ޒަމާނުއްސުރެ އަޅުގަނޑުމެންގެ ދިރިއުޅުން ބައްޓަންވެފައިވާގޮތުން، އާއިލާއެއްގެ ޚަރަދުތައް ބެލެހެއްޓުމުގެ ޒިންމާއަކީ ފިރިމީހާ ނުވަތަ ބައްޕަގެ ޒިންމާއެކެވެ. ދަރިން ތަރުބިއްޔަތުކޮށް ބެލެހެއްޓުމާއި، ގޭގެތެރޭގެ މަސައްކަތްތަކަކީ އަނބިމިހާ ނުވަތަ މަންމަގެ ޒިންމާއެވެ. ނަމަވެސް މިހާރު ޒަމާނާއި ޙާލަތު މިވަނީ ވަރަށް ބޮޑަށް ބަދަލުވެފައެވެ.
ދިރިއުޅުމުގެ ޙާލަތާއި، ފެންވަރަށް އައިސްފައިވާ ބަދަލުތަކާއެކު އާއިލާއެއް ބިނާކޮށް، ޚަރަދުތައް ފޫބައްދަން ބޭނުންނަމަ، މިހާރު ދެމަފިރިންވެސް ވަޒީފާ އަދާކުރަން އެބަޖެހެއެވެ. މިއީ ރާއްޖޭގެވެސް ގިނަ ޢާއިލާތަކުގެ ޙާލަތެވެ. ބައްޕައެކަނި ހޯދާ ޢާމްދަނީން އާއިލާގެ ޚަރަދުބަރަދު ހަމަޖެއްސޭކަށްނޯވެއެވެ. ޚާއްސަކޮށް މާލޭ ސަރަހައްދުގައި ބޮޑުއަގުގައި ކުލި ދައްކައިގެން ދިރިއުޅެމުންދާ ޢާއިލާތަކުގެ ޙާލަތަކީ މިއީއެވެ. ދެމަފިރިން ވަޒީފާ އަދާކުރަން މަޖުބޫރުވެއެވެ. ޒަރޫރީ ބޭނުންތައް ފުއްދޭނެ އެނޫން ގޮތެއް ނޯވެއެވެ.
ދަރިންނަކީ އާއިލާއަކަށް ލިބޭނެ އެންމެ ބޮޑު އުފަލާއި ހިތްހަމަޖެހުންކަމަށްވާއިރު، ވަޒީފާއަދާކުރަމުން ދަރިންނަށް އެކަށީގެންވާ ވަގުތު ނުދެވުމަކީ މިފަދަ މައިންބަފައިން ތަޙައްމަލުކުރާ އެންމެ ހިތްދަތި އެއްކަންތަކެވެ. ވަކިން ޚާއްސަކޮށް ދަރިއަކު ލިބޭ ހިސާބުން، ފުރަތަމަ ދެތިން މަހަކީ ތުއްތު ދަރިފުޅާއެކު މަންމައާއި ބައްޕަވެސް ވަގުތު ހޭދަކުރަން ބޭނުންވާނެ ދުވަސްތަކެކެވެ. ނަމަވެސް އެ ފުރުޞަތު ގިނަ އާއިލާތަކަކަށް ނުލިބެއެވެ. އެކުގައި ވަގުތު ހޭދަކުރަން ބޭނުންވާނަމަ، އެންމެ ގިނަވެގެންވެސް ލިބޭނީ މަސް ދުވަހުގެ ޗުއްޓީއެކެވެ. އެއަށްފަހު މަންމަ ނުވަތަ ބައްޕައަށް އަނބުރާ ވަޒީފާއަށް ނުކުތުމަށް މަޖުބޫރުވެއެވެ. ކުޑަ ދަރިފުޅަށް ވަގުތުދޭން ބޭނުންވާނަމަ ކޮންމެވެސް އެކަކު ވަޒީފާ ގުރުބާންކުރަންޖެހޭ ޙާލަތަށްވެސް ބައެއް އާއިލާތައްގޮސްފައިވެއެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު 2018 ވަނަ އަހަރު ވެރިކަމަށް ވަޑައިގަތީ މިފަދަ ޙާލަތްތަކުގައި ތިބި އާއިލާތަކަށް އުފާވެރިކަމާއި އުއްމީދުން ފުރިގެންވާ ވަޢުދަކާއެކުއެވެ. އެއީ މެޓަރނިޓީ ލީވް ނުވަތަ ވިހެއުމާގުޅިގެން ޚާއްސަ ޗުއްޓީއެއް ދިނުމުގެ ވަޢުދެވެ. އެމަނިކުފާނުގެ ވެރިކަމުގެ ފުރަތަމަ 100 ދުވަހުގެ ތެރޭގައި ވަނީ މި ވަޢުދު ފުއްދަވައިދެއްވާ، ސަރުކާރުގެ ވަޒިފާ އަދާކުރާ މައިންނަށް 6 މަސްދުވަހުގެ ޗުއްޓީ މުސާރައާއެކު، އަދި ބައްޕައަށް 1 މަސްދުވަހުގެ ޗުއްޓީއެއް މުސާރައާއެކު ދިނުމަށް ސަރުކާރުން ވަނީ ކަނޑައަޅުއްވާފައެވެ.
ވިހެއުމާ ގުޅިގެން ދޭ ޗުއްޓީއަށް އަހަރަކު 30 މިލިއަން ރުފިޔާ ދައުލަތުން ޚަރަދުކުރަންޖެހޭކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވިދާޅުވެފައިވެއެވެ. މިފަދަ ކަންކަމަކީ ދައުލަތުން ބުރައެއް އުފުލަންޖެހުނަސް ކުރަންޖެހޭނެ ކަންކަމުގެ ގޮތުގައި އެމަނިކުފާނު ޤަބޫލުފުޅުކުރައްވާކަމަށާ، ދައުލަތުގެ ޒިންމާއަކީ ވީހާވެސް ގިނަ ރައްޔިތުންނަށް ފައިދާވާގޮތަށް ކަންތައްތަކެއް ކުރުންކަމަށް އެމަނިކުފާނު ވަނީ ވިދާޅުވެފައެވެ.
މިނިންމެވުމަކީ ވަރަށް ދިރާސާތަކެއްކޮށް ދެމެހެއްޓިނިވި ގޮތެއްގައި ކުރެވޭނެކަމަކަށްވާތީ ކުރެއްވިކަމެއްކަމަށްވެސް ސަރުކާރުން ވިދާޅުވެއެވެ. މި ސަރުކާރުން 100 ދުވަހުގެ ތެރޭގައި ކުރުމަށް ކަނޑައެޅި ކަންތަކުން އެންމެ ހިތްހަމަ ޖެހިވަޑައިގަންނަވާ އެއްކަމަކީވެސް ވިހެއުމުން މައިންނާއި ބައްޕައިންނަށް ދޭ ޗުއްޓީ ހަމަޖައްސައިދިނުންކަން ރައީސުލްޖުމްހޫރިއްޔާ ފާހަގަކުރައްވާފައިވެއެވެ. އަދި މިއީ މިވެރިކަމުގައި ކުރެވުނު އެންމެ ރަނގަޅު އެއްކަންތައްކަމަށް ސިފަކުރައްވާ އެކަމާ އުފާކުރައްވާކަމަށް އެމަނިކުފާނު ވިދާޅުވެފައިވެއެވެ.
ކޮންމެއަކަސް ސަރުކާރުގެ މި ސިޔާސަތަކީ އެތައް އާއިލާއަކަށް އުފާވެރިކަމާއި ހިނިތުންވުން ގެނުވިކަމެކެވެ. އާއިލާއެއް ބިނާކުރަން ބޭނުންވެފައިތިބި މައިންނާއި ބަފައިންނަށްވެސް އުއްމީދު ގެނުވިކަމަކަށެވެ. ވިހެއުމުގެ ސަބަބުން ވަޒީފާ ދޫކޮށްލަންޖެހިދާނެކަމުގެ ބިރުވެރިކަމާއި ނުތަނަވަސްކަން މިހާރު ނެތެވެ. ސަރުކާރުގެ މި ސިޔާސަތަކީ އަންހެނުން ބާރުވެރިކުރުވުމަށް ކުރާ މަސައްކަތްތަކަށްވެސް ލިބިގެންދިޔަ އިތުރު ކުރިއެރުމެކެވެ.