ފަރަންސޭސިވިލާތުގެ ދެމަފިރިއަކު ރާއްޖެއަށް ޗުއްޓީ ހޭދަކުރުމަށް އައި އަދަދު 60އަށް އެރުމާ ގުޅިގެން އެދެމެފިރިންނަށް ހޫނު މަރުޙަބާއެއް ކިޔައިފިއެވެ.
ސަރޖް އާއި ޖޮސެލް ޑިސައު ރާއްޖެއަށް އައި 60ވަނަ ފަހަރު ފާހަގަކުރުމަށް އެއަރޕޯޓުގައި ބޭއްވި ހަފްލާގައި ޓޫރިޒަމް މިނިސްޓަރ އަބްދުﷲ މައުސޫމް ބައިވެރިވެވަޑައިގެންނެވިއެވެ. މި ދެމަފަރިން އެންމެ ފުރަތަމަ ރާއްޖެއަށް ޒިޔާރަތްކުރީ 1994ވަނަ އަހަރުއެވެ. އަދި ފާއިތުވި 27 އަހަރުތެރޭ އާއްމުގޮތެގައި އަހަރެއްގެ މައްޗަށް ދޭއް ނުވަތަ 3 ފަހަރު ރާއްޖެއަށް ޒިޔާރަތްކުރެއެވެ.
ފީނުމަށް ލޯބިކުރާ މި ފަތުރުވެރިންވަނީ ރާއްޖޭގައި 700އަށްވުރެ ގިނަ ޑައިވް ކޮށްފައެވެ. 60ވަނަ ފަހަރަށް ރާއްޖެއަށް އައިސްފައިވާއިރު، ފާއިތުވި 4 ފަހަރުވެސް ޗުއްޓީ ހޭދަކޮށްފައިވަނީ ކޮކޯ ޕާމް ދުނިކޮޅުގައެވެ.
ޕީއެސްއެމް ނިއުސްއާ ވާހަަކަދައްކަމުން މި ދެމަފިރިން ބުނީ އެންމެ ފަހުން ރާއްޖެއައީ މިދިޔަ ޖެނުއަރީމަހު ކަމަށެވެ. އަދި ސީދާ ފްރާންސްއިން ރާއްޖެ އައުމަށް ދަތިވެފައިވާތީ، ރާއްޖެއަށް އައުމަށް ފުރަތަމަ ދަތުރުކުރީ ސްވިޓްޒަރލޭންޑަށް ކަމަށެވެ.
އަދި ކޯވިޑްގެ ހާލަތުގައިވެސް ރާއްޖެއަށް ޗުއްޓީއަށް އަންނަނީ ރާއްޖެއަކީ ރައްކާތެރި މަންޒިލެއްކަން ކަށަވަރުވާތީ ކަމަށްވެސް ޑިސައުގެ ދެމަފިރިން ބުންޏެވެ.
" ރާއްޖޭގައި މިހާރު ވަރަށް ގިނަ ރައްޓެހިން އެބަތިބި، ދިވެހިންނަކީ ވަރަށް ހިތްހެޔޮ ބައެއް، ރާއްޖެއަށް އާއްމުކޮށް އަހަރެއްގެ މައްޗަށް ތިން ފަހަރު އަންނަން، ރާއްޖެދެކެ ވަރަށް ލޯބިވޭ، ކޯވިޑްގެ ހާލަތުގައިވެސް އެނގޭ ރާއްޖެއަކީ ރައްކާތެރި މަންޒިލެއްކަން އެހެންވެ ރާއްޖެއަށް އަންނަނީ،" ސަރޖް އަދި ޖޮސެލް ޑިސައު ބުންޏެވެ.
މިފަތުރުވެރިންގެ މިފަހަރުގެ ދަތުރުގައި ރާއްޖޭގައި 15 ދުވަހުގެ ޗުއްޓީއެއް ހޭދަކުރާނެއެވެ.
ފަތުރުވެރިންނަށް މަރުޙަބާ ކިޔުމަށް ބޭއްވި ހަފްލާއަށްފަހު ދެއްވި އިންޓަރވިއުއެއްގައި ޓޫރިޒަމް މިނިސްޓަރ ޑރ.އަބްދުﷲ މަޢުސޫމް ވިދާޅުވީ ރާއްޖޭގެ ފަތުރުވެރިކަން ކުރިއެރުވުމަށް ތަކުރާރުކޮށް ރާއްޖެއަށް އަންނަ ފަތުުރުވެރިން މުޙިއްމު ކަމަށެވެ.
" ވަރަށް ހިތްހަމަޖެހޭ 60ވަނަ ފަރަހަށް ރާއްޖެއަށް އައި ފަތުރުވެރިންތަކަކަށް މަރުޙަބާ ކިޔަން ލިބުމުން، މިފަދަ ފަތުރުވެރިންނަކީ ފަތުރުވެރިކަމަށް ދިމާވާ ގޮންޖެހުންތަކުން އަރައިގަތުމަށް އެހީވެދޭ ބައެއް، ރާއްޖޭގެ ރިސޯޓްތަކަށް ޒިޔާރަތްކުރާ 30 އިންސައްތަ އަކީ ރިޕީޓްކޮށް އަންނަ ފަތުރުވެރިން،" މިނިސްޓަރ ވިދާޅުވިއެވެ.
ރާއްޖެއަށް އަންނަ ފަތުރުވެރިންގެ ތެރޭގައި ތަކުރާރުކޮށް އަންނަ ފަތުރުވެރިންގެ އަދަދު އިތުރުވަމުންދާއިރު، ވަކި ޚާއްސަ ރިސޯޓަކަށް އަންނަ ފަތުރުވެރިންވެސް މަދެއް ނޫނެވެ. މިފަދަ ފަތުރުވެރިންނާއި ރިސޯޓުގެ މުވައްޒަފުންނާއި އޮންނަނީ ވަރަށް ގާތްގުޅުމެއް އުފެދިފައެވެ.