ރާއްޖޭގެ ދަނޑުވެރިކަމުގެ ސިނާއަތް ކުރިއެރުވުމަށް ސަރުކާރުން އުފެއްދި ކުންފުނި، އެގްރޯ ނެޝަނަލް ކޯރޕަރޭޝަނަށް އެއް އަހަރު ފުރިފައިވާއިރު، މި ކުންފުނިން މިވަނީ ގިނަ ކާމިޔާބީތަކެއް ހޯދާފައެވެ.
ހުސްވި އަހަރުތެރޭ ކޯވިޑާއި ގުޅިގެން ރާއްޖެއަށް އިޤްތިސާދީގޮތުން ގިނަ ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައި އެގްރޯ ނޭޝަނަލް ކޯރޕަރޭޝަންގެ ނަމުގައި ދަނޑުވެރިކަމަށް ޙާއްސަ ކުންފުންޏެއް ސަރުކާރުން އުފެއްދެވީ ދަނޑުވެރިކަމުގެ އުފެއްދުންތައް އިތުރުކޮށް، އިމްޕޯޓަށް ބަރޯސާ މިންވަރު ކުޑަކުރަށެވެ. އަދި ދަނޑުވެރިކަމުގެ އުފެއްދުންތަކަށް ހަމައަގު ހޯދައިދީ މާކެޓްކުރުމަކީވެސް އެގްރޯނެޓުގެ ނަމުގައި ކުންފުންޏެއް އުފެއްދުމުގެ ބޭނުމެކެވެ. އެގްރޯނެޓަށް އެއް އަހަރު ފުރިފައިވާއިރު، މިއަމާޒާއި ހަމައަށް ވާސިލްވުމަށް ކުރެވުނު މަސައްކަތްތަކަށް ބަލާލުން މުޙިއްމެވެ.
ޕީއެސްއެމް ނިއުސްއަށް ދެއްވި ޙާއްސަ އިންޓަރވިއުއެއްގައި އެގްރޯނެޓްގެ މެނޭޖިންގ ޑިރެކްޓަރ ހާރޫން ރަޝީދު ވަނީ އެކުންފުނިން މިފާއިތުވީ އެއްއަހަރު ދުވަސްތެރޭ ކުރިއަށް ގެންގޮސްފައިވާ މަސައްކަތްތަކުގެ ތަފްސީލްތައް ހިއްސާކޮށްފައެވެ.
އެގްރޯ ނެޓާއި ގުޅިގެން "ކޮންޓްރެކްޓް ފާމިން" މަސައްކަތް ކުރަން ބޭނުންވާ ފަރާތްތައް ހޯދުމަށް މިދިޔަ އަހަރުގެ ޖުލައިމަހު އިޢުލާންކުރުމާއެކު، ގިނަ އަދަދެއްގެ ބަޔަކު ޝައުގުވެރިކަން ފާޅުކުރިއެެވެ.
އެގްރޯ ނެޝަނަލް ކޯޕަރޭޝަންގެ ފަރާތުން ކުރިއަށްގެންދާ "ކޮންޓްރެކްޓް ފާމިން"ގެ ދަށުން އެއްބަސްވުންތައް ޤާއިމްކޮށް ދަނޑުވެރިންނަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދީ އެފަރާތްތަކުން ހައްދާ ތަކެތި ދާއިމީކޮށް އެ ކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބިގެންދާނެއެވެ. އަދި ދިވެހި ދަނޑުވެރިންގެ އުފެއްދުންތަކަށް ހަމައަގު ލިބިގެންދާނެއެވެ.
ހާރޫން ރަޝީދު ވިދާޅުވީ މިހާތަނަށް އެކުންފުންޏާއެކު މަސައްކަތް ކުރުމަށް ޝައުގުވެރިކަން ފާޅުކުރި 1500 އަށްވުރެ ގިނަ ދަނޑުވެރިންގެ ތެރެއިން 787 ދަނޑުވެރިންނާއެކު އެއްބަސްވުމާއި ހިސާބަށް ދެވިފައިވާ ކަމަށެވެ. އަދި މީގެތެރެއިން ތެރެއިން 500 އެއްހާ ދަނޑުވެރިންނާއެކު މަސައްކަތް ފެށިފައިވާކަންވެސް ހާރޫން ވިދާޅުވިއެވެ.
އެއްބަސްވުން ޤާއިމްކޮށްފައިވާ ދަނޑުވެރިންނާއެކު އެގްރޯނެޓުން ދަނީ 17 ބާވަތެއް ހެއްދުމުގެ މަސައްކަތްކުރަމުންނެވެ. އެ 17 ބާވަތަކީ ބަރަބޯ، ފަތްކެޔޮ، ބަށި، މެލަން، ފަޅޯ، ކަރާ، ބަޓަރ ނަޓްސް، ޓޮމާޓޯ، ކިއުކަމްބާ، ޗިޗަންޑާ، ތޮރާ، މާމިއާ ތޮޅި، ބީންސް، ކެޕްސިކަމް، ލެޓިއުސް، ކެބެޖް، ޗައިނީސް ކެބެޖްއެވެ.
ހާރޫން ވިދާޅުވީ މީގެތެރެއިން މިހާރު ގިނަ ބާވަތްތަކެއް ބާޒާރަށް ނެރެފައިވާ ކަމަށެވެ.
"އުފެއްދި ތަކެތި ގަތުމުގެ މަސައްކަތް ކުރަމުން މިދަނީ، 26780 އަށްވުރެ ގިނަ ކިލޯގެ ދޮންކެޔޮ، މެލަން 450 ކިލޯ، ޕަމްޕްކިން 350 ކިލޯ މިހެން ގޮސް ބައިވަރު އެއްޗެހި ގަނެވިއްޖެ މިހާތަނަށް، އިތުރަށްވެސް ލިބެން އެބަހުރި،" ހާރޫން ވިދާޅުވިއެވެ.
ހާރޫން ވިދާޅުވީ އެގްރޯނެޓްއާއެކު ދަނޑުވެރިންނަށް އާ އުއްމީދެއް ލިބިއްޖެކަމަށެވެ. އަދި އެގްރޯނެޓްއާއި ގުޅިގެން މަސައްކަތްކުރަން ބޭނުންވާ ފަރާތްތަކަށް ކަންތައްތައް ފަހިކޮށްދިނުމަށް ކައުންސިލްތަކުގެ އެއްބާރުލުން ވަރަށް ބޮޑަށް ބޭނުންވާކަމަށް ހާރޫން ވިދާޅުވިއެވެ.
"ކައުންސިލްތަކުން ރައްޔިތުންނަށް މިމަސައްކަތްކުރުމަށް ބޭނުންވާ ކަންތައްތައް ފަސޭހައިން އިންތިޒާމް ކޮށްދެއްވައި، މިމަސައްކަތުގައި އެއްމެން ގުޅިގެން އެބަޖެހޭ ކުރިއަށްދާން، މިއީ ވަރަށް ބޮޑު ނަފާއެއް ލިބޭނެ މަސައްކަތަތެއް" ޙާރޫން ވިދާޅުވިއެވެ.
އެގްރޯނެޓުން ދަނޑުވެރިންގެ އަތުން ގަންނަ ތަކެތި މާކެޓުކުރުމަށްވެސް ދަނީ ގިނަ މަސައްކަތްތަކެއް ކުރަމުންނެވެ. އެގޮތުން ރިސޯޓުތަކާއެކު މަޝްވަރާކުރެވެމުންދާކަމާއި މިހާރު ބައެއް ރިސޯޓުތަކަށް ދަނޑުވެރިންގެ އުފެއްދުންތައް ސަޕްލައި ކުރަމުންދާ ކަމަށެވެސް އެގްރޯނެޓުން ހާމަކުރެއެވެ.