ކޯވިޑްގެ ބަލިމަޑުކަމުން އަރައިގަނެ ޤައުމުތަކުގެ އިޤްޠިޞާދު އާރާސްތުކުރުމަށް އެހިތެރިކަން ފޯރުކޮށްދޭނެކަމުގެ ޔަޤީންކަން އެރުވުމުގެގޮތުން ދުނިޔޭގެ އެންމެ މުއްސަނދި 7 ޤައުމުގެ މާލީ ވަޒީރުންގެ ބައްދަލުވުމެއް އަންނަ ހަފްތާ ތެރޭގައި ބޭއްވުމަށް ހަމަޖެހިއްޖެއެވެ.
މި ބައްދަލުވުމުގައި ވިޔަފާރިތަކުން ޓެކްސް ނެގޭނެ އެންމެމަދު މިންވަރާއިމެދު ޤައުމުތަކުގެ މެދުގައި އެއްބަސްވުމަކަށް އައުމަށް މަޝްވަރާކުރާނެއެވެ. މި ބައްދަލުވުން ބާއްވަން ހަމަޖެހިފައިވަނީ މި މަހުގެ 4 އިން 5 އަށް އިނގިރޭސިވިލާތުގެ، ލަންޑަންގައެވެ.
ޖީ7 ޤައުމުތަކަކީ ޖަޕާން، އިނގިރޭސިވިލާތް، ޖަރުމަނުވިލާތް، އެމެރިކާ، ފްރާންސް، އިޓަލީ އަދި ކެނެޑާއެވެ.
ޖީ 7ގެ އޮފިޝަލުން ވިދާޅުވީ ބައްދަލުވުމުގައި ބަލިމަޑުކަމުން އަރައިގަނެވި އިޤްޠިޞާދުތައް އާރާސްކުރެވުނުހާ އަވަހަކަށް ދެމެހެއްޓެނިވި ގޮތަކަށް ދިގުމުއްދަތަކަށް ޚަރަދުކުރެވޭނެ ކަމުގެ ޤާބިލުކަން ޤައުމަތުގައި ހުރިތޯ ޔަޤީން ކުރާނެކަމަށެވެ. މީގެއިތުރުން ޤައުމުތަކަށް ދޭންޖެހޭ ޕޮލިސީ ސަޕޯޓް ދިނުމާއި އިޤްޠިޞާދު އާރާސްކުރުމަށް އިންވެސްޓްކުރުމާއި ރަނގަޅު ފެންވަރުގެ ވަޒީފާތައް އުފައްދައި މޫސުމީ ބަދަލުތަކާއި ބެހޭގޮތުން ބައްދަލުވުމުގައި ވާހަކަ ދައްކަން ހަމަޖެހިފައިވާކަމަށްވެސް ޚަބަރުތައް ބުނެއެވެ. މީގެ އިތުރުން މި ބަލިމަޑުކަމުން އަރައިގަނެވުނުހާ އަވަހަކަށް މުސްތަޤުބަލްގައި އަތުވެދާނެ މިފަދަ ކާރިސާއަކަށް ތައްޔާރުވުމުގެ ގޮތުން ދެމެހެއްޓެނިވިގޮތެއްގައި ދިގު މުތައްދަކަށް ޚަރަދު ކުރުމުގެ ޤާބިލުކަން ޤައުމުތަކުގައި ހުރިތޯ ޔަޤީންކުރަން ޖެހޭކަމަށްވެސް ޚަަބަރުތައް ބުނެއެވެ.
މިދިޔަ އަހަރު މާރިޗްމަހު މުޅި ދުނިޔެއަށް ކުރިމަތިވި މި ބަލިމަޑުކަން ފެށުނީއްސުރެ ޖީ7 ގެ ޤައުމުތަކުން ދަނީ އެ ޤައުމުތަކުގެ އިޤްޠިޞާދު އަލުން ކޮޅަށް ޖެހުމަށް ގިނަ ޢަދަދެއްގެ ފައިސާ ޚަރަދުކުރަމުންނެވެ.
ދަޢުލަތުގެ މާލިއްޔަތަށް އަންނަ ގޮންޖެހުންތައް ކުޑަކުރުމަށްޓަކައި އޮގަނައިޒޭޝަން ފޯ އިކޮނޮމިކް ކޯޕަރޭޝަން އެންޑް ޑިވެލޮޕްމަންޓް (އޯއީސީޑީ) ކަނޑައަޅާފައިވާ ވިޔަފާރިތަކުން ޓެކްސް ނެގޭނެ އެންމެމަދު މިންވަރަށް ޖީ7 ގެ ޤައުމުތަކުން ވަރަށް ބޮޑަށް ތާޢިދު ކުރާކަމަށް ޚަބަރުތައް ބުނެއެވެ. މީގެ ސަބަބުން ބޮޑެތި މަލްޓިނޭޝަނަލް ކުންފުނިތަކުންވެސް އިންސާފުވެރި ޓެކްސްއެއް ދައްކާނެކަމަށްވެސް ތަޖުރިބާކާރުން ބުނެއެވެ.
އެމެރިކާއިން ވަނީ ވިޔަފާރިތަކުން ޓެކްސް ނެގޭނެ އެންމެމަދު މިންވަރު 21 އިންސައްތައިން 15 އިންސައްތައަށް ކުޑަކުރުމަށް މިދިޔަ މެއިމަހު ހުށަހަޅާފައެވެ.
މީގެ އިތުރުން މި ބަލިމަޑުކަމުން އަރައިނުގަނެވެނީސް ޤައުމުތަކުގެ އިޤްޠިޞާދު ރަނގަޅު ނުވާނެތީ ކޯވިޑް 19ގެ ވެކްސިން ހުރިހާ ޤައުމުތަކަށް ލިބިފައިވާ ކަން ޔަޤީންކުރުމަކީވެސް ޖީ7 ޤައުމުތަކުގެ އެއް މަޤްޞަދުކަމުގައި ޚަބަރުތައް ބުނެއެވެ. މިގޮތުން ޤައުމުތަކަށް ވެކްސިން ފޯރުކޮށްދިނުމަށްޓަކައި ވެކްސިން ގަތުމަށް އައިއެމްއެފްގެ ފަންޑު ބޭނުން ކުރުމަށް ޖީ7ގެ ޤައުމުތަކުން އައިއެމްއެފްއަށް ގޮވާލާނެކަމަށްވެސް ޚަބަރުތައް ބުނެއެވެ.