މިއަހަރުގެ އޭޕްރީލްމަހުގެ ނިޔަލަށް މިފްކޯއަށް ކިރާފައިވާ މަހުގެ އަދަދު ހުސްވި އަހަރުގެ މި މުއްދަތާއި އަޅާބަލާއިރު ވަރަށް ބޮޑަށް އިތުރުވެފައިވާ ކަމަށް މިފްކޯގެ ސީއީއޯ އިސްމާޢިލް ފައުޒީ ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން އިސްމާޢިލް ފައުޒީ ވިދާޅުވީ މިދިޔަ އަހަރުގެ އޭޕްރީލްއާ ހަމައަށް މިފްކޯއަށް ކިރާފައިވަނީ 15000 ޓަނު ކަމަށެވެ. އެހެން ނަމަވެސް މިއަހަރުގެ މި މުއްދަތުގައި މިފްކޯއަށް 22766 ޓަނުގެ މަސް ކިރުވާފައިވާ ކަމަށް އިސްމާޢިލް ވިދާޅުވިއެވެ.
" އެހެންވީމަ މަސްވެރިންނަށް 353 މިލިއަން ރުފިޔާ ދެވިއްޖެ، މަސް އެބަ ކިރޭ، އިތުރު 7000ޓަނުގެ މަސް މިދިޔަ އަހަރުގެ މި މުއްދަތާއި އަޅާ ބަލާއިރު މިއަހަރު ގަނެވިއްޖެ، ވަރަށް ރަނގަޅު މަސްވެރިކަމެއް،" އިސްމާޢިލް ވިދާޅުވިއެވެ.
މަސްވެރިކަން ރަނގަޅުވާ ދުވަސްވަރު މިފްކޯގެ ކެޕޭސިޓީތައް ފުރި މަސް ކިރުވުމަށް ގޮންޖެހުންތަކާއި ކުރިމަތިލާން ޖެހެއެވެ. އެގޮތުން މިދުވަސްވަރު ރާއްޖޭގެ ދެކުނުގެ މަސްވެރިކަން އާދަޔާ ޚިލާފަށް ރަނގަޅުވެ، ދެކުނުގެ ބޯޓުތަކާއި ސެންޓަރުތަކަށް ރާއްޖޭގެ ހުރިހާ ހިސާބެއްގެ ދޯނިތައް މަސް ކިރުވަމުންދިޔުމާއި އެކު، މިފްކޯގެ ފްރީޒިން ކެޕޭސިޓީތައް ފުރި މިހާރު މިފްކޯއިން މަސް ގަންނަމުންދަނީ ކޮންޓްރޯލް ރޭޓެއްގައެވެ.
ނަމަވެސް މިފަދަ ކަންތައްތަކަށް ހައްލު ހޯދުމަށްވެސް މިފްކޯއިން ދަނީ މަސައްކަތްކުރަމުންނެވެ. އެގޮތުން މިފްކޯގެ ސެންޓަރުތައް ތަރައްޤީކުރުމުގެ މަޝްރޫޢުތައް ފެށުމަށް ދަނީ ތައްޔާރުވަމުންނެވެ. މިއާއެކުވެސް މަސް ކިރުވުމަށް ދިމާވެފައިވާ ދަތިތަކަށް ހައްލެއް ލިބިގެންދާނެ ކަމަށް އިސްމާޢިލް ވިދާޅުވިއެވެ.
" މިފްކޯގެ ވަސީލަތްތައް އަޅުގަނޑުމެން މި ޕްލޭންކޮށްފައިވާ ގޮތަށް ކުރިއަށްދާ ކަމަށް ވަންޏާ މިކަމަށް ހައްލެއް ހޯދޭނެ." އިސްމާޢިލް ވިދާޅުވިއެވެ.
އިސްމާއިލް ވިދާޅުވި ގޮތުގައި ގދ. ތިނަދޫ އާއި މ.މުލަކުގައި ތަރައްޤީކުރާ މަސް ގަނެ ރައްކާކުރާ ސެންޓަރުތަކާއެކު މަސް ކިރުވުމަށް މަސްވެރިންނަށް ދިމާވެފައިވާ ދަތިތަކަށް ހައްލެއް ލިބިގެންދާނެއެވެ.