ދުނިޔޭގެ ބާޒާރުގައި ޗިޕް ލިބުން ދަތިވުމުގެ ސަބަބުން ޖަޕާނުގެ މަލްޓިނޭޝަނަލް އޮޓޯމޮބައިލް ދެ ކުންފުނިކަމަށްވާ ނިސާން މޮޓޯ ކޯ އާއި ސުޒުކީ މޮޓޯ ކޯޕަރޭޝަންގެ ބައެއް ކާރުޚާނާތަކުގެ އުފެއްދުންތައް ޖޫން މަހު ހުއްޓާލަން ޖެހިދާނެ ކަމަށް މީޑިއާތަކުން ބުނެފިއެވެ.
އެގޮތުން ނިސާން އިން ވަނީ ޖަޕާންގެ ދެކުނުން ކުޝޫގައި ހުންނަ ކާރުޚާނާ ތިން ދުވަހަށް ބަންދުކުރުމަށް ނިންމައި އަދި ތޯޗިގީއާއި އޮޕަމާ ކާރުޚާނާގެ ޕްރޮޑަކްޝަން އަށް ޖޫން މަހު ބައެއް ބަދަލުތައް ގެނައުމަށްވަނީ ނިންމާފައެވެ. މީގެ އިތުރުން މެކްސިކޯގައި ހުންނަ ނިސާންގެ ކާރުޚާނާއިން އުފައްދާ ބައެއް މޮޑެލްސްތައް އުފެއްދުންވެސް ވަގުތީގޮތުން މަޑުޖައްސާލުމަށް ނިސާން އިން ވަނީ ނިންމާފައެވެ.
ނިސާން އިން ބުނެފައިވާ ގޮތުގައި ޗިޕްގެ ދަތިކަން ކުރިމަތިވުމުގެ ސަބަބުން އޮޓޯ ސެކްޓަރަށް ވަރަށް ބޮޑަށް ދަތިވެފައިވާކަމަށާއި ނިސާނުން ދަނީ ވީހާވެސް އަވަހަކަށް މިކަމުން އަރައިގަނެވޭތޯ މަސައްކަތް ކުރަމުންނެވެ.
ސުޒުކީން ވަނީ އެމީހުންގެ 3 ކާރުޚާނާއެއް 3 ދުވަސް ނުވަތަ 9 ދުވަހުގެ މުއްދަތަށް ބަންދުކުރަން ނިންމާފައެވެ. ނަމަވެސް އެކަން އަދި މުޅިން ނުނިންމާކަމަށް ސުޒުކީން ބުނެއެވެ. އަދި ޗިޕްގެ ދަތިކަން އޮތް ނަމަވެސް މަސައްކަތްތައް ކުރިއަށް ގެންދެވެން އޮތް ގޮތަކަށް ގެންދަން މަސައްކަތްކުރާކަމަށް ސުޒުކީން ބުނެއެވެ.
ޖަޕާނުގެ އެހެން އޮޓޯމޮބައިލް ކުންފުންޏެއްކަމަށްވާ މިތުސުބުޝީ މޮޓޯރސް އިންވަނީ ޖޫން މަހު ޖަޕާން، ތައިލޭންޑް، އިންޑޮނޭޝިއާ އިން 30،000 ވެހިކަލް އުފެއްދުން މަދުކުރުމަށް ނިންމާފައެވެ.