ފުރަބަންދަކަށް ދިއުމުން ބަލީގެ ރައްކާތެރިކަން ލިބުނަސް އިޤްޠިޞާދު އިނދަޖެހިދާނެ: މެލޭޝިއާގެ ބޮޑުވަޒީރު
ކޯވިޑްގެ ބަލިމަޑުކަމުން އަރައިގަތުމަށްޓަކައި މިދިޔަ އަހަރެކޭ އެއްގޮތަށް މިއަހަރުވެސް ހުރިހާ ތަނެއް ބަންދުކޮށް މުޅި ޤައުމު ފުރަބަންދު ކުރުމުގެ ސަބަބުން ރައްޔިތުންނަށް ބަލިން ރައްކާތެރިވެވޭނެކަން ކަށަވަރު ނަމަވެސް ޤައުމުގެ އިޤްޠިޞާދު އިނދަޖެހިގެންދާނެ ކަމަށް މެލޭޝިއާގެ ބޮޑުވަޒީރު މުހިއްޔުއްދީން ޔާސީން ވިދާޅުވެއްޖެއެވެ.
ބޮޑުވަޒީރު ވިދާޅުވީ މިދިޔަ އަހަރު މާރިޗް މަހާއި މެއި މަހާއި ދެމެދު ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތައް މިހާރުވެސް އެޅުމަށް ބާރުއަޅަމުންދާކަމަށްށެވެ.
މިދިޔަ އަހަރުގެ ކޭސްތައް މިހާރަށްވުރެ މަދުވެފައި އޮތްވައި ފުރަބަންދުކޮށް ބަލި ކޮންޓްރޯލް ވީނަމަވެސް އޭގެ އަސަރު އިޤްޠިޞާދަށްކުރީ ވަރަށް ބޮޑަށްކަމަށް ބޮޑު ވަޒީރު ވަނީ ވިދާޅުވެފައެވެ. އެގޮތުން ކޮންމެ ދުވާލަކަށް 579 މިލިއަން ޑޮލަރުގެ ގެއްލުން ލިބެމުންކަމަށާއި އަދި 340 ބިލިއަން ރިންގިޓްގެ އިޤްޠިޞާދީ އެހީ ހޯދަން ޖެހުނުކަމަށްވެސް ބޮޑު ވަޒީރު ވިދާޅުވިއެވެ.
ކޭސްތައް އިތުރުވެފައިވާ މިދަނޑިވަޅުގައި މިކަން އަނެއްކާވެސް ތަކުރާރުކޮށް އިޤްޠިޞާދީ އެހީ ހޯދަން ޖެހިއްޖެނަމަ 340 ބިލިއަން ރިންގިޓްއިން ނުފުދޭނެކަމަށެވެ. އެހެންކަމުން ވިޔަފާރިތައް ބަންދުކޮށްގެން ނުތިބޭވޭނަކަމަށާއި މިކަން އެންމެންނަށްވެސް އެނގެންޖެހޭ ކަމަށް ވަނީ ވިދާޅުވެފައެވެ.
ނަމަވެސް މެލޭޝިއާ މޫވްމެންޓް ކޮންޓްރޯލް އޯޑަރުގެ ދަށުން މިމަހުގެ 25 އިން ފެށިގެން ބަލި ކޮންޓްރޯލް ކުރުމަށް ފިޔަވަޅުތައް އިތުރަށް ވަރުގަދަ ކުރުމަށް ސަރުކާރުން ވަނީ ނިންމާފައެވެ. އެގޮތުން ގޭގައި މަސައްކަތްކުރުމާއި ފިހާރަތައް ހުޅުވާފައި ބެހެއްޓޭނެ ގަޑިތައް ހެނދުނު 8 ން ރޭގަނޑު 8 ވަނީ ކުޑަކޮށްފައެވެ.
ފިޔަވަޅުތައް އަޅާފައި އޮތްނަމަވެސް ބަލިޖެހޭ މިންވަރު ދަނީ އިތުރުވަމުންނެވެ. އާދީއްތަ ދުވަހު ވަނީ އިތުރު 6976 ކޭސް އިތުރުވެފައެވެ. މިއާއެކު މުޅި ޖުމްލަ ކޭސްތަކުގައި އަދަދުވަނީ 500،000 އަށް އަރާފައެވެ.