ސްޕޭސް އެކްސްގެ ސީއީއޯ އަދި ބިލިއަނަރ އިލޯން މަސްކު ވަނީ ސެޓެލައިޓް މެދުވެރިކޮށް އިންޓަރނެޓް ޚިދުމަތް ފޯރުކޮށްދީ އަދި ދުވެލިބާރު އިންޓަރނެޓްގެ ޚިދުމަތެއް ގިނަ މީހުންނަށް ފޯރުކޮށްދިނުމުގެ މަސައްކަތް ފަށާފައެވެ.
ސްޕޭސް އެކްސްގެ ދަށުން ކުރިއަށްގެންދާ "ސްޓާރލިންކު" ސެޓެލައިޓްގެ ނެޓްވޯކް ތަރައްޤީކުރަން ފަށާފައިވަނީ 2015 ވަނަ އަހަރުއެވެ. އަދި ޕްރޯޓައިޕް ސެޓްލައިޓެއް ފުރަތަމަ ފަހަރަށް ޖައްވަށް ފޮނުވާލާފައިވަނީ 2018 ވަނަ އަހަރުއެވެ.
މިދިޔަ އަހަރުތަކުގެ ތެރޭގައި 1000 އަށް ވުރެ ގިނަ ސްޓާރލިންކް ސެޓެލައިޓް ކާމިޔާބުކަމާއެކު ވަނީ ޖައްވަށް ފޮނުވާލާފައެވެ. ޖެނުއަރީމަހު ވަނީ 60 ސެޓެލައިޓް ޖައްވަށް ފޮނުވާލާފައެވެ. އަދި މިމަހުވެސް އިތުރު 60 ސްޓާރލިންކްގެ ބްރޯޑްބޭންޑް އިންޓަރނެޓް ސެޓަލައިޓް ޖައްވަށް ފޮނުވާފައެވެ. މިއާއިއެކު ޖުމްލަ 1500 ސެޓްލައިޓް ވަނީ ޖައްވަށް ފޮނުވާފައެވެ. މިއީ މުޅި ދުނިޔޭގައިވާ މިފަދަ އެންމެ ބޮޑު ސެޓަލައިޓްތަކުގެ ނެޓްވޯކެވެ.
Falcon 9 in flight this evening with 54 Starlink satellites and two rideshare payloads. pic.twitter.com/TxYR2uVuu8
— John Kraus (@johnkrausphotos) May 15, 2021
ސްޕޭސްއެކްސްއިން އަމާޒުހިފާފައި ވަނީ ސްޓާލިންކްގެ 12000 ސެޓެލައިޓް ޖައްވަށް ފޮނުވުމަށެވެ. މި ޕްރޮޖެކްޓަށް ގާތްގަނޑަކަށް 10 ބިލިއަން ޑޮލަރު ޚަރަދުވާނެކަމަށް އެ ކުންފުނިން އަންދާޒާކުރެއެވެ.
މި ސެޓެލައިޓް ފޮނުވާލާފާވާއިރު ދުނިޔެއާ ދުރުނޫން ހިސާބު ޖައްވުގައި މިސެޓެލައިޓްތައް އަތުރާލާއިރު، ކޮންމެ ފަހަރަކު 60 ސެޓެލައިޓް ފޮނުވައެވެ. މީގެ ބޭނުމަކީ ދުނިޔެ ކަވަރުކުރުމަށް މިނެޓްވޯކްގައި 30000 ސެޓެލައިޓް ހިމެނުންކަމަށް ޕްރޮޖެކްޓް ތަފުސީލްގައި ވަނީ ބުނެފައެވެ.
ސެޓެލައިޓް މެދުވެރިކޮށް އިންޓަރނެޓްގެ ޚިދުމަތް މިހާރުވެސް ދޭ ހިއުގެސްނެޓް އަދި ވިއާސެޓް ފަދައިން ސްޓާރލިންކުންވެސް ބޭނުންވަނީ އިންޓަރނެޓްގެ ޚިދުމަތް ބާރުދުވެލީގައި ނުލިބޭ ތަންތަނަށް މި ޚިދުމަތް ފޯރުކޮށްދިނުމަށެވެ.
ސިގްނަލް ހޯދުމަށް ކުޑަ ސެޓެލައިޓް ޑިޝްއެއް ހަރުކޮށް ރައުޓަރއަށް ބޭންޑްވިޑްތު ފޮނުވުމުން މި ޚިދުމަތް ލިބިގެން ދާނެއެވެ. މީގެއިތުރުން ސްޓާރލިންކުން ވަނީ އެންޑްރޮއިޑް އަދި އައިއޯއެސްއަށް ޚާއްސަކޮށް އެޕްލިކޭޝަނެއްވެސް ހަދާފައެވެ. ނަމަވެސް ސްޓާރލިންކުގެ މި ޚިދުމަތް އަދި ލިބޭނީ އެމެރިކާ އަދި ކެނެޑާގެ ބައެއް ސަރަޙައްދުތަކަށެވެ.
News – SpaceX says it has received more than 500,000 orders for Starlink satellite internet to date, but the $99 deposits are fully refundable and do not guarantee service.https://t.co/VS8tOrjN7R
— Michael Sheetz (@thesheetztweetz) May 4, 2021
ސްޓާރލިންކުގެ ވެބްސައިޓްގައި ބުނާގޮތުން މި ޚިދުމަތުގެ ދުވެލި ސިކުންތެއްގައި 50 އާއި 150 މެގަބައިޓްގައި ލިބޭނެއެވެ. އަދި ކުރިއަށް އޮތް މަސްތަކުގައި ބައެއް ސަރަޚައްދުތަކަށް މިލިސިކުންތުގައި މި ވަރަށް ދުވެލި ލިބޭނެކަމަށްވެސް ވެބްސައިޓްގައި ބުނެއެވެ.
މި ޚިދުމަތް ހޯދުމަށް މަހަކު 99 ޑޮލަރު ދެއްކުމުގެ އިތުރަށް ޓެކްސް އަދި އެހެނިހެން ފީތައްވެސް ދައްކަން ޖެހެއެވެ. މީގެ އިތުރުން ސެޓެލައިޓް ޑިޝް އަދި ރައުޓަރަށް ފުރަތަމަ މަހު 500 ޑޮލަރު ދައްކަންޖެހޭ ކަމަށް ޚަބަރުތައް ބުނެއެވެ.
ސްޕޭސްއެކްސްއަށް އެކުންފުނީގެ ސްޓާލިންކް ސެޓެލައިޓްގެ ހިދުމަތް ހޯދުމަށްޓަކައި 500000 އަށްވުރެ ގިނަ މީހުން ޕްރީއޯޑާ ކޮށްފައިވާކަމަށް އެކުންފުނީގެ ބާނީ އިލޯން މަސްކް ވަނީ އޭނާގެ ޓްވިޓަރގައި ހާމަކޮށްފައެވެ.
މި އަހަރު ފެބްރުއަރީމަހު ޕްރީ އޯޑަރަށް ހުޅުވާލުމާއެކު ސްޓާރލިންކަށް އަންނަނީ ބޮޑު ތަރުޙީބެއް ލިބެމުންނެވެ. އެގޮތުން ރާއްޖޭގެ އައިޓީ ދާއިރާގައި ހަރަކާތްތެރިވާ ބައެއް ފަރާތްތަކުންވެސް ވަނީ ސްޓާރލިންކް އިންޓަރނެޓްގެ ޚިދުމަތަށް ޕްރީއޯޑަރ ކޮށްފައިކަމުގައި ޚަބަރުތައް ބުނެއެވެ.
މުޅި ދުނިޔެއަށް ސްޓާލިންކްގެ ކަވަރޭޖް މިއަހަރުގެ 3 ވަނަ ކުއާޓާގައި ލިބޭނެ ކަމުގައިވެސް މީޑިއާތަކުން ރިޕޯޓް ކުރެއެވެ.