އޭލެވެލް އިމްތިހާނުގެ އެއްވެސް ސުވާލު ކަރުދާހެއް ރާއްޖެއިން ލީކެއްނުވޭ: މިނިސްޓްރީ

އޭ ލެވެލް އިމްތިޚާނުގެ އެއްވެސް ސުވާލު ކަރުދާހެއް ރާއްޖެއިން ލީކުނުވާކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.

އެޑިއުކޭޝަން މިނިސްޓްރީން ވިދާޅުވީ، މިހާރު ރާއްޖޭގައި ކުރިއަށްދާ އެޑެކްސެލް އިންޓަރނޭޝަނަލް އޭ ލެވެލް އިމްތިހާނުގެ ސުވާލު ކަރުދާސްތައް ރައްކާތެރިކަމާއެކީ ބެލެހެއްޓުމާއި، ސުވާލު ކަރުދާސްތަކުގެ ރައްކާތެރިކަމަށްޓަކައި އެޅިފައިހުރި ފިޔަވަޅުތައް ހަމަޖެހިފައިހުރި އުޞޫލުތަކާ އެއްގޮތަށް ކުރިއަށްދާކަމަށެވެ. އަދި އޭ ލެވެލްގެ ސުވާލު ކަރުދާހެއް ދިވެހިރާއްޖޭގެ އެއްވެސް އިމްތިހާނު ސެންޓަރަކުން ލީކުވެފައިނުވާކަމަށެވެ.

އެހެންނަމަވެސް އޭ ލެވެލް އިމްތިހާނު ކަރުދާހެއް ރާއްޖޭން ބޭރުގެ ޤައުމަކުން ލީކުވެގެން އުޅޭކަމުގެ މަޢުލޫމާތު އެ މިނިސްޓްރީއަށް ލިބިފައިވާކަމަށާއި، އެކަމާއި ގުޅިގެން ބަލަންޖެހޭ ކަންކަން ބަލަމުންދާކަމަށްވެސް އެޑިއުކޭޝަން މިނިސްޓްރީން ވިދާޅުވެފައިވެއެވެ.

2800 އަށްވުރެ ގިނަ ދަރިވަރުންނާއެކު އޭ ލެވެލް އިމްތިހާނު ރާއްޖޭގައި ފަށާފައިވަނީ މިމަހުގެ 26 ވަނަ ދުވަހުއެވެ. މިއަހަރުގެ މެއި ޖޫންގައި ބޭއްވުމަށް ހަމަޖެއްސި އޭލެވެލް އިމްތިހާނު އަވަސްކޮށްފައިވަނީ އޭ ލެވެލް އަދި އޭ.އެސް ލެވެލް އިމްތިހާނުތަކުގެ ތާވަލަށް އެޑެކްސެލްއިން ބަދަލު ގެނެސްފައިވާތީއެވެ. މިބަދަލު ގެނެސްފައިވަނީ އެޑިއުކޭޝަން މިނިސްޓްރީއާއި ޑިޕާޓްމަންޓް އޮފް ޕަބްލިކް އެގްޒަމިނޭޝަނާ ކުރިން މަޝްވަރާކުރުމެއްނެތި ކަމަށް އެމިނިސްޓްރީން ވިދާޅުވެއެވެ.

މިފަހަރުގެ އޭ ލެވްލް އިމްތިހާނުގައި މާލެ އާއި އަތޮޅުތަކުން ޖުމްލަ 2821 ދަރިވަރަކު ބައިވެރިވެފައިވާ ކަމަށް އެޑިއުކޭޝަން މިނިސްޓްރީން ވިދާޅުވެއެވެ. އޭގެ ތެރޭގައި މާލޭގެ ސްކޫލްތަކުން 1890 ދަރިވަރުންނާއި، އަތޮޅުތަކުގެ ސްކޫލްތަކުން 931 ދަރިވަރުން ހިމެނޭ ކަމަށް އެ މިނިސްޓްރީން ވިދާޅުވެފައިވެއެވެ. އޭ ލެވެލް އިމްތިހާނު މިފަހަރު ރާއްޖޭގެ 44 މަރުކަޒެއްގައި ކުރިއަށްދާނެއެވެ. އެއީ މާލޭގެ 6 ސެންޓަރަކާއި، އަތޮޅުތަކުގެ 38 ސެންޓަރެއްގައެވެ. އޭ ލެވެލް އިމްތިހާނު މިއަދުން ފެށިގެން އަންނަމަހުގެ 14 ވަނަ ދުވަހާއި ހަމައަށް ކުރިއަށްދާނެއެވެ.

އޭ ލެވެލް އިމްތިހާނު ބާއްވާ ތާރީޚަށް ބަދަލު ގެނައުމާގުޅިގެން އެޗް.އެސް.ސީ އިމްތިހާނު ބޭއްވުމަށް ހަމަޖެހިފައިވަނީ އޭ ލެވެލް އަދި އޭ.އެސް ލެވެލް އިމްތިހާން ނިމޭތާ އެއްމަސް ފަހުންނެވެ. މިގޮތުން ޖޫންމަހުގެ 13 އިން 17 އަށް އެޗް.އެސްސީ އިމްތިހާނު ކުރިއަށްގެންދިޔުމަށް ނިންމާފައިވާކަމަށް އެޑިއުކޭޝަން މިނިސްޓްރީން ވިދާޅުވެއެވެ.