ރޯދަމަހާއެކު އެންމެ ޑިމާންޑު ބޮޑުވާ ބާވަތްތަކުގެ ތެރޭގައި ކަރާ ހިމެނެއެވެ. ރޯދައަށް ކުރިއާލައި ރާއްޖޭގެ އެކި ރަށްތަކުން ކަރާ ހެއްދުމުގެ މަސައްކަތްކުރެއެވެ. އަދި ރޯދަމަހަށް މާލެއަށް ގިނަ އަދަދެއްގެ ކަރާ މާލޭގެ ބާޒާރަށް ފޮނުވައެވެ. ރޯދަމަހުގެ ފުރަތަމަ ދުވަހުވެސް މާލޭގެ ބާޒާރުމަތީ ރާއްޖޭގެ އެކި ހިސާބުތަކުން ގެނެސްފައިވާ ކަރާތަކުން ވަނީ ފުރާލާފައެވެ.
ދަތުރުވެރިންގެ މާރުކޭޓަށް ބަލާލާއިރު، މިހާރު ލިބެން ހުރި ކަރާތަކުގެ ތެރޭގައި ގިނައީ ލާމު އަތޮޅުންނާއި، ހުވަދޫ އަތޮޅުން އަދި ހއ. އަތޮޅުން ގެނެސްފައިވާ ކަރާތަކެވެ. އެއް ރަށަކުން މާލޭ ބާޒާރަށް އެންމެ ގިނަ އަދަދަކަށް ކަރާ ގެންނަ ރަށަކީ ތޮއްޑޫއެވެ. އެހެންނަމަވެސް އެހެން މިއަހަރު އަދި އެރަށުން މާލެއަށް ކަރާ ފޮނުވަމުން ދަނީ ވަރަށް މަދުންނެވެ. އެރަށުން ވާހަކަ ދައްކާލި ދަނޑުވެރިއެއް ބުނީ ރޯދަޔަށް ހެއްދި ކަރާ ދަނޑުތަކުގެ ތެރެއިން އަދި ގިނަ ކަރާ ދަނޑުތަކުގެ ކަރާތަށް ދޮން ނުވާ ކަމަށެވެ.
އެހެންނަމަވެސް ކުރިއަށް އޮތް 2 ދުވަހު ކޮންމެވެސް ވަރަކަށް އެރަށުން މާލެއަށް ކަރާ ފޮނުވާނެ ކަމަށާއި، އެންމެ ރަނގަޅު އަދަދަކަށް ކަރާ ފޮނުވަން ފެށެން އަދި 3 ދުވަސް ނަގާނެ ކަމަށް އެރަށުން ވާހަކަދައްކާލި ދަނޑުވެރިން ހާމަކުރެއެވެ.
ތޮއްޑޫ ކަރާ ބާޒާރުން ފެންނަން ނެތުމުން އެލިބޭ ފަޅުކަން ބޮޑެވެ. އެހެންނަމަވެސް ކަރާ ލިބުމުގައި ދަތިކަމެއް ނެތްކަމަށް ތަކެތި ވިއްކާ ފަރާތްތަކުން ބުނެއެވެ.
ރާއްޖޭގެ އެކި ހިސާބުތަކުގެ އިތުރުން މިއަހަރުގެ ރޯދަމަހަށް ލަންކާއިންވެސްވަނީ ގިނަ އަދަދެއްގެ ކަރާ ރާއްޖެއަށް ގެނެސްފައެވެ. ކަރާގެ އަގުވެސް އެހެން އަހަރުތަކާއި އަޅާ ބަލާއިރު ހެޔޮކަން ފާހަގަކޮށްލެވެއެވެ. މިހާރު ބާޒާރުން ކަރާ ކިލޯއެއްގެ އަގު އުޅެނީ 20 ރުފިޔާއަށާއި 25 ރުފިޔާއާ ދެމެދުގެ އަގުތަކެއްގައެވެ.