އެސްޓީއޯއިން ވިއްކާ ފިޔާގެ އަގު ހެޔޮކޮށްފިއެވެ.
އެސްޓީއޯއިން ވަނީ ފިޔާ ބަސްތާއެއްގެ އަގު 100ރ އަށް ތިރިކޮށްފައެވެ. ކުރިން އެސްޓީއޯއިން ފިޔާ ބަސްތާއެއް ވިއްކާފައިވަނީ 200ރ އަށެވެ.
މިއާއެކު ފިޔާގެ ރީޓެއިލް އަގަށްވެސް ވަނީ ބަދަލު ގެނެސްފައެވެ. މިހާރު އެސްޓީއޯއިން ފިޔާ ކިލޯއެއް ވިއްކަމުންދަނީ 4.50ރ އަށެވެ. ކުރިން ފިޔާ ކިލޯއެއް އެސްޓީއޯއިން ވިއްކާފައިވަނީ 9.50ރ އަށެވެ.
އެސްޓީއޯއިން ބުނީ ފިޔާގެ އަގު ހެޔޮކޮށްފައިވަނީ ފިޔާގެ ރަނގަޅު ސްޓޮކެއް ލިބިފައި ހުރުމުން ވީހާވެސް ގިނަ ބަޔަކަށް ގަނެވޭނެ ފަދަ އިންތިޒާމެއް ހަމަޖެއްސުމަށް ކަމަށެވެ.
ކޮންމެ އަހަރެއްގެވެސް ރަމަޟާންމަހަށް އަމާޒުކޮށް އެސްޓީއޯއިން ފިޔާ، ބިސް އަދި އަލުވި ޚާއްސަ އަގުތަކެއްގައި ވިއްކައެވެ. އެގޮތުން އެސްޓީއޯއިންދަނީ އަލުވި ކިލޯއެއް 9 ރުފިޔާއަށް، އަދި ބިހެއް 1.40ރ އަށް ވިއްކަމުންނެވެ.
އެސްޓީއޯ ސުޕަމާރޓް ހޯލްސޭލް ސެންޓަރުން އަލުވި ބަސްތާއެއް 185ރ އަށް ވިއްކާއިރު ބިސް ކޭހެއް 265ރ އަށް ލިބެން ހުންނާނެކަމަށް އެސްޓީއޯއިން މަޢުލޫމާތުދެއެވެ.
އެސްޓީއޯއިން ބުނީ އެސްޓީއޯއިން ވިއްކާ ފިޔާ، އަލުވި އަދި ބިސް ގަތުމުގެ ކުރިން މިތަކެތި ޗެކުކުރެވޭނެ އިންތިޒާމު މިއަހަރު އެސްޓީއޯގެ ފިހާރަތަކުން ހަމަޖައްސާފައިވާނެކަމަށެވެ. އަދި އެސްޓީއޯ ޓްރޭޑް ސެންޓަރުގައި ހުންނަ އެސްޓީއޯ ސުޕަމާޓުން ރީޓެއިލްކޮށް މިތަކެތި ލިބޭނެ އިންތިޒާމް ހަމަޖައްސާފައިވާއިރު، އެސްޓީއޯ ސުޕަމާޓް ހޯލްސޭލް ސެންޓަރުން ހޯލްސޭލްކޮށްވެސް މިތަކެތި ވިއްކާނެކަމަށް އެސްޓީއޯއިން މަޢުލޫމާތުދެއެވެ.