ދެކުނު ކޮރެއާގެ މޮޓޯ ކުންފުނި ހިޔުންޑާއީގެ ޗައިނާ ކާރުޚާނާއެއް ވިއްކާލަން ނިންމައިފިއެވެ.
ޗައިނާގެ ވެރިރަށް ބެއިޖިންގައި ހުންނަ މި ކާރުޚާނާ ވިއްކާލުމުގެ ވާހަކަތައް ޗައިނާ ސަރުކާރާއި ދައްކަމުންދާކަމުގައި ބެއިޖިންގެ ނޫހަކުން ރިޕޯޓް ކުރެއެވެ. ނަމަވެސް ހިޔުންޑާއީން މިކަމާއި ބެހޭގޮތުން އަދި ރަސްމީކޮށް އެއްވެސް އެއްޗެއް ނުބުނެއެވެ.
މި ކާރުޚާނާއަކީ ހިޔުންޑާއީން އެންމެ ފުރަތަމަ ބެއިޖިންގެ ޝުންޔީ ޑިސްޓްރިކްޓްގައި ހުޅުވި ކާރުޚާނާއެވެ. މީގެ އިތުރުން ޗައިނާގެ ބީއޭއައިސީ މޮޓޯ ކޯޕަރޭޝަން އާއި ހިޔުންޑާއީ ގުޅިގެން 3 ކާރުޚާނާއެއް ބެއިޖިންގައި ދަނީ ހިންގަމުންނެވެ.
ޗައިނާގެ ޚަބަރުތައް ގެނެސްދޭ މީޑިއާތަކުން ބުނާ ގޮތުގައި އިލެކްޓްރިކް ވެހިކަލް އުފައްދާ ލި އޮޓޯ އޮންއިން ވަނީ މި ކާރުޚާނާ ގަތުމުގެ ޝައުގުވެރިކަން ފާޅުކޮށްފައެވެ. ނަމަވެސް މި ކުންފުނިންވެސް މިކަމާއިބެހޭ ގޮތުން އަދި އެއްވެސް އެއްޗެއް ނުބުނެއެވެ.
ދުނިޔޭގެ އެންމެ ބޮޑު ބާޒާރަކަށް މިހާރުވެފައިވާ އިލެކްޓްރިކް ވެހިކަލް އުފެއްދުމުގެ ބާޒާރަށް ވަނުމުގެ ގޮތުން ހިޔުންޑާއީން ވަނީ 2022 ވަނަ އަހަރުން ފެށިގެން ކޮންމެ އަހަރަކު ޗައިނާގައި އިލެކްޓްރިކަލް ވެހިކަލްއެއް ލޯންޗް ކުރަން ތައްޔާރުވަމުންނެވެ.
ހިޔުންޑާއީ އަދި ޗައިނާގެ ބީއޭއައިސީއާއެކު ހަދާފައިވާ ޖޮއިން ވެންޗަރ ކުންފުނި އުފެދިފައިވަނީ 2002 ވަނަ އަހަރުއެވެ. ބެއިޖިންގ ކައިރީގައި އޮންނަ ކުޑަކުޑަ ޝުންޔީ ޑިސްޓްރިކްޓްގައި ހުންނަ މި ކާރުޚާނާއިން ޗައިނާގެ ބާޒާރަށް ހިޔުންޑާއީގެ އުފެއްދުންތައް އުފައްދައެވެ. އެގޮތުން މިހާތަނަށް ގާތްގަނޑަކަށް 1.8 މިލިއަން ވެހިކަލް މި ކުންފުނިން ވަނީ އުފައްދާފައެވެ.