އެވްރެޖްކޮށް ކޮންމެ ދުވަހަކު ރާއްޖެ އަންނަ ފަތުރުވެރިންގެ އަދަދު ދަށަށް

މިމެއިމަސް ފެށުނު ފަހުން އެވްރެޖްކޮށް ކޮންމެ ދުވަހަކު ރާއްޖެއަށް އަންނަ ފަތުރުވެރިންގެ އަދަދު ދަށަށް ހިނގަށްޖެއެވެ.

ޓޫރިޒަމް މިނިސްޓްރީން އާއްމުކޮށްފައިވާ އެންމެފަހުގެ ތަފާސް ހިސާބުތައް ދައްކާގޮތުން މި މެއިމަހުން ފެށިގެން ރާއްޖެއަށް މިހާރު އެވްރެޖްކޮށް ކޮންމެ ދުވަހު އަންނަނީ 2619 ފަތުރުވެރިންނެވެ. މިއަހަރު ފެށިގެން އައިއިރު އެވްރެޖްކޮށް ކޮންމެ ދުވަހު ރާއްޖެއަށް 3000އެއްހާ ފަތުރުވެރިން އާދެއެވެ.

މިމަހުގެ މިހާތަނަށް ރާއްޖެއަށް އައިސްފައިވަނީ 28809 ފަތުރުވެރިންނެވެ. މިއީ 2019ވަނަ އަހަރާއި އަޅާ ބަލާއިރު 30 އިންސައްތަ ދަށް އަދަދެކެވެ.

މިމަހުގެ ވަކިވަކި ދުވަސްތަކުގައި ފަތުރުވެރިން ރާއްޖެއަށް އައިސްފައިވާ ގޮތަށް ބަލާއިރު، މިމަހުގެ މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ މިމަހުގެ އެއްވަނަ ދުވަހުއެވެ. އެގޮތުން އެދުވަހު ރާއްޖެއަށް 3815 ފަތުރުވެރިން އައިސްފައިވެއެވެ. މިމަހުގެ އެންމެ މަދު އަދަދަކަށް ފަތުުރުވެރިން އައިސްފައިވަނީ މިމަހުގެ 6ވަނަ ދުވަހުއެވެ. އެދުވަހު ރާއްޖެއަށް އައިސްފައިވަނީ 1658 ފަތުރުވެރިންނެވެ.

ކޯވިޑްގެ ކޭސްތައް އިތުރުވަމުން ދިޔުމާއެކު ދެކުނު އޭޝިޔާގެ ޤައުމުތަކުން މިމަހުގެ 13ވާ ބުރާސްފަތި ދުވަހުން ފެށިގެން ރާއްޖެ އަންނަ ފަތުރުވެރިންނަށް ޓުއަރިސްޓް ވިސާ ދިނުން ވަގުތީ ގޮތުން މެދުކަނޑާލުމަށް ސަރުކާރުންވަނީ ނިންމާފައެވެ.

މިއާއެކު ރާއްޖެއަށް އަންނަ ފަތުރުވެރިންގެ އަދަދު އިތުރަށް ދަށަށް ދާނެ ކަމަށް ލަފާކުރެއެވެ. ސަބަބަކީ އިންޑިއާއިން ރާއްޖެއަށް ފަތުރުވެރިން އައުން ހުއްޓިގެންދާނެތީއެވެ. އިންޑިއާއަކީ ރާއްޖެއަށް މިހާރު ދެވަނައަށް އެންމެ ގިނަ އަދަދަކަށް ފަތުރުވެރިން އަންނަ ޤައުމެވެ.

މިދިޔަ އަހަރު ނިމުނުއިރުން ފެށިގެން މިއަހަރުގެ އޭޕްރީލްމަހުގެ ނިޔަލަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަމުން ދިޔައީ އިންޑިއާއިންނެވެ. އެހެންނަމަވެސް އެޤައުމުގައި ކޯވިޑް ފެތުރޭ މިންވަރު އިތުރުވެ، އެޤައުމުން ރާއްޖެއަށް އަންނަ ފަތުރުވެރިންގެ އަދަދުތައްވަނީ މިމަހުގެ އެއްވަނަ ދުވަހުން ފެށިގެން ވަރަށް ބޮޑަށް ދަށަށްދާން ފަށާފައެވެ.

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް މިހާރު އެންމެ ގިނަ އަދަދަކަށް ފަތުރުވެރިން އަންނަނީ ރަޝިއާއިންނެވެ. އަހަރުގެ މިހާތަނަށް ރާއްޖެއަށްވަނީ 418579 ފަތުރުވެރިން ޒިޔާރަތްކޮށްފައެވެ. މިއީ 2019ވަނަ އަހަރާއި އަޅާ ބަލާއިރު 30 އިންސައްތަ ދަށް އަދަދެކެވެ.