ކުރުނބާ ފެނަކީ އާއްމުންގެ މެދުގައި މަޤްބޫލް އެއްޗެއް ކަމަށްވާއިރު، ކުރުނބާއިން ފެން ނެގުމަށް ކުރަން ޖެހެނީ ބުރަ މަސައްކަތެކެވެ. އަދި މިކަމަށް ފަރިތަ ނޫން މީހަކަށް މިއީ ކުރަން އުނދަގޫ މަސައްކަތެކެވެ. ކުރުނބާ ހެދުމަށް ދިވެހިން ޒަމާނުއްސުރެ ބޭނުންކުރަމުން އައިސްފައިވަނީ އެއް 'ޓެކްނީކް' އެކެވެ. މިކަން ކުރުމަށް ބޭނުންކުރަނީ ތޫނު ބޮޑު ވަޅިއެކެވެ. މިއީ ވަގުތު ހޭދަވާ ގިނައިން އެމަސައްކަތްކުރަން ޖެހޭ ފަރާތްތަކުގެ އަތުގައި ފޮޅުލައި މަސައްކަތެކެވެ.
ރޯދަމަހާއެކު ކުރުނބާއަށް އޮންނަ ޑިމާންޑު ބޮޑުވާއިރު، ކުރުނބާއިން ފެން ނެގުމަށް ކުރުންޖެހޭ ބުރަ މަސައްކަތް ފަސޭހަކޮށްދޭ މެޝިނެއް މިހާރު ދަތުރުވެރިންގެ މާރުކޭޓުގެ ގޮޅިއެއްގައި ބޭނުންކުރާ ތަން ފެނެއެވެ.
މި މެޝިންގެ ފަރުމާ ކުރުންވެސް ވަރަށް ހިތްގައިމެވެ. މި މެޝިން ބޭނުންކުރާ ގޮޅީގެ ވެރިޔާ ދ.މާއެނބޫދޫ އަޙުމަދު ނާޒިމް ބުނީ މި މެޝިނަކީ އެނާ އަމިއްލައަށް ހަދާފައިވާ އެއްޗެއް ކަމަށެވެ.
" ރަޙުމަތްތެރިއެއްގެ ވޯކްޝޮޕަށްގޮސް މި މަސައްކަތްކުރީ، އޭނަގެވެސް އެހީތެރިކަން ލިބުނު، އަމިއްލަ ޑިޒައިނެއް މިއީ،" ނާޒިމް ބުންޏެވެ.
ނާޒިމްއަކީ ކުރިން ވެލްޑިން މަސައްކަތް ކުރި ފަރާތެކެވެ. އެހެން ކަމުން މިފަދަ ކަންތައްތައް ކުރުމުގެ ތަޖްރިބާ އޭނާގެ ހުއްޓެވެ. އޭނާވަނީ ގޮޅީގައި ބޭނުންކުރުމަށް ކުރުނބާ ފަޅާ މެޝިނެއްވެސް ހަދާފައެވެ. މިއީ ކުރުނބާގެ ހެވާ ނެގުމަށެވެ. ނާޒިމް މި ރޯދައަށް ހެދި ކުރުނބާ ފެން ނަގާ މެޝިންގެ މަސައްކަތްކޮށްފައިވަނީ އޭނާ އަމިއްލައަށެވެ. އަދި އެފަދަ މެޝިނެއް ހަދަން އެހާ ބޮޑު ޙަރަދެއް ނުދާ ކަމަށްވެސް ނާޒިމް ބުންޏެވެ.
" 3000 ނޫނީ 4000 ވަރަކަށް ރުފިޔާ ދިޔައީ، ތިރީގައިން ސްޓޭންޑަކީ ކޮފީ ގޮނޑިއެއްގެ ބައެއް، މޮޑިފައިކޮށްލާފަ ހެދީމަ ނުދާނެ އެހާ ބޮޑު ޙަރަދެއް، ދެންވެސް ބޭނުންކޮށްފައި އެ ހުރީ ވޯކް ޝޮޕްގައި ލިބެން ހުރި ތަކެތި،" ނާޒިމް ބުންޏެވެ.
ނާޒިމް ބުނީ ޔޫޓިއުބް އިން މިފަދަ މެޝިންތައް ފެނިފައި ހުރި ކަމަށާއި އެހެން ނަމަވެސް ފަރުމާ ކުރުންތައް ކުރަޙާ ހަދާފައި ނުވާ ކަމަށެވެ. އަދި އެއްޗެހި ލިބެން ހުރި ގޮތަކަށް ބަލާ މެޝިންގެ މަސައްކަތް ކުރިއަށް ގެންގޮސްފައިވާ ކަަމަށް ނާޒިމް ބުންޏެވެ.
ނާޒިމްގެ މި އުފެއްދުމަށް ގިނަ ބައެއް ސަމާލްކަން ލިބެމުންދާއިރު، މާރުކެޓްގައި ކުރުނބާ ވިއްކާ ގިނަ އަދަދެއްގެ ބަަޔަކުދަނީ މިފަދަ މެޝިނެއް ހަދާދިނުމަށް އޭނާ ކައިރީ އެދެމުންނެވެ. އެހެން ނަމަވެސް މިދުވަސްކޮޅު ވަގުތު ދެވެން ނެތުމުން އަދި އެފަދަ ކަމަކާއި ނޫޅެވޭ ކަމަށް ނާޒިމް ބުންޏެވެ.
މަސައްކަތްތައް ލުއިކޮށްދޭ މިފަދަ ދިވެހި އުފެއްދުންތައް މަދުން ނަމަވެސް ފެންނަން އެބަހުއްޓެވެ. ނާޒިމްގެ މި އުފެއްދުމުންވެސް ހާމަވަނީ ކުޑަ ޙަރަދާއި އެކުވެސް މިފަދަ މެޝިންތައް ހަދާލެވޭނެ ކަމެވެ.