އަހަރުގެ މިހާތަނަށް ރަޝިއާއިން ރާއްޖެއަށް ޒިޔާރަތްކުރި ފަތުރުވެރިންގެ އަދަދު ލައްކައަކާއި ގާތްކޮށްފިއެވެ. ރަޝިއާއަކީ ރާއްޖެއަށް މިހާރު އެންމެ ގިނަ އަދަދަކަށް ފަތުރުވެރިން އަންނަ ޤައުމެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން އަހަރުގެ މިހާތަނަށް ރަޝިއާއިން 95670 ފަތުރުވެރިން ރާއްޖެއަށް ވަނީ ޒިޔާރަތްކޮށްފައެވެ. މިއީ މިދިޔަ އަހަރު ނިމުނުއިރު އެޤައުމުން ރާއްޖެއަށް ޒިޔާރަތްކުރި ފަތުރުވެރިންގެ އަދަދާއި އަޅާބަލާއިރު، 55 އިންސައްތަ އިތުރު އަދަދެކެެވެ. މިދިޔަ އަހަރު ރަޝިއާއިން ރާއްޖެއަށް ޒިޔާރަތްކުރީ 61387 ފަތުރުވެރިންނެވެ.
މިއަހަރުގެ މިހާތަަނަށް ރަޝިއާއިން ރާއްޖެއަށް އައިސްފައިވާ ފަތުރުވެރިންގެ އަދަދަނީ 2019ވަނަ އަހަރު އެޤައުމުން ރާއްޖެއަށް ޒިޔާރަތްކުރި ފަތުރުވެރިންގެ އަދަދަށްވުރެވެސް މައްޗަށް އަރާފައެވެ. 2019ވަނަ އަހަރު ރަޝިއާއިން ރާއްޖެއަށް އައިސްފައިވަނީ 83369 ފަތުރުވެރިންނެވެ.
ކޯވިޑް-19 އާއި ގުޅިގެން ރާއްޖެއަށް އެންމެ ގިނަ އަދަދަކަށް ފަތުރުވެރިން އަންނަ ޤައުމުތަކުގެ ލިސްޓަށްވަނީ ބޮޑެތި ބަދަލުތަކެއް އައިސްފައެވެ. މީގެތެރެއިންވެސް އެންމެ ފާހަގަކޮށްލެވޭ އެއް ޤައުމަކީ ރަޝިއާއެވެ.
ރާއްޖެއަށް މިހާރު ދެވަނައަށް އެންމެ ގިނަ ފަތުރުވެރިން ޒިޔާރަތްކުރަނީ އަވައްޓެރި އިންޑިއާއިންނެވެ. އެޤައުމުން މިއަހަރުގެ މިހާތަނަށް އަހަރުގެ މިހާތަނަށް 89175 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. ތިންވަނައަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރީ ޔޫކްރޭނުންނެވެ. އެޤައުމުން މިއަހަރުގެ މިހާތަނަށް 22690 ފަތުރުވެރިން ރާއްޖެއަށް ޒިޔާރަތްކޮށްފައިވާކަމަށް ތަފާސް ހިސާބުތަކުން ދައްކައެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން އަހަރުގެ މިހާތަނަށް ޖުމްލަ 421196 ފަތުރުވެރިން ވަނީ ރާއްޖެ އެތެރެވެފައެވެ. ވަކިވަކި މަހަށް ބަލާއިރު ޖެނުއަރީ މަހު މިއަދަދު ހުރީ 92103 އެވެ. އަދި ޖެހިގެން އައި ފެބްރުއަރީމަހު 96882 ފަތުރުވެރިން ރާއްޖެ އެތެރެވިއެވެ. މާރިޗުމަހު މިއަދަދު 109585 އިތުރުވެ މި ނިމުނު އޭޕްރީލްމަހު 91200 ފަތުރުވެރިންވަނީ ރާއްޖެއަށް ޒިޔާރަތްކޮށްފައެވެ. އަދި މި ހިނގާ މޭމަހުގެ މިހާތަނަށް 31426 ފަތުރުވެރިން ރާއްޖެ އެތެރެވިކަމަށް ތަފާސް ހިސާބުތައް ދައްކައެވެ.
ރާއްޖެއަށް އަންނަ ފަތުރުވެރިން މިހާރު އެވްރެޖްކޮށް 9 ދުވަހުގެ ޗުއްޓީއެއް ރާއްޖޭގައި ހޭދަކުރެއެވެ.