އެސޯސިއޭޝަން އޮފް ރަޝިއަން ޓުއަރ އޮޕަރޭޓަރސް (އެޓޯ) އާއި ގުޅިގެން އެމްއެމްޕީއާރުސީން ރަޝިއާ މާކެޓަށް އަމާޒުކޮށްގެން އެއްމަސް ދުވަހުގެ ކެމްޕެއިނެއް ފަށައިފިއެވެ.
މޯލްޑިވްސް މަރކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީން ވިދާޅުވީ މާޗް މަހުން ފެށިގެން އެޕްރީލް މަހުގެ 8 ވަނަ ދުވަހުގެ ނިޔަލަށް ކުރިއަށް ގެންދާ މި ކެމްޕެއިންގެ މަޤްސަދަކީ ރަޝިއާގެ ޓްރެވެލް ޓްރޭޑަށް ދިވެހިރާއްޖެއާ ބެހޭގޮތުން އެންމެ ފަހުގެ މައުލޫމާތު ހިއްސާކޮށް ރަޝިއާ މާކެޓްގައި ރާއްޖެއަކީ ރައްކާތެރި ފަތުރުވެރި މަންޒިލެއްގެ ގޮތުގައި އިޝްތިހާރުކުރުން ކަމަށެވެ.
އެޓޯއަކީ ރަޝިއާގެ އެންމެ ބޮޑެތި 100 އަށް ވުރެން ގިނަ ފަންނީ ޓުއަރ އޮޕަރޭޓަރސް ހިމެނޭ އެސޯސިއޭޝަނެކެވެ. އަދި މިއީ ޓްރެވަލް ކޮންޓެންޓާއި ފަތުރުވެރިކަމާ ގުޅޭ އެންމެ ފަހުގެ ޚަބަރުތައް ގެނެސްދިނުމުގައި އެންމެ އިތުބާރު ލިބިފައިވާ ފަރާތެވެ.
އެޓޯ އާއެކު ކުރިއަށް ގެންދާ ކެމްޕެއިންގައި ތިން ސެޝަނެއްގެ މައްޗަށް އެކުލެވޭގޮތަށް އޮންލައިން ތަމްރީނު ޕްރޮގްރާމް ކުރިއަށް ދާނެއެވެ. މިސެޝަންތަކުގައި ރާއްޖޭގެ ފަތުރުވެރިކަމުގެ ސިނާޢަތާއި ބެހޭ އެންމެ ފަހުގެ މައުލޫމާތާއި ރާއްޖޭގެ ރިސޯޓް، ގެސްޓްހައުސް، ލިވަބޯޑް އަދި ހޮޓެލްތަކާއި ބެހޭ މުހިންމު މައުލޫމާތު ދޭނެ ކަމަށް އެމްއެމްޕީއާރުސީން ހާމަކުރެއެވެ.
އެމްއެމްޕީއާރުސީގެ މިވެބިނާ ސެޝަންތަކުގައި އިންޑަސްޓްރީގެ ނުވަ ފަރާތަކުން ބައިވެރިވެ އެކި މައުޟޫޢުތަކަށް ޓްރަވަލް ޓްރޭޑާއި މަޢުލޫމާތު ހިއްސާކުރާނެއެވެ. އެގޮތުން ފަތުރުވެރިންގެ ރައްކާތެރިކަމަށް އެޅިފައިވާ ފިޔަވަޅުތަކާއި ރާއްޖެ ގުދުރަތީ ގޮތުން ވަކި ރަށްތަކެއްގެ ގޮތުގައި އުފެދިފައި އޮތުމުގެ ސަބަބުން ލިބިދޭ ރައްކާތެރިކަމާ ގުޅޭގޮތުން ވެސް މައުލޫމާތުދޭނެ ކަމަށް އެމްއެމްޕީއާރުސީން ވިދާޅުވެއެވެ. އަދި ތަފާތު އެކި ތީމްތަކަށް ޚާއްސަކޮށްގެން ޕްރެޒެންޓޭޝަންތައް ދިނުމަށް ހަމަޖެހިފައިވާއިރު، އޭގެތެރޭގައި ވޯޓަރ ސްޕޯޓްސް، ރިލެކްސޭޝަން އެކްޓިވިޓީސް އަދި ރާއްޖޭގައި ކުރެވޭނެ އެކި ތަޖުރިބާތަކާއި ބެހޭގޮތުންވެސް މިސެޝަން ތަކުގައި މަޢުލޫމާތު ދޭނެއެވެ. އެޓޯ އާއެކު ކުރިއަށް ގެންދާ މި ސެޝަންތަކުގައި 3500 އެޖެންޓުން ބައިވެރިވާނެއެވެ.
ރަޝިއާ މާކެޓްގައި ދިވެހި ރާއްޖެ އިޝްތިޙާރުކުރުމުގެ ގޮތުން ގިނަ ހަރަކާތްތަކެއް މިއަހަރުގެ މިހާތަނަށް ވަނީ ކުރިއަށް ގެންގޮސްފައެވެ. އެގޮތުން މީޑިއާ ފެމިލިއަރައިޒޭޝަން ޓްރިޕާއި މޮޔާ ޕްލެނެޓާ ޓީވީ ޝޫޓްގެ އިތުރުން ނެޝަނަލް ޖިއޮގްރަފިކް ރަޝިއާ ފޮޓޯ ޝޫޓް ހިމެނެ އެވެ. މީގެއިތުރުން އެމްއެމްޕީއާރުސީން ވަނީ ރަޝިއާގެ އެންމެ ބޮޑު ޓްރެވެލް ޓްރޭޑް ޝޯ ކަމުގައިވާ މޮސްކޯ އިންޓަނޭޝަނަލް ޓްރެވަލް ޓްރޭޑް ފެއާ (އެމް.އައި.ޓީ.ޓީ) ގައި ބައިވެރިވެފައެވެ. އަދި މި އިވެންޓްގައި ދިވެހި ރާއްޖެވަނީ 'ބެސްޓް އައިލެންޑް ޕްރެޒެންޓޭޝަން' ގެ އެވޯޑާއި ބްރައިޓް އެގްޒިބިޓިން އެވޯޑް ހޯދާފައެވެ.
މިނިސްޓްރީ އޮފް ޓޫރިޒަމްގެ ތަފާސް ހިސާބުތައް ދައްކާގޮތުން ރަޝިއާއަކީ މިހާރު ދެވަނައަށް އެންމެ ގިނަ އަދަދަކަށް ފަތުރުވެރިން ރާއްޖެއަށް ޒިޔާރަތްކުރަމުން އަންނަ ގައުމެވެ.