ރަޝިއާގައި ބާއްވާ ފަތުރުވެރިކަމުގެ އެންމެ ބޮޑު ފެއަރ ކަމުގައިވާ މޮސްކޯ އިންޓަރނޭޝަނަލް، ޓްރެވަލް އެންޑް ޓޫރިޒަމް އެގްޒެބިޝަން، އެމްއައިޓީޓީ ފެއަރގައި ރާއްޖެއިން ބައިވެރިވެއްޖެއެވެ.
މި ފެއަރގައި މޯލްޑިވްސް މަރކެޓިންގ އެންޑް ޕަބްލިކް ކޯރޕަރޭޝަން، އެމްއެމްޕީއާރުސީއާއެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 13 ކުންފުންޏަކުން ވަނީ ބައިވެރިވެފައެވެ. އެމްއައިޓީޓީ ފެއަރއަކީ ކޯވިޑްގެ ހާލަތާއި ގުޅިގެން ބޭރުގެ ފެއަރތައް މެދުކެނޑިފައި އޮންނަތާ އަހަރެއްހާ ދުވަސް ފަހުން ބާއްވާ މިފަދަ ފުރަތަމަ ފެއަރއެވެ. އަދި މިއީ ގިނަ ދުވަސްތަކަކަށްފަހު، ޓީމެއްގެ ގޮތުގައި ޤައުމަކަށް ދަތުރުކޮށްގެން ރާއްޖެއިން ބައިވެރިވާ މިފަދަ ފުރަތަމަ ފެއަރއެވެ.
މިއަހަރުގެ އެމްއައިޓީޓީ ފެއަރ ކުރިއަށްދަނީ މިމަހުގެ 16 އިން 18 އަށެވެ. މި ފެއަރގައި ރާއްޖެ ތަމްސީލްކުރުމަށް ޙާއްސަ ޕެވިލިއަންއެއް ހުންނާނެކަމަށް އެމްއެމްޕީއާރުސީން ހާމަކުރެއެވެ.
މިއަހަރުގެ އެމްއައޓީޓީ ފެއަރގައި 25 އަކަށް ޤައުމުން ވަނީ ބައިވެރިވެފައެވެ. އަދި ދުނިޔޭގެ ނަން މަޝްރޫޙު ޓުއަރ އޮޕަރޭޓަރުންނާއި ފަތުރުވެރިކަމާއި ގުޅުން ހުރި އެހެނިހެން ޙިދުމަތްތައް ދޭ ފަރާތްތަކުން ވަނީ ބައިވެރިވެފައެވެ.
ރަޝިޔާއަކީ ރާއްޖޭގެ ފަތުރުވެރިކަމަށް މުޙިއްމު ޤައުމެކެވެ. އެގޮތުން މިހާރު ރާއްޖެއަށް ދެވަނަ އަށް އެންމެ ގިނަ އަދަދަކަށް ފަތުރުވެރިން އަންނަނީ ރަޝިޔާއިންކަން ފަހަގަކޮށްލެވެއެވެ.
ރާއްޖޭގެ ފަތުރުވެރިކަން ދުނިޔެއަށް އިޝްތިހާރުކޮށް ރާއްޖެއަށް އަންނަ ފަތުރުވެރިންގެ އަދަދުތައް އިތުރުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖެ އިޝްތިހާރުކުރުމަށް ރާއްޖެއިން ބޭރުގައި ބާއްވާ 44 ފެއަރއަކާއި ރޯޑްޝޯއެއްގައި މިއަހަރު ބައިވެރިވާނެކަމަށް އެމްއެމްޕީއާރުސީން ބުނެއެވެ.
އެމްއެމްޕީއާރުސީން މިއަހަރު ބައިވެރިވުމަށް ނިންމާފައިވާ ދުނިޔޭގެ ބައެއް ބޮޑެތި ބައެއް އެހެން ފެއަރތަކުގެތެރޭގައި، ސްޕެއިންގައި ކުރިއަށްދާ ފިޓޫރު ފެއަރއާއި، ޑަބްލިއުޓީއެމް ލަންޑަންއާއި، އައިޓީބީ އޭޝިއާ، އަދި އައިޓީބީ ޗައިނާ ހިމެނެއެވެ.