ބަންގްލަދޭޝްގައި ހިނގި އަލިފާނުގެ ހާދިސާއާ ގުޅިގެން މިނިސްޓަރ ޝާހިދު ހަމްދަރުދީގެ މެސެޖެއް ފޮނުއްވައިފި
ބަންގްލަދޭޝްގެ ކޮކްސް ބާޒާރުގައި ހުންނަ ރޮހިންޔާ ރެފިއުޖީ ކޭމްޕްގައި ހިނގި އަލިފާނުގެ ހާދިސާއާ ގުޅިގެން، މިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު، ބަންގްލަދޭޝްގެ މިނިސްޓަރ އޮފް ފޮރިން އެފެއާޒް ޑރ.އަބްދުލްމޮމެންއަށް ހަމްދަރުދީގެ މެސެޖެއް ފޮނުއްވައިފިއެވެ.
ބަލުޚާލީ ކޭމްޕްގައި ހިނގައިދިޔަ އަލިފާނުގެ ހާދިސާގެ ސަބަބުން އެތައް ބައެއްގެ ގެދޮރާއި ފުރާނަ ގެއްލި އަދި ގިނަ ބަޔަކަށް ބޮޑެތި ގެއްލުންތަކެއްވި ޚަބަރު އެއްސެވީ ފުން ހިތާމަޔާއެކީގައިކަން މިނިސްޓަރުގެ މެސެޖުގައި ފާހަގަކުރެއްވިއެވެ. އަދި ދިވެހި ސަރުކާރާއި ދިވެހި ރައްޔިތުންގެ ނަމުގައި މިހިތާމަވެރި ހާދިސާގެ ސަބަބުން ގެއްލުން ލިބުނު ރެފިއުޖީންނާއި ބަންގްލަދޭޝްގެ ސަރުކާރަށް ހަމްދަރުދީއާއި ތަޢުޒިޔާ ފޮނުއްވާކަމަށް މިނިސްޓަރ ވިދާޅުވިއެވެ.
މީގެ އިތުރުން މި ހާދިސާގެ ސަބަބުން ލިބުނު ގެއްލުންތަކުން ވީހާވެސް އަވަހަށް އަރައިގަތުމަށް މަސައްކަތްކުރާ ފަރާތްތަކުން އެކަންކަން ފުރިހަމައަށް ގެންދަވާނެކަމަށް އުއްމީދުކުރައްވާކަމަށާއި، ގެއްލުން ލިބުން ފަރާތްތައް މިކަމުން ވީހާވެސް އަވަހަށް އަރައިގަނެވޭނެކަމަށް އުއްމީދުކުރައްވާކަމުގައި މިނިސްޓަރ ޝާހިދު ވިދާޅުވިއެވެ.
ބަންގްލަދޭޝްގެ ކޮކްސް ބާޒާރުގައި ރޮހިންޔާ ނަސްލުގެ މީހުން ދިރިއުޅޭ ސަރަޙައްދެއްގައި ހިނގި އަލިފާނުގެ ޙާދިސާގައި 400 އެއްހައި މީހުން ވަނީ ގެއްލިފައެވެ. މިއީ 2017ވަނަ އަހަރުގެ ފަހުން ރޮހިންޔާ ނަސްލުގެ މީހުން ދިރިއުޅޭ ސަރަޙައްދެއްގައި ހިނގި އެންމެ ބޮޑު އަލިފާނުގެ ޙާދިސާއެވެ.
އދ.ގެ ރެފިއުޖީންނާބެހޭ އިދާރާއިން ބުނާގޮތުގައި އަލިފާނުގެ ޙާދިސާގައި 11 މީހުން މަރުވެ 550 އަށްވުރެ ގިނަ މީހުން ޒަޚަމްވިއެވެ. އޭގެ އިތުރުން 400 މީހުން އެ ޙާދިސާގައި ގެއްލިފައިވާކަމަށްވެސް އެ އިދާރާއިން ބުނެއެވެ. އަލިފާނުގެ ޙާދިސާގައި ރޮހިންޔާ މީހުން ދިރިއުޅޭ 40،000 ޖިފުޓި ބޭނުން ނުކުރެވޭ ވަރަށް އެންދުމުން 45،000 މީހުންގެ ގެދޮރުވަނީ ގެއްލިފައެވެ.
ބަންގުލަދޭޝްގެ ކާރިޘާތަކާބެހޭ ވުޒާރާއިން ބުނީ އެ ސަރަޙައްދުގައި ހުރި ދެ ހަސްފަތާލެއްވެސް އަލިފާނުގެ ހާދިސާގައި އަނދައި ހުލިވެފައިވާކަމަށެވެ. އެއީ އިންޓަނޭޝަނަލް އޯގަނައިޒޭޝަން ފޮރ މައިގްރޭޝަން، އައިއޯއެމްގެ ހަސްފަތާލަކާއި ތުރުކީވިލާތުގެ ސަރުކާރުން ޤާއިމުކޮށްފައިވާ ހަސްފަތާލެކެވެ.
ބަންގުލަދޭޝުގައި ރޮހިންޔާގެ މިލިއަނަކަށްވުރެ ގިނަ މީހުން ދިރިއުޅެއެވެ. އޭގެ ތެރެއިން ގިނަ މީހުންނަކީ 2017ވަނަ އަހަރު މިޔަންމާގެ އަސްކަރިއްޔާއިން ރޮހިންޔާ ދަރިކޮޅުގެ މީހުންނަށް އަމާޒުކޮށް ހިންގަން ފެށި ބޮޑެތި ޖަރީމާތަކުން ސަލާމަތްވުމަށް ބަންގްލަދޭޝަށް ހިޖުރަކޮށްފައިވާ މީހުންނެވެ.