވާހަކަފުޅުގައެވެ.
ކުރިއަށް އޮތް ލޯކަލް ކައުންސިލް އިންތިޚާބުގައި ވާދަކުރައްވާ އެމްޑީޕީގެ ކެނޑިޑޭޓުންނާއި ކެންޕެއިން ޓީމުތަކާއިއެކު "ރަށްވެހި ފަތިސް"ގެ ނަމުގައި ބާއްވާ ސިލްސިލާ ބައްދަލުވުންތަކުގެ ތެރެއިން ގއ.އާއި ގދ.އާއި ޅ. އަތޮޅުގެ ރައްޔިތުންނާއެކު ބޭއްވެވި ބައްދަލުކުރެއްވުމުގައި، އެ 3 އަތޮޅުގެ ރައްޔިތުންގެ ފަރާތުން ޞިއްޙީ ދާއިރާއާއި ގުޅޭގޮތުން ހުރި ކަންބޮޑުވުންތައް ވަނީ ހިއްސާކުރައްވާފައެވެ. އެގޮތުން ޞިއްޙީ ޙިދުމަތް ދިނުމަށް އެކަށީގެންވާ ވަޞީލަތްތައް ލިބެންނެތުމާއި، އެމްބިއުލާންސްގެ ދަތިކަމާއި، ލެބޯޓްރީގެ ޙިދުމަތް ހޯދުމުގައި ހުރި ދަތިތައް އެ ރަށްރަށުގެ ކެނޑިޑޭޓުން ވަނީ ފާހަގަކުރައްވާފައެވެ.
މި ކަންބޮޑުވުންތަކަށް ޖަވާބުދެއްވަމުން ހެލްތު މިނިސްޓަރ އަޙްމަދު ނަޞީމް ވިދާޅުވީ، ފިނޭންސް މިނިސްޓްރީ މެދުވެރިކޮށް އެސް.ޓީ.އޯއިން އިތުރު 96 އެމްބިއުލާންސް ހޯދުމުގެ މަސައްކަތް ކުރަމުންދާކަމަށެވެ. އަދި މިއަހަރުގެ އޭޕްރިލްމަހުގެ ތެރޭގައި އެ އެމްބިއުލާންސްތައް ރާއްޖެއަށް އަންނާނެކަމަށާއި، އެހާތަނަށް އެމްބިއުލާންސް ނެތް ރަށްރަށަށް އެމްބިއުލާންސް ފޯރުކޮށްދެވޭނެކަމަށް މިނިސްޓަރ ވިދާޅުވިއެވެ.
"ފިނޭންސް މިނިސްޓްރީގައި ހަމަޖެހިގެން، އަޅުގަނޑުމެން މިހާރު ވާނީ ފޮނުވާފައި އެސް.ޓީ.އޯއިން އެމްބިއުލާންސްތައް ގެންނަން. އެހެންވީމަ 96 އެމްބިއުލާންސް އަންނާނެ އޭޕްރީލްމަހުގެ ނިޔަލަށް. އެހާތަނުން އެމްބިއުލާންސް މަދުވާ ހުރިހާ ރަށަކަށްވެސް އެމްބިއުލާންސްތައް ލިބޭނެ" މިނިސްޓަރ ނަސީމް ވިދާޅުވިއެވެ.
އަތޮޅު ތެރޭގައި ޞިއްޙީ ބޭނުމަށް އެއް ރަށުން އަނެއް ރަށަށް އެންމެ ގިނައިން ރައްޔިތުން ދަތުރުކުރާ ބޭނުންތަކުގެ ތެރޭގައި އެކި ކަހަލަ ތަޙްލީލުތައް ހެދުން ހިމެނެއެވެ. މިފަދަ ދަތުރުތަކަށް އާއްމުންގެ އަތުން ހޭދަކުރަންޖެހޭ މިންވަރު މަދުކުރުމަށް ކުރާ މަސައްކަތުގެ ދަށުން މޯބައިލް ލެބޯޓްރީތައް ޤާއިމުކުރުމުގެ މަސައްކަތް ސަރުކާރުން ދަނީ ކުރައްވަމުންނެވެ. ހެލްތު މިނިސްޓަރ ނަޞީމް ވިދާޅުވީ، މިހާރު އެ ޙިދުމަތް ތަޢާރަފުކުރެވިފައިނުވާ ހުރިހާ ރަށަކަށް މާރިޗުމަހުގެ ނިޔަލަށް އެ ޙިދުމަތްވެސް ތަޢާރަފުކުރެވިގެންދާނެކަމަށެވެ. އަދި އެކަހެރިކޮށް އޮންނަ ރަށްތަކުން ޞިއްޙީ ޙިދުމަތް ހޯދުމަށް ކުރާ ދަތުރުތަކުގައި ބޭނުންކުރުމަށް 12 ލޯންޗެއް މިހާރު ލިބިފައިވާކަންވެސް މިނިސްޓަރ ފާހަގަކުރެއްވިއެވެ.
މީގެ އިތުރުން އަތޮޅުތަކުގެ ހޮސްޕިޓަލްތަކާއި ޞިއްޙީ މަރުކަޒުތަކަށް މަދުވާ ޑޮކްޓަރުންނާއި ނަރުހުން ހޯދުމުގެ މަސައްކަތްވެސް ކުރަމުންދާކަމަށް މިނިސްޓަރ ނަޞީމް ވިދާޅުވިއެވެ. އެގޮތުން އެކަމަށް ބަޖެޓުގެ ތެރެއިން 61 މިލިއަން ރުފިޔާ ކަނޑައަޅާފައިވާކަމަށް މިނިސްޓަރ ވިދާޅުވިއެވެ. އަދި އުއްމީދަކީ މިއަހަރުގެ މެދުތެރެއަށް ދާންވާއިރަށް މިނިސްޓްރީން ކަނޑައަޅާފައިވާ ކެޓެގަރީތަކާއި އެއްގޮތަށް ހުރިހާ ރަށެއްގައިވެސް ޑޮކްޓަރުންނާއި ނަރުހުން ހަމަވުންކަމަށްވެސް މިނިސްޓަރ ވިދާޅުވިއެވެ.