ރާއްޖޭގައި ޗުއްޓީ ހޭދަކުރަން އަންނަ ފަތުރުވެރިންނަށް ވެކްސިން ދިނުމުގެ ޕްރޮގްރާމް މިއަހަރުގެ 3ވަނަ ކުއާޓަރުގައި ފެށޭނެކަމަށް ލަފާކުރެވޭކަމަށް ޓޫރިޒަމް މިނިސްޓަރ ޢަބްދުﷲ މަޢުސޫމް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ސީއެންއެންއަށް ދެއްވި އިންޓަރވިއުއެއްގައެވެ.
ފަތުރުވެރިންނަށް އަމާޒްކޮށްގެން ރާއްޖެއިން ފެށުމަށް ތައްޔާރުވަމުންދާ 3ވީ ޕްރޮގްރާމް "ވިޒިޓް، ވެކްސިނޭޓް، ވެކޭޝަން" ޕްރޮގްރާމްގެ ވާހަކަ ވަނީ ދުނިޔޭގެ އެކި ހިސާބުތަކުގެ މީޑިއާގެ ސަމާލުކަމަށް އައިސްފައެވެ. މިވާހަކަ ދުނިޔޭގެ މަޝްހޫރު ޓީވީ ޗެނަލް، ސީއެންއެންގެ ސަމާލުކަމަށް އައިސް މިކަމާއި ގުޅޭގޮތުން ޓޫރިޒަމް މިނިސްޓަރ ޑރ.ޢަބްދުﷲ މަޢުސޫމާ ވަނީ އިންޓަރވިއު ކޮށްފައެވެ.
ސްކައިޕް މެދުވެރިކޮށް ކުރިއަށްދިޔަ މި އިންޓަރވިއުގައި 3 ވީ ޕްރޮގްރާމާ ގުޅޭގޮތުން މަޢުލޫމާތުދެއްވަމުން ޓޫރިޒަމް މިނިސްޓަރ ވިދާޅުވީ މި ޕްރޮގްރާމް ފަށާނީ ރާއްޖޭގެ އާބާދީގެ އެންމެންނަށް ވެކްސިންދީ ނިމުމުން ކަމަށެވެ.
"އެންމެ ފުރަތަމަ އިސްކަމެއް ދެނީ ރާއްޖޭގެ އެންމެންނަށް ވެކްސިން ދިނުމަށް، މީގެތެރޭގައި ރާއްޖޭގައި މަސައްކަތްކުރާ ބޭރު މީހުންވެސް ހިމެނޭ. މިހާރު ރާއްޖޭގައި ވެކްސިން ދިނުމުގެ މަސައްކަތްކުރިއަށްދާގޮތަށް ބަލާއިރު، މިއަހަރުގެ ތިންވަނަ ކުއާޓަރުގައި ލަސްވެގެން، 3ވީ ޕްރޮގްރާމް ފެށޭނެކަމަށް ލަފާކުރެވޭ." މިނިސްޓަރ މަޢުސޫމް ވިދާޅުވިއެވެ.
މި ޕްރޮގްރާމް ކުރިއަށްގެންދަން ރާވާފައިވާ ގޮތުގެ އިތުރު ތަފްސީލްދެއްވަމުން މިނިސްޓަރ މަޢުސޫމް ވިދާޅުވީ، މި ޕްރޮގްރާމްގެ މައިގަނޑު ބޭނުމަކީ ފަތުރުވެރިކަމުގެ ތެރެއިން އިތުރު ވިޔަފާރިއެއް ފެށުން ނޫން ކަމަށެވެ. މިއީ ރާއްޖެއަށް އަންނަ ފަތުރުވެރިންނަށް ޝުކުރު އަދާކުރުމުގެ ގޮތުން ފަށަން ގަސްދުކުރާ ޕްރޮގްރާމެއް ކަމަށެވެ.
" މި ޕްރޮގްރާމް އަމާޒުކުރަން ބޭނުންވަނީ ރާއްޖެއަށް އަންނަ ބޭނުންވެ، ނާދެވެފައިތިބި ފަތުރުވެރިންނަށް، އަދި ވެކްސިންގެ 2 ޑޯޒް ފުރިހަމަކުރަންވެސް މުއްދަތެއް ބޭނުންވާއިރު، ރާއްޖެ އައިސް އޮންލައިންކޮށް މަސައްކަތްކުރާ ފަރާތްތަކަށްވެސް މި ޕްރޮގްރާމް ކަމުދާނެ ކަމަށް ޤަބޫލްކުރެވޭ،" މިނިސްޓަރ ވިދާޅުވިއެވެ.
މިނިސްޓަރ މަޢުސޫމްވަނީ ކޯވިޑް-19އާ ގުޅިގެން ރާއްޖޭގެ ފަތުރުވެރިކަމަށް ކުރި އަސަރުތަކުގެ މަޢުލޫމާތުތައްވެސް ޙިއްސާކޮށްފައެވެ. އަދި މިކަމުން އަރައިގަތުމަށް ސަރުކާރުން ކުރަމުންދާ މަސައްކަތްތަކުގެ ތަފްސީލްވެސް މިނިސްޓަރ ޙިއްސާކުރެއްވިއެވެ.