ދިވެހި ދައުލަތަށް ޚިދުމަތް ކުރުމުގެ އިނާމަށް ދުނިޔެ ދޫކޮށްފައިވާ ފަރާތެއްގެ ނަމެއް ހުށަނޭޅޭނެކަމަށް ޤައުމީ އިނާމާބެހޭ ކޮމެޓީން ވިދާޅުވެއްޖެއެވެ.
ދިވެހި ދައުލަތަށް ޚިދުމަތް ކުރުމުގެ އިނާމަށް ނަން ހުށަހެޅުމުގެ ފުރުޞަތު، ޤައުމީ އިނާމާބެހޭ ކޮމިޓީން ހުޅުއްވައިލައްވައި، އިނާމު ދިނުމުގެ އުސޫލު ދިވެހި ސަރުކާރުގެ ގެޒެޓުގައި މިހާރު ވަނީ ޝާއިޢުކުރައްވާފައެވެ.
ދައުލަތަށް ޚިދުމަތް ކުރުމުގެ އިނާމަކީ، މިއަހަރު އަލަށް ތަޢާރުފު ކުރެއްވި އިނާމެކެވެ. މިއީ، ދިވެހި ދައުލަތަށް 35 އަހަރަށްވުރެ ދިގު މުއްދަތަކަށް ޚިދުމަތް ކޮށްފައިވާ މުވައްޒަފުންގެ ތެރެއިން، މަގާމުގެ މަސްއޫލިއްޔަތު އަދާކުރުމުގައި ޤާބިލުކަމާއި އިޚްލާޞްތެރިކަމާއެކު ކޮށްފައިވާ ޚިދުމަތްތަކަށާއި، އެ މުއައްސަސާއެއްގެ ކުރިއެރުމަށް ކޮށްދީފައިވާ ޚިދުމަތްތަކުގެ އަގުވަޒަންކުރުމުގެގޮތުން ޤައުމީ ފެންވަރުގައި ދިވެހި ދައުލަތުން ރައީސުލްޖުމްހޫރިއްޔާ ދެއްވާ އެންމެ ޝަރަފުވެރި އިނާމެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަވަމުން ޤައުމީ އިނާމާބެހޭ ކޮމެޓީގެ ޗެއަރޕަރސަން އަނީސާ އަޙްމަދު ވިދާޅުވީ، މި އިނާމާގުޅޭގޮތުން ވަޒީރުންގެ މަޖިލީހުގައި މަޝްވަރާކޮށް، މި އިނާމް ދެއްވުމަށް ރައީސުލްޖުމްހޫރިއްޔާ ނިންމެވި ހިސާބުން އިނާމު ދިނުމުގެ އުޞޫލުތައް އެކުލަވާ ކަނޑައެޅުމަށް ކޮމެޓީގެ ފަރާތުން ކަމާބެހޭ ފަރާތްތަކާއި މަޝްވަރާކުރައްވާފައިވާކަމަށެވެ. އަދި އިނާމު ދިނުމުގެ އުސޫލު އެކުލަވާލާފައިވަނީ އެ ފަރާތްތަކުން ދެއްވި ޚިޔާލާ މަޝްވަރާތަކަށް ރިޢާޔަތްކުރެއްވުމަށްފަހުކަމަށް އަނީސާ ވިދާޅުވިއެވެ.
އަނީސާ ވިދާޅުވީ، މި އިނާމަށް ސަރުކާރާއި، ޤާނޫނު ހަދާ މަޖިލީހާއި، އަދުލު އިންސާފު ޤާއިމުކުރުމުގެ ދާއިރާއާއި، ސަރުކާރު ކުންފުނިތަކާއި، ސަރުކާރުގެ މެޖޯރިޓީ ހިއްސާ އޮންނަ ކުންފުނިތަކުގައި މަސައްކަތްކުރައްވާފައިވާ ނުވަތަ މިހާރުވެސް މަސައްކަތްކުރައްވަމުންގެންދަވާ ބޭފުޅުންނަށް ކުރިމަތިލެއްވޭނެކަމަށެވެ. އަދި ކުރިން މަސައްކަތްކުރައްވާފައިވާ އޮފީހެއް ނުވަތަ އިދާރާއަކީ މިހާރު ނެތްތަނެއްކަމަށްވިޔަސް، މަސައްކަތްކުރެއްވި ދުވަސްވަރުގެ ލިޔެކިޔުންތަކާއެކު އެފަރާތްތަކަށްވެސް އިނާމަށް ހުށަހެޅޭނެކަމަށް އަނީސާ ވިދާޅުވިއެވެ. މި އިނާމަށް އަމިއްލަ ނަމުގައި ނުވަތަ އެހެން މީހެއްގެ ނަމުގައި ނުވަތަ މުއައްސަސާއެއްގެ ނަމުގައި ނަން ހުށަހެޅޭނެއެވެ. އެހެންނަމަވެސް ދުނިޔެ ދޫކުރައްވާފައިވާ ބޭފުޅެއްގެ ނަމެއް މި އިނާމަށް ހުށަނޭޅޭނެކަމަށް އަނީސާ ވިދާޅުވިއެވެ.
"ވަރަށް ގިނަ ބޭފުޅުން ތިއްބަވާނެ ދައުލަތަށް ވަރަށް ގިނަ ދުވަހު ޚިދުމަތްކުރައްވާފައި، މިހާރު ދުނިޔޭގައި ނެތް ބޭފުޅުންދެއްތޯ؟ އެހެންވީމަ އެއްބަޔަކަށް ދީފައި އަނެއްބަޔަކަށް ނުދޭން، އެހާ ގިނަ މަޢުލޫމާތުތަކެއް އެއްކުރުމަށް ވަރަށްވެސް އުނދަގޫވާނެ. އެހެންވީމަ މި އިނާމު ހަޤީޤަތުގައި ލިބިވަޑައިގަންނަވާނީ މިހާރު ދުނިޔޭގައި ތިއްބެވި ބޭފުޅުންނަށް" އަނީސާ ވިދާޅުވިއެވެ.
އަނީސާ ވިދާޅުވީ، ދިވެހިރާއްޖޭގެ ޢިއްޒަތުގެ ޤާނޫނުގެ ދަށުން ޢިއްޒަތް ދީފައިވާ މީހުންނާއި، ޝަރަފުވެރިކަމުގެ ޤައުމީ އިނާމު ނުވަތަ ހިތްވަރު ދިނުމުގެ ޤައުމީ އިނާމު ދީފައިވާ މީހުންގެ ތެރެއިން، އެ މީހަކު އަދާކުރާ ނުވަތަ އަދާކުރި ވަޒީފާގެ މައިގަނޑު މަސައްކަތާ ސީދާ ގުޅުން ނެތް ދާއިރާއަކުން އިނާމު ލިބިފައިވާ މީހުންނަށްވެސް މި އިނާމަށް ކުރިމަތިލެއްވޭނެކަމަށެވެ. އަދި ކުންފުނިތަކުގެ ފަރާތުން ނަން ހުށަހަޅާނަމަ، އެކުންފުންޏެއްގެ ޑިރެކްޓަރުންގެ ބޯޑުގެ ލިޔުމެއްވެސް ހުށަހަޅުއްވަންޖެހޭނެކަމަށެވެ.
ދިވެހި ދައުލަތަށް ޚިދުމަތް ކުރުމުގެ އިނާމު ދިނުމަށް ކަނޑައެޅުމުގައި ޤައުމީ އިނާމާބެހޭ ކޮމިޓީން ބަލާނެ ކަންކަމުގެ ތެރޭގައި، މަގާމުގެ މަސްއޫލިއްޔަތު އަދާކުރުމުގައި، ޤާބިލުކަމާއި، ފަރުވާތެރިކަމާއި، އިޚްލާޞްތެރިކަމާއެކު ކޮށްފައިވާ މަސައްކަތްތަކާއި، އެމީހަކަށް ލިބިފައިވާ ޤާބިލުކަމެއް ބޭނުންކޮށްގެން މުޅި މުއައްސަސާގެ ކުރިއެރުމަށް ކޮށްފައިވާ ފާހަގަކުރެވޭ ޚާއްޞަ މަސައްކަތްތައް ހިމެނެއެވެ. އަދި އެ މުއައްސަސާއިން ހިންގައިފައިވާ އެކިއެކި ކަންކަމުގައި ޢަމަލީގޮތުން ބައިވެރިވެ ޚިދުމަތް ކޮށްފައިވާ މިންވަރާއި، ވަޒީފާގެ ދާއިރާއިން ހާސިލުކޮށްފައިވާ ކާމިޔާބީއަށްވެސް ބައްލަވާނެއެވެ. އެމީހެއްގެ މައްޗަށް މަދަނީ އަދި ޖިނާއީ ކުށެއްގެ ތުހުމަތެއް ކުރެވިފައިވާކަން ނުވަތަ ނޫންކަންވެސް ކޮމިޓީން ޔަޤީން ކުރައްވާނެއެވެ.
މި އިނާމު ދެއްވުމުގައި ކޮމިޓީން ބައްލަވާނެ އަސާސީ ޝަރުޠުތަކުގެ ތެރޭގައި، އިނާމަށް ހުށަހެޅިފައިވާ މީހަކީ، އެމީހެއްގެ މައްޗަށް ޖިނާއީ މައްސަލައެއް ސާބިތުވެފައިވާ މީހެއްކަމުގައި ނުވުމާއި، އިނާމަށް ހުށަހެޅިފައިވާ މީހާގެ މައްޗަށް ޝަރުޢީގޮތުން ކޮށްފައިވާ ޙުކުމަކާ ގުޅިގެން ސާބިތު ދަރަންޏަކަށް ފައިސާ ދައްކަންޖެހިގެން އެ ފައިސާ ގަވާއިދުން ދައްކަމުން ގެންދާ މީހަކަށްވުން ހިމެނެއެވެ. މި އިނާމަށް ފުރުޞަތު ހުޅުއްވައިލައްވާފައިވަނީ މެއި މަހުގެ 30 ވާ އާދިއްތަ ދުވަހުން ފެށިގެން އޮގަސްޓް މަހުގެ 12 ވާ ބުރާސްފަތި ދުވަހުގެ ނިޔަލަށެވެ. މި މުއްދަތުގެ ތެރޭގައި ފުރިހަމަކުރަންޖެހޭ ލިޔެކިއުންތަކާއެކު އިނާމަށް ފޯމް ހުށަހެޅުއްވުމަށް ޚާއްޞަ ސަމާލުކަމެއް ދެއްވުމަށް ޤައުމީ އިނާމާބެހޭ ކޮމިޓީން ވަނީ އެދިވަޑައިގެންފައެވެ.
ދިވެހި ދައުލަތަށް ޚިދުމަތް ކުރުމުގެ އިނާމުގެ ގޮތުގައި ރައީސުލްޖުމްހޫރިއްޔާ ދެއްވާނީ އައްޑަނައަކާއި، ޝަރަފުގެ ބެޖަކާއި، ހަނދާނީ ފިލައެކެވެ. މި އިނާމު ދެއްވާނީ ޖުމްހޫރީ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ.