ނިމިދިޔަ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބާ ގުޅިގެން ޖުމްލަ 208 ޝަކުވާއެއް ލިބިފައިވާކަމަށް އިލެކްޝަން ކޮމިޝަނުން ވިދާޅުވެއްޖެއެވެ.
އިލެކްޝަން ކޮމިޝަނުން ބޭއްވި ނޫސްވެރިންގެ ބައްދަލުވުމުގައި އެ ކޮމިޝަންގެ ރައީސް އަޙްމަދު ޝަރީފް ވިދާޅުވީ، މިމަހުގެ 10ވަނަ ދުވަހު ބޭއްވި ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތް ކުރާ ކޮމެޓީތަކުގެ އިންތިޚާބުގެ ނަތީޖާއާއި ގުޅިގެން ޖުމްލަ 208 ޝަކުވާއެއް އެކޮމިޝަނަށް ހުށަހެޅިފައިވާކަމަށެވެ. އަދި އޭގެ ތެރޭގައި ގިނައީ އެއްވެސް ހެއްކެއްގެ މައްޗަށް ބިނާކުރުމެއްނެތި، މީހަކު ބުނި ބުނުމަކަށް ބަލައި ހުށަހަޅާފައިވާ ޝަކުވާތަކެއްކަމަށް ޝަރީފް ވިދާޅުވިއެވެ. މި ޝަކުވާތަކަށް ބެލުމަށްފަހު، 11 ފޮށްޓެއްގެ ނަތީޖާ އަލުން ޔަޤީންކުރުމަށްޓަކާ ކޮމިޝަންގެ ފަރާތުން ފުރިހަމަ ކުރަންޖެހޭ ކަންކަން ފުރިހަމަ ކުރާނެކަމަށް ޝަރީފް ވިދާޅުވިއެވެ.
ނަތީޖާ ޔަޤީންކުރުމަށް ނިންމާފައިވާ 11 ފޮށްޓަކީ ތ. މަޑިފުއްޓާއި، ދ. މީދޫއާއި، މިލައިދޫ އައިލެންޑް ރިސޯޓާއި، ލ. ކަލައިދޫއާއި، ދ. ރިނބިދޫއާއި، ޅ. އޮޅުވެލިފުއްޓާއި، މ. ރަތްމަންދޫއާއި، ތ. ދިޔަމިގިލީގައި ބެހެއްޓި ވޯޓު ފޮށްޓެއްގެ އިތުރުން، ގއ. އަތޮޅުގެ ރައްޔިތުން ވޯޓުލުމަށް މާލޭގައި ބެހެއްޓި ފޮށްޓަކާއި، މ. އަތޮޅުގެ ރައްޔިތުން ވޯޓުލުމަށްޓަކާ މާލޭގައި ބެހެއްޓި ފޮށްޓެކެވެ.
އިލެކްޝަން ކޮމިޝަންގެ ރައީސް ވިދާޅުވީ، ދާއިމީ ނަތީޖާ ކަށަވަރުކުރުމަށްޓަކާ މި 11 ފޮށީގެ ސެކިއުރިޓީ އުރަ 3 ކަނޑާ، ޝަކުވާތަކަށް އެޓެންޑްކުރުމުގެ މަސައްކަތް މާދަމާ ފަށާނެކަމަށެވެ. އަދި މިކަން ކުރާނީ ހުށަހަޅާފައިވާ ޝަކުވާތަކުގައި މަސްލަޙަތު ހިމެނޭ ކެނޑިޑޭޓުންނާއި ޕާޓީތަކަށްވެސް ދަޢުވަތުދީގެންކަމަށް ޝަރީފް ވިދާޅުވިއެވެ.
"މި 11 ފޮށީގެ ސެކިއުރިޓީ އުރަ 3ކަނޑައިގެން ޝަކުވާތަކަށް އެޓެންޑްކުރުމުގެ މަސައްކަތް މާދަމާ އަޅުގަނޑުމެން ފަށާނަން. މިކަން ކުރާނީ މަސްލަޙަތު ހިމެނޭ ކެނޑިޑޭޓުންނާއި، ޕާޓީތަކަށްވެސް ދަޢުވަތުދީ، އެބޭފުޅުންގެ ހާޒިރުގައި" ޝަރީފް ވިދާޅުވިއެވެ.
ލޯކަލް ކައުންސިލްތަކުގެ އިންތިޚާބާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ އިންތިޚާބު 2020ގެ ދާއިމީ ނަތިޖާ މާދަމާ އިޢުލާންކުރުމަށް އިލެކްޝަން ކޮމިޝަނުން ތައްޔާރުވަމުންދާއިރު، މިހާތަނަށް ވޯޓުފޮށިތަކުގެ 90 އިންސައްތަ ދާއިމީ ނަތީޖާ ކަށަވަރުކުރެވިފައިވާކަމަށް ޝަރީފް ވިދާޅުވިއެވެ. އަދި މާދަމާ ރޭ ދާއިމީ ނަތީޖާ އިޢުލާން ކުރަން ފަށާނެކަމަށާއި، ހުރިހާ ދާއިރާތަކެއްގެ ދާއިމީ ނަތީޖާ އިޢުލާންކޮށް ނިންމުމަށް ގާތްގަނޑަކަށް 3 ވަރަކަށް ދުވަސް ހޭދަވާނެކަމަށްވެސް ޝަރީފް ވިދާޅުވިއެވެ.