ކޯވިޑް 19އަށް ފަހު އަލުން ފަތުރުވެރިކަމަށް ނެރެފައިވާ އެނދުގެ އަދަދު 45 ހާހަށް ވުރެ މައްޗަށް އަރައިފިއެވެ.
ޓޫރިޒަމް މިނިސްޓްރީން އާއްމުކޮށްފައިވާ ތަފާސް ހިސާބުތަކުން ދައްކާގޮތުން މި މަހުގެ 5ވަނަ ދުވަހުގެ ނިޔަލަށް 45083 އެނދުވަނީ އޮޕަރޭޝަނަށް ގެނެވިފައެވެ.
މީގެތެރޭގައި ހިމެނެނީ ރިސޯޓުތަކުގެ 34226 އެނދާއި، ހޮޓާތަކުގެ 1458 އެނދާއި، ސަފާރީތަކުން އޮޕަރޭޝަނަށް ގެނެސްފައިވާ 2723 އެނދާއި، ގެސްޓުހައުސްތަކުގެ 6676 އެނދު ކަމަށް ޓޫރިޒަމް މިނިސްޓްރީން ހާމަކުރެއެވެ.
އަލުން އޮޕަރޭޝަނަށް ގެނެސްފައިވާ ޓޫރިސްޓު ފެސިލިޓީތަކުގެ އަދަދުތަކަށް ބަލާއިރު، 148 ރިސޯޓު، 11 ހޮޓާ، 140 ސަފާރީ 364 ގެސްޓު ހައުސް ހިމެނޭހެން ޖުމްލަ 663 ޓޫރިސްޓު ފެސިލިޓީއެއްވަނީ މިހާރު ފަތުރުވެރިންނަށް ހުޅުވާލާފައެވެ.
ތަފާސް ހިސާބުތައް ދައްކާގޮތުން އެންމެ ގިނަ އަދަދަކަށް ރިސޯޓް އަދި ގެސްޓްހައުސް ހުޅުވާފައިވަނީ ކ.އަތޮޅުންނެވެ. އެގޮތުން ކ.އަތޮޅުން 47 ރިސޯޓް ހުޅުވާފައިވާއިރު، މިއީ ފަތުރުވެރިކަމުގެ 11338 އެނދެވެ. ގެސްޓްހައުސްތަކުގެ އަދަދުތަކަށް ބަލާއިރު، މިހާތަނަށް ކ.އަތޮޅުން 149 ގެސްޓްހައުސްއެއް އަލުން ހުޅުވާ 3536 އެނދުވަނީ ފަތުރުވެރިކަމަށް ނެރެފައެވެ.
ފަތުރުވެރިކަމަށް އަލުން ހުޅުވާ ޓޫރިސްޓު ފެސިލިޓީތައް އިތުރުވަމުންދާއިރު، ރާއްޖެއަށް އަންނަ ފަތުރުވެރިންގެ އަދަދުވެސް ދަނީ އިތުރުވަމުންނެވެ. އެގޮތުން އަހަރުގެ މިހާތަނަށް ރާއްޖެއަށްވަނީ 204528 ފަތުރުވެރިން އައިސްފައެވެ. އަދި މިހާރު އެވްރެޖްކޮށް ކޮންމެ ދުވަހަކު ރާއްޖެއަށް 3109 ފަތުރުވެރިން އަންނަ ކަމަށް ތަފާސް ހިސާބުތަކުން ދައްކައެވެ.