އިންކަމް ސަޕޯޓް އެލަވަންސްގެ ގޮތުގައި 300 މިލިއަނަށްވުރެ ގިނަ ރުފިޔާ ދޫކޮށްފައިވާކަމަށް ފިނޭންސް މިނިސްޓްރީން ހާމަކޮށްފިއެވެ.
ފިނޭންސް މިނިސްޓްރީން އެންމެފަހުން އާންމުކޮށްފައިވާ ތަފާސް ހިސާބުތައް ދައްކާގޮތުން މިމަހުގެ 12 ވަނަ ދުވަހާއި ހަމައަށް 19741 ފަރާތަކަށް އިންކަމް ސަޕޯޓު އެލަވަންސްގެ ގޮތުގައި 318.8 މިލިއަން ރުފިޔާ ވަނީ ދޫކޮށްފައެވެ.
ކޯވިޑް-19ގެ ޙާލަތާއި ގުޅިގެން ޢާމްދަނީއަށް ނުރަނގަޅު އަސަރު ކޮށްފައިވާ ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި، މަހަކު 5000 ރުފިޔާ ދިނުމަށް ސަރުކާރުން ނިންމާ އެ ފައިސާ އަންނަނީ ދޫކުރަމުންނެވެ. އެގޮތުން މިހާރު ކުރިއަށްދަނީ އިންކަމް ސަޕޯޓް އެލަވަންސް ދޫކުރުމުގެ އެންމެ ފަހު ބުރެވެ.
އެލަވަންސް ދީފައިވަނީ ތިން ބުރަކަށް ބަހާލައިގެންނެވެ. އެގޮތުން ފުރަތަމަ ބުރުގައި އެލަވަންސް ދޫކޮށްފައިވަނީ މިދިޔަ އަހަރުގެ އޭޕްރިލް، މޭ އަދި ޖޫން މަަހަށެވެ. ދެން އެލަވަންސް ސުކުރީ އެ އަހަރުގެ ޖުލައި، އޮގަސްޓް، ސެޕްޓެމްބަރު މަހުވެސް ވަޒީފާއަށް އަސަރުކޮށްފައިވާ މީހުންނަށެވެ. އޭގެ ފަހުން މިދިޔަ އޮކްޓޯބަރ، ނޮވެމްބަރ އަދި ޑިސެމްބަރުމަހަށްވެސް ވަނީ އެލަވަންސްދޫކޮށްފައެވެ.
އިންކަމް ސަޕޯޓް އެލަވަންސް ދޫކުރަނީ ކޯވިޑާއި ގުޅިގެން ޢާމްދަނީއަށް ނުރަނގަޅު އަސަރެއް ކޮށްފައިވާ މީހުންނަށް، އެ މީހުންގެ ދިރިއުޅުމުގެ ޒަރޫރީ ބޭނުންތައް ފުއްދުމަށް އެހީތެރިވުމުގެ ގޮތުން ސަރުކާރުގެ ފަރާތުން ޚާއްޞަ ޢިނާޔަތެއް ދިނުމުގެ ބޭނުމުގައެވެ.
ވަޒީފާއަށް ނުރަނގަޅު އަސަރު ކޮށްފައިވާ މީހުންނަށް އެލަވަންސް ދިނުމުގެ ޝަރުޠުތަކުގެ ތެރޭގައި، ދިވެހި ރައްޔިތަކަށް ވުމާއެކު، ދިވެހިރާއްޖޭގައި ދިރިއުޅޭ މީހެއްކަމުގައި ވާންޖެހެއެވެ. އަދި އެއީ ޢުމުރުން 18 އަހަރާއި، 65 އަހަރާއި ދެމެދުގެ މީހަކަށް ވާންޖެހެއެވެ. މުސާރަ އުނިކޮށްފައިވާ މީހަކަށް 5000 ރުފިޔާއިން ދަށުން ޢާމްދަނީއެއް ލިބޭނަމަ އެމީހަކަށް އިނާޔަތުގެ ގޮތުގައި 5000 ރުފިޔާއިން އެ ޢަދަދު އުނިކުރުމުން ބާކީ އޮންނަ ޢަދަދާ އެއްވަރުގެ ޢަދަދެއް ލިބޭނެއެވެ.