ކޯވިޑްގެ ބަލިމަޑުކަމުގެ ސަބަބުން ތުރުކީވިލާތުގައި އަޅާފައިވާ ރައްކާތެރިކަމުގެ ފިޔަވަޅުތަކާ ހެދި އެޤައުމުގެ ކުދި ވިޔަވާރިތައް ނުކުރެވި ހުއްޓުމަކަށް ގެންނަންޖެހިދާނެކަމުގެ ބިރު ހީވާކަމުގައި ވިޔަފާރިވެރިން ބުނަން ފަށައިފިއެވެ.
ކޮންމެހެން ހުޅުވަންޖެހޭ ވިޔަފާރިތައް ފިޔަވައި އެހެން ވިޔަފާރިތައް ބަންދުކޮށްފައިވާ ތުރުކީގައި ކުދިވިޔަފާރިތައް ކުރާ ފަރާތްތަކުން ބުނާގޮތުގައި އެމީހުންގެ ވިޔަފާރިތައް ދެން އެންމެ ގިނަވެގެންވެސް ބަންދުކޮށްފައި ބެހެއްޓޭނީ ދެ ހަފްތާވަންދެނެވެ. އޭގެ ފަހުގައި އެމީހުންނަށް ޖެހޭނީ އަޅާފައިވާ ފިޔަވަޅުތަކާއި ދެކޮޅަށް ނިކުންނަންކަމަށްވެސް އެމީހުން ބުނެއެވެ.
ވެރިރަށް އަންކާރާއިން އުންމީދުކުރާގޮތުގައި 17 ދުވަހުގެ ފުރަބަންދަކަށްފަހު ކޯވިޑްގެ ބަލިމަޑުކަން ކޮންޓްރޯލް ކުރެވޭނެއެވެ. ތުރުކީ ފުރަބަންދުކޮށްފައިވަނީ މިދިޔަ ބުރާސްފަތި ދުވަހުއެވެ.
މި ކުއްލި ފުރަބަންދު ކުރަންޖެހުނީ ތުރުކީގެ ފަތުރުވެރިކަމުގެ ބޮޑު މާކެޓެއްކަމަށްވާ ރަޝިއާއިން ތުރުކީއަށްދާ ފްލައިޓްތައް ކޯވިޑްގެ ބަލިމަޑުކަމާހެދި ހުއްޓުމަކަށް ގެނައުމުގެ ސަބަބުންނެވެ.
ހުކުރުދުވަހުން ފެށިގެން ބައެއް ވިޔަފާރިތައްކަމަށްވާ އިލެކްޓްރޯނިކް ސާމާނު ވިއްކާ ތަންތަނާއި އަންނައުނާއި ދަނޑުވެރިކަމަށް ބޭނުންވާ ސާމާނު ވިއްކާތަންތަން ވަނީ ބަންދުކޮށްފައެވެ. ހުޅުވަން ހުއްދަ ދީފައިވަނީ ސުޕަރމާކެޓްތަކާއި ބޭކަރީ އަދި ތަފާތު ވައްތަރުގެ މަސް ވިއްކާތަންތަނެވެ. ފުރަބަންދުގެ ސަބަބުން ގިނަ އަމިއްލަ ފިޔަވާރިތަކެއްވަނީ ސަރުކާރުގެ އެހީ ބޭނުންވާވަރަށް އިނދަޖެހިފައެވެ. އަދި އޭޕްރީލްމަހު އިންފްލޭޝަން މައްޗަށް ދިއުމުގެ ސަބަބުން ކުއްޔާއި ކަރަންޓް އަދި އެހެނިހެން ޚަރަދުތައްކުރުމަށް ވިޔަފާރިވެރިން ވަނީ ނުކުޅެދިފައެވެ.
މީގެ ހަފްތާއެއްހާ ދުވަސްކުރިން ތުރުކީންވަނީ އެޤައުމުގައި ކޯވިޑްޖެހޭ މީހުންގެ އަދަދު 63000 އެކު ޕީކަށްއަރާފައިވާކަމުގައި ރިޕޯޓްކޮށްފައެވެ. ނަމަވެސް މިއަދަދު މިހާރުވަނީ 25000 އަށް ދަށްވެފައެވެ. އަދި 394 މީހުން މިބަލީގައި ވަނީ މަރުވެފައެވެ. ރޮއިޓަރސްގެ ޓެލީން ދައްކާގޮތުގައި ދުވާލެއްގެ މައްޗަށް ކޭސްތައް އިތުރުވާ ނަންބަރަށް ބަލާއިރު ދުނިޔޭގެ ނިސްބަތުން 4 ވަނަގައި އޮތީ ތުރުކީއެވެ. ޖަރުމަނުވިލާތް، އިނގިރޭސި ވިލާތް، ބަލްގޭރިއާ އަދި އިރާނުން ވަނީ އެޤައުމުތަކުގެ މީހުން ތުރުކީއަށް ދަތުރުކުރުމުގައި ސަމާލުވާންއެދިފައެވެ.