އަހަރެންގެ ބޭންކު ކޮމިއުނިޓީ ފަންޑުގެ ދަށުން ގދ. ހޯނޑެއްދޫގައި ނޭޗަރ ޕާކެއް ތަރައްގީކޮށްފިއެވެ.
ހޯނޑެއްދޫގެ އިރު އުތުރު ޗަސްބިން ސަރަހައްދުގައި ދިގެމައްކޮޑަ ގެ ނަމުން ނަންދެވިފައިވާ މި ނޭޗަރ ޕާކް މިހާރު އާއްމުންނަށް ހުޅުވާލާފައެވެ. މިތަނުގެ މަސައްކަތް ކޮށްފައިވަނީ ހޯނޑެއްދޫ ސްޕޯޓްސް އިންނެވެ.
ބޭންކް އޮފް މޯލްޑިވްސް، ބީއެމްއެލުން ވިދާޅުވީ، މިއީ އެ ސަރަހައްދުގެ ޤުދުރަތީ ރީތިކަން ޢާއްމުންނަށް ފަސޭހައިން ބަލާލައި ހިތްހަމަޖައްސާލާނެ މާޙައުލެއް ޤާއިމްކޮށްދިނުމުގެ އިތުރުން ގުދުރަތީ ރީތިކަން އަންނަން އޮތް ޖީލުތަކާ ހަމަޔަށް ރައްކާތެރިކުރުމުގެ މުހިންމުކަމާ ގުޅޭ ގޮތުން އާންމުން ހޭލުންތެރިކުރުވުމުގެ މަގްސަދުގައި ކުރިއަށް ގެންދިޔަ މަޝްރޫއެއް ކަމަށެވެ.
މި ސަރަހައްދުގައި 85 ފޫޓުގެ ދިގު ވޯކްވޭއެއްގެ އިތުރުން ވިއުވިންގ ޕްލެޓްފޯމެއް ގާއިމްކޮށްފައެވެ. މީގެ އިތުރުން މި ސަރަހައްދުގައި ބެންޗް ބަހައްޓައި، ބާބަކިއު ހެދޭނެ އިންތިޒާމްވެސް ވަނީ ހަމަޖައްސާފައެވެ. މަސްކެނޑުމަށް ހާއްސަ ތަނަކާއިއެކު މި ސަރަހައްދަށް ސާފުތާހިރުކޮށް ބަލަހެއްޓުމަށް ތަނަން ޒިޔާރަތްކުރާ މީހުންނާއި ތަނަށް ޖަމާވާ ކުނި ނައްތާލުމަށް ޑަސްބިންތައްވެސް ވަނީ ބަހައްޓާފައެވެ.
މި ސަރަހައްދަކީ ތިމާވެއްޓާއި ރައްޓެހި ސަރަހައްދަކަށް ހެދުމުގެ ގޮތުން މި ސަރަހައްދު ފެހިކުރުމަށް ގިނަ އަދަދެއްގެ ގަސްވެސް ވަނީ އިންދާފައެވެ.
އަހަރެންގެ ބޭންކު ކޮމިއުނިޓީ ފަންޑުންގެ ދަށުން ހޯނޑެއްދޫގައި ނޭޗަރ ޕާކެއް ތަރައްޤީކުރަން ޕްރޮޕޯސަލް ހުށައަޅާ ކާމިޔާބު ކުރީ މަހްދޫން އާދަމްއެވެ. އޭނާ ބުނީ މި މަސައްކަތުގައި އެންމެ އިސްކަމެއް ދިނީ މި ސަރަހައްދުގެ ގުދުރަތީ ރީތި ކަމަށް ބަދަލު ނާންނާނެހެން ސަރަހައްދަށް އެއްވެސް ގެއްލުމެއް ނުލިބޭނެ ގޮތް ބަލައިގެން މަސައްކަތްތައް ކުރިއަށް ގެންދިޔުމަށެވެ.
" މި ސަރަހައްދަކީ ހޯނޑެއްދޫގެ ރައްޔިތުންގެ އިތުރުން ކޯސްވޭއަކުން ގުޅާލެވިފައިވާ މަޑަވެލީގެ ރައްޔިތުންނަށްވެސް ބޭނުން ކުރެވޭނެހެން ތަރައްގީކޮށްފައިވާ ސަރަހައްދެއް. އަޅުގަނޑުމެންގެ އުއްމީދަކީ މި ތަނުގެ ފައިދާ ދެ ރަށުގެ ރައްޔިތުންނަށްވެސް ލިބިގެންދިޔުން. މި މަސައްކަތުގައި ބައިވެރިވި ހޯނޑެއްދޫގެ އެންމެހާ ރައްޔިތުންނަށް ޝުކުރު ދަންނަވަން."
އަހަރެންގެ ބޭންކް ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކާއި ތައުލީމާއި ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ.