ބޭރުގެ ޤައުމުތަކުގެ އިންވެސްޓަރުންނާއި ވިޔަފާރިވެރިންނަށް ޔޫއޭއީގައި ކުންފުނިތައް އުފައްދައި އަމިއްލަ ކުރެވޭގޮތަށް އެޤައުމުގެ ކޮމާޝަލް ކުންފުނިތަކުގެ ޤާނޫނަށް ބަދަލު ގެނެސް އަންނަ ޖޫން މަހު 1 ވަނަ ދުވަހުން ފެށިގެން ޢަމަލުކުރާން ފަށާނެ ކަމަށް ޔޫއޭއީގެ އިޤްޠިޞާދާއި ބެހޭ ވުޒާރާއިން އިޢުލާންކޮށްފިއެވެ.
ޔޫއޭއީ ސަރުކާރުން ދާދިފަހުން ވަނީ ޤާނޫނަށް މިބަދަލުގެނެސް ބޭރުގެ ކުންފުނިތަކަށް %100 އަމިއްލަ ކުރެވޭގޮތް ހަދާފައެވެ.
މިބަދަލަކީ ވިޔަފާރިތައް ކުރުމަށް މަގުފަހިކޮށްދިނުމަށާއި ވިޔަފާރީގެ ވާދަވެރިކަން އުފެއްދުމަށްޓަކައި ސަރުކާރުން ނެގި ފިޔަވަޅެއްކަމުގައި އިޤްޠިޞާދާއި ބެހޭ ވަޒީރު ޢަބްދުﷲ ބިން ޠައުގު އަލްމާރީ ވަނީ ވިދާޅުވެފައެވެ. އަދި މިކަމުގެ ސަބަބުން ޔޫއޭއީ އަކީ ބޭރުގެ އިންވެސްޓްތައްކުރަން ރަނގަޅު މަންޒިލަކަށް ހެދޭނެކަމަށާއި ބައިނަލްއަޤުވާމީ އިޤްޠިޞާދީ ސެންޓަރެއްގެ ގޮތުގައި ބަލައިގަތުމަށް ބާރުލިބޭނެކަމަށްވެސް ޔޫއޭއީގެ އިޤްޠިޞާދާއި ބެހޭ ވަޒީރު ވިދާޅުވިއެވެ.
ޔޫއޭއީގެ ކުންފުނިތަކުގެ އިތުރުން ޔޫއޭއީގައި ވިޔަފާރި ފަށަން ބޭނުންވާ ފަރާތްތަކަށްވެސް މި ބަދަލުވެގެންދާނީ ރަނގަޅު ބަދަލަކަށް ކަމަށާއި މިހާރު މިކަން ތަންފީޒުކުރުމުގެ ވަގުތު ޖެހިއްޖެ ކަމަށް ކަމާބެހޭ މާހިރުން ވިދާޅުވެއެވެ. އަދި މިއީ ބޭރުދުނިޔެއާއި ގުޅުން ރަނގަޅުކުރުމަށް ޔޫއޭއީން ނެގި ރަނގަޅު ފިޔަވަޅެކެވެ. އަދި ޔޫއޭއީގައި ކުރިން އޮންނަ އުޞޫލު ކަމަށްވާ ބޭރުގެ ކުންފުނިތަކުގެ މެޖޯރިޓީ ޙިއްޞާދާރުންނަކީ ޢެޤައުމުގެ ރައްޔިތުން ކަމުގައި އޮންނަ އޮތުމަކީ ބޭރުގެ ކުންފުނިތަކަށް ދިމާވާ އެންމެ ދަތި އެއްކަންތައްކަމަށްވެސް މިފަރާތްތަކުން ބުނެއެވެ.
80 އިންސައްތައަށްވުރެ ގިނަ ބޭރުމީހުން އުޅޭ ޔޫއޭއީގައި ސްކޫލްތަކާއި ޓެލެކޮމްގެ ޚިދުމަތްވެސް ހިމެނޭގޮތަށް އެޤައުމުގެ ހުރިހާ ޚިދުމަތްތައް ބޭނުންކުރެވޭ ފަދަ ވާޗުއަލް ވިސާ ސްކީމެއް 2020 ވަނަ އަހަރު ދުބާއީންވަނީ ތަޢާރަފް ކޮށްފައެވެ. މީގެ އިތުރުން އެޤައުމުގެ ރައްޔިތުންނާއި ޤައުމުން ބޭރު މީހުންވެސް ހިމެނޭގޮތަށް 55 އަހަރު މަތީގެ މީހުންނަށް ރިޓަޔަރމެންޓް ސްކީމެއްވެސް މިދިޔަ ސެޕްޓެމްބަރު މަހު ވަނީ ތަޢާރަފްކޮށްފައެވެ. އަދި ވާރޗުއަލް ކޮމްޕެނީ ލައިސެންސް ލިބޭގޮތްވެސް ދާދިފަހުން ދުބާއީންވަނީ ހަމަޖައްސާފައެވެ. މީގެ ސަބަބުން އިތުރު އިންވެސްޓްމަންޓްތަކަށް ފުރުޞަތުލިބި އެޤައުމުގެ އީ ކޮމާސް ވިޔަފާރިއަށްވެސް ކުންފުނިތަކަށް ވަނުމުގެ މަގުފަހިވެގެންދާނެއެވެ.