މާލެ ސިޓީ ކައުންސިލްގެ ޑެޕިއުޓީ މޭޔަރުގެ މަޤާމަށް އިކޮޅު ކޯލިޝަނުން އިންތިޚާބު މެމްބަރުންގެ މެދުގައި ވާދަވެރިކަން ބޮޑުވެ ކެމްޕެއިން ފަށައިފިއެވެ.
މިމަހުގެ 10 ވަނަ ދުވަހު ބޭއްވި ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިޚާބުގައި މާލޭ ސިޓީގެ މޭޔަރު ހިމެނޭ ގޮތަށް ކައުންސިލްގެ 12 ގޮނޑި ކާމިޔާބުކޮށް މެޖޯރިޓީ ނަގާފަައިވަނީ އިދިކޮޅު ޕީޕީއެމް ޕީއެންސީންނެވެ. މާލެ ސިޓީ ކައުންސިލް މެންބަރުގެ އަދަދަކީ 19 އެވެ.
އިދިކޮޅުން ކޯލިޝަނުން ސިޓީ ކައުންސިލްގެ މެޖޯރިޓީ ނެގުމަށްފަހު މިހާރު އެންމެ ވާދަވެރިކަމެއް އޮތީ މާލޭގެ ޑެޕިއުޓީ މޭޔަރުކަމުގެ މަޤާމެވެ. މި މަޤާމަށް ޝައުގުވެރިކަން ފާޅުކޮށް މިހާތަނަށް ދެ ބޭފުޅަކު ވަނީ ރަސްމީކޮށް އެކަން އިއުލާންވެސް ކުރައްވާފައެވެ.
ޕީޕީއެމް ތެރެއިން މާލެ ސިޓީގެ ޑެޕިއުޓީ މޭޔަރުގެ މަޤާމަށް ވާދަވެރިކަން ބޮޑުވެފައިވަނީ ހުޅުމާލެ ދާއިރާއަށް އިންތިޚާބުވި ޕީއެންސީގެ ނާއިބް ރައީސް އިބްރާހިމް ޝުޖާއާއި، ވިލިމާލެ ދާއިރާގެ ގޮނޑި ކާމިޔާބު ކުރެއްވި ނަހުލާ އަލީ އާއި މާފަންނު ދެކުނު ދާއިރާގެ ގޮނޑި ކާމިޔާބު ކުރެއްވި އަބްދުﷲ ނާސިރުގެ މެދުގައެވެ.
މިބޭފުޅުންގެ ތެރެއިން ޝުޖާ ފިޔަވައި ދެން ތިއްބެވި ދެބޭފުޅުންވަނީ މަޤާމަށް ވާދަކުރައްވާނެކަން އިއުލާންކޮށްފައެވެ. މަޤާމުގެ ޝައުގުވެރިކަން ފާޅުކޮށް ނަހުލާ އާންމުކުރި ސިޓީގައި ބުނެފައިވަނީ ކުރިއަށް އޮތް ރިޔާސީ އިންތިޚާބު ޕީޕީއެމް އަށް ކާމިޔާބުކުރުމަށްޓަކައި ވޯޓުލާ އާބާދީގެ ދެ ބައި ކުޅަ އެއްބަޔަށް ވުރެ ބޮޑު ބައެއް ކަމަށްވާ އަންހެނުންނާއި ޒުވާނުންގެ ގިނަ ޢަދަދެއްގެ ވޯޓު ނެގުމަށްޓަކައި ޢިލްމީ، ޤާބިލް، ހިތްވަރުހުރި ކެރޭ އަންހެނަކަށް ޑެޕިއުޓީ މޭޔަރ ކަމުގެ ފުރުޞަތު ލިބިގެން ދިއުމަކީ ޕީޕީއެމްގެ ރައީސް ޢަބްދުﷲ ޔާމީން ޢަބްދުލް ޤައްޔޫމް އަދި ޕީޕީއެމުން ހިތްވަރުދެއްވާނެ ގޮތް ކަމުގައި ދެކޭކަމަށެވެ.
ނިމިދިޔަ ދައުރުގައި މާލެ ސިޓީ ކައުންސިލުގައި އަންހެނަކާއި ފިރިހެނަކު މާލެ ސިޓީގެ މޭޔަރު ކަމާއި ޑެޕިއުޓީ މޭޔަރުކަން ކުރައްވާފައިވާކަން ނަހުލާވަނީ ފާހަގަކުރައްވާފައެވެ.
Pls vote Nahula Ali for Male City Deputy Mayor pic.twitter.com/JKXRsRT5Fs
— Nahula Ali (@nahu_ali) April 16, 2021
ޑެޕިއުޓީ މޭޔަރުގެ މަޤާމަށް ޝައުގުވެރިކަން ފާޅުކޮށް އަބްދުﷲ ނާސިރު ކުރެއްވި ކުރެއްވި ޓްވީޓުގައި ވިދާޅުވީ ރައްޔިތުންނަށް ޚިދުމަތް ކުރުމަށް ރައްޔިތުން ދިން ފުރުސަތުގެ ބޭނުން އެންމެ ފުރިހަމަ ގޮތުގައި ހިފައި، ރައްޔިތުންގެ ހައްގުގައި ކުރަންޖެހޭ މަސައްކަތް ކުރުމަށް މޭޔަރު މުއިއްޒުގެ ފަހަތުގައި ޑެޕިއުޓީ މޭޔަރެއްގެ މަޤާމުގައި މަސައްކަތް ކުރެއްވުމަށް އޭނާގެ ތައްޔާރަށް ހުންނެވި ކަމަށެވެ.
Rayyithun ah khidhumai kurumah alhugandah Rayyithun dhin furusathu ge beynun emme furihama gothuga hifaa nan. Thiya beyfulhun ge haggu ga masakkathuga Allah ge vaagifulhaa eku @MMuizzu ge fahathuga deputy mayor akah vumuge shaugu verikan alhugandu eba gengulhen. @ProgressPartyMV
— Abdulla Nasir (@HarinsAllo) April 11, 2021
މިމަޤާމަށް ޕީއެންސީގެ ނާއިބް ރައީސް އިބްރާހިމް ޝުޖާ ވާދަކުރައްވާނެކަން ރަސްމީކޮށް އިއުލާން ކޮށްފައި ނުވިނަމަވެސް އޭނާއަށް ތާއީދު ކުރާ ޕީޕީއެމްގެ ސަޕޯޓަރުން ގެންދަނީ ސޯޝަލް މީޑިޔާގައި ކެމްޕެއިން ކުރަމުންނެވެ. ޝުޖާއަށް ތާއީދުކޮށް ކެމްޕެއިން ކުރަމުންދާ މީހުން ބުނަމުންދަނީ މި މަޤާމަށް އެންމެ ހައްގު ބޭފުޅަކީ ޝުޖާ ކަމަށެވެ.
މާލެ ސިޓީގައި ޕީޕީއެމްއަށް ލިބުނު ބޮޑު ކާމިޔާބާއިއެކު އިންތިޚާބުވި ބައެއް ކައުންސިލަރުންގެ މެދުގައި ޑެޕިއުޓީ މޭޔަރުގެ މަޤާމަށް ވާދަވެރިކަން ބޮޑުވެފައިވާއިރު ޕާޓީގެ ލީޑަރޝިޕުން މިހާތަނަށް މިކަމުގައި ވަކި އެއްޗެއް އަދި ބުނެފައި ނުވެއެވެ.