ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، ޔުނައިޓެޑް އަރަބް އެމިރޭޓްސް(ޔޫ.އޭ.އީ)ގެ ނައިބު ރައީސް، ބޮޑުވަޒީރު އަދި ދުބާއީގެ ވެރިޔާ ޝައިޚް މުޙައްމަދު ބިން ރާޝިދު އަލް މަޚްތޫމްގެ ބޭބޭފުޅު، ދުބާއީގެ ޑެޕިއުޓީ ރޫލަރ އަދި ޔޫ.އޭ.އީގެ މިނިސްޓަރ އޮފް ފިނޭންސް، ޝައިޚް ހަމްދާން ބިން ރާޝިދު އަލް މަޚްތޫމް އަވަހާރަވުމާ ގުޅިގެން ތަޢުޒިޔާ ވިދާޅުވެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާގެ މެސެޖުގައި، ދުބާއީގެ ޑެޕިއުޓީ ރޫލަރ އަދި ޔޫ.އޭ.އީގެ މިނިސްޓަރ އޮފް ފިނޭންސް، ޝައިޚް ހަމްދާން ބިން ރާޝިދު އަލް މަޚްތޫމް އަވަހާރަވި ޚަބަރު އެއްސެވީ ފުން ހިތާމައާއެކުގައި ކަމަށް ވިދާޅުވެފައި ވެއެވެ. އަދި އެ މަނިކުފާނަކީ އެ ޤައުމުގެ ކުރިއެރުމާއި ތަރައްޤީއަށްޓަކައި ގިނަގުނަ މަސައްކަތްތަކެއް ކުރައްވާފައިވާ ބޭފުޅެއްކަމަށާ، އެމަނިކުފާނު ވަކިވެ ދިއުމުގެ އުނިކަން މުޅި ޔޫ.އޭ.އީގެ އިތުރުން މެދުއިރުމައްޗާއި މުޅި ދުނިޔެވެސް އިޙުސާސްކުރާނެކަމަށް ރައީސުލްޖުމްހޫރިއްޔާގެ މެސެޖުގައި ވިދާޅުވެފައިވެއެވެ.
ޔޫ.އޭ.އީގެ ނައިބު ރައީސް އަދި ބޮޑުވަޒީރުގެ ބޭބޭފުޅު އަވަހާރަވުމުގެ ހިތާމައިގައި ދިވެހި ރައްޔިތުންނާއި ސަރުކާރާއި އެ މަނިކުފާނުގެ އަމިއްލަ ނަންފުޅުގައި އެ ޤައުމުގެ ރައްޔިތުންނަށާއި، ޚާއްޞަކޮށް ޔޫއޭ.އީގެ ނައިބު ރައީސް އަދި ބޮޑުވަޒީރާއި އެމަނިކުފާނުގެ ޢާއިލާގެ ބޭފުޅުންނަށް އިޚްލާޞްތެރި ތަޢުޒިޔާ ރައީސުލްޖުމްހޫރިއްޔާ ވަނީ ފޮނުއްވާފައެވެ.