ރާއްޖޭގައި ދިގު މުއްދަތަކަށް ޗުއްޓީ ހޭދަކުރަން ބޭނުންވާ ފަރާތްތަކަށް އެފުރުސަތު ފަހިވެފައި އޮތުން މުޙިއްމު ކަމަށް މިނިސްޓަރ އޮފް ޓޫރިޒަމް ޑރ.އަބްދުﷲ މަޢުސޫމް ވިދާޅުވެއްޖެއެވެ.
ރާއްޖެއަށް އަންނަ ކޮންމެ ފަތުރުވެރިއަކަށްވެސް 30 ދުވަހުގެ އޮން އަރައިވަލް ވިސާ ލިބެއެވެ. މިއީ ފަތުރުވެރިންނަށް ލިބޭ ވަރަށް ބޮޑު ލުޔެކެވެ. އެހެން ނަމަވެސް ރާއްޖެއަށް އަންނަ ބައެއް ފަތުރުވެރިންނަކީ ރާއްޖޭގައި ދިގު މުއްދަތަކަށް ޗުއްޓީ ހޭދަކުރަން ބޭނުންވާ ފަރާތްތަކެވެ. މިފަރާތްތަކަށް މިހާރު އޮތް ހައްލަކީ އިމިގްރޭޝަނުން ޚާއްސަ ހުއްދައަކާއެކު ޗުއްޓީ އިތުރުކުރުމެވެ. އެހެން ނަމަވެސް މިއީ އެންމެ ފަސޭހަގޮތެއް ނޫނެވެ.
މިފަދަ ވިސާއެއް ތައާރަފް ކުރުމަށް އިމިގްރޭޝަންގެ ޤާނޫނަށް ގެންނަން ޖެހޭ އިސްލާޙްތައް ދިރާސާކުރުމުގެ މަސައްކަތް ކުރެވެމުންދާއިރު، މިއާއެކު ރާއްޖޭގެ ފަތުރުވެރިކަމަށް ގިނަ ކުރިއެރުންތަކެއް ލިބިގެންދާނެ ކަމަށް ޓޫރިޒަމް މިނިސްޓަރ ވިދާޅުވެއެވެ.
ޕީއެސްއެމް ނިއުސްއާއި ވާހަކަދައްވަމުން ޓޫރިޒަމް މިނިސްޓަރ ޑރ.ޢަބްދުﷲ މަޢުސޫމް ވިދާޅުވީ ރާއްޖޭގައި މިހާރު އެންމެ ގިނަ ދުވަހަށްވެސް ޓޫރިޒަމް ވިސާއެއްގައި ފަތުރުވެރިންނަަށް މަޑުކުރެވެނީ 3 މަސް ދުވަހަށް ކަމަށެވެ. އެހެންނަމަވެސް ގިނަ ދުވަހު ރާއްޖޭގައި ޓޫރިސްޓެއްގެ ގޮތުގައި އުޅެން ބޭނުންވާ ފަރާތްތަކަށް އެފުރުސަތު ހޯދައިދިނުމަށް މަސައްކަތްކުރެވެމުންދާ ކަމަށް މިނިސްޓަރ ވިދާޅުވިއެވެ.
" އާޓިސްޓުން، ވާހަކަ ލިޔާ މީހުން، އަދި ޓޫރިސްޓުންގެ ގޮތުގައި އައިއްސަ ހޮބީއެއްގޮތަށް އެކުރާ މަސައްކަތްކުރުމުގެ ފުރުސަތު އޮންނަން އެބަ ޖެހޭ، އެހެން ނަމަވެސް ރާއްޖޭގައި މަސައްކަތްކުރުމުގެ ޖާގައެއް ނުދޭނެ މި ފަދަ ވިސާއެއްގައި އައިސް" މިނިސްޓަރ ވިދާޅުވިއެވެ.
މި ވިސާގެ ބޭނުން އުމުރުން ދުވަސްވީ ފަތުރުވެރިންނަށް މުޙިއްމު ކަމަށާއި، ސަބަބަކީ އެފަދަ ފަތުުރުވެރިންނަކީ އެއް ތަނެއްގައި ގިނަ ދުވަހު ތިބެން ބޭނުންވާ ފަރާތްތަކަށްވާތީ ކަމަށް މިނިސްޓަރ ޑރ.ޢަބްދުﷲ މަޢުސޫމް ވިދާޅުވިއެވެ. މިނިސްޓަރ ވިދާޅުވީ މި ވިސާގެ މުއްދަތުތައް ކަނޑައެޅުމުގެ މަސައްކަތްތައް މިހާރު އިމިގްރޭޝަނުން ކުރަމުންދާކަމަށެވެ.
" އެންމެ ދިގު މުއްދަތަކަށް ރާއްޖެއަށް އަންނަ ފަތުރުވެރިންނަށް 270 ދުވަސް ރަނގަޅުވާނެ ކަމަށް ދެކެން، އެކަމަކު 6 މަސްވެސް ރަނގަޅު، ތިން މަހަށް ފަހު އިތުރު 90 ދުވަސް ލިބުންވެސް ރަނގަޅު،" މިނިސްޓަރ މަޢުސޫމް ވިދާޅުވިއެވެ.
މިނިސްޓަރ ވިދާޅުވީ ރާއްޖެއަށް ދިގު މުއްދަތަކަށް އަންނަ ފަތުރުވެރިން އުޅޭ ނޫޅޭގޮތް މޮނީޓަރ ކުރާނެ ކަމަށެވެ. އަދި ވިސާގައި ރާއްޖޭގައި ޗުއްޓީ ހޭދަކުރުމުގެ ބަދަލުގައި ވަޒީފާ އަދާކުރާތޯވެސް ބަލާނެ ކަމަށެވެ.
ވިސާއާއި ގުޅޭ ޤާނޫނަށް އިސްލާޙްތަކެއް ގެނައުމުގެ މަސައްކަތް އިމިގްރޭޝަނުން މިހާރު ފަށާފައިވާއިރު، އެކަމާއި ގުޅިގެން ބައެއް ދިރާސާތައް ކުރަމުން އަންނަކަމަށްވެސް އިމިގްރޭޝަނުން ވިދާޅުވެއެވެ.