ޗައިނާގެ ވިޔަފާރިތައް ތަމްސީލުކުރާ މަންދޫބު، ވައިސް ޕްރިމިއަރ ލިޔު ހީ އާއި އެމެރިކާގެ ޓްރެޝަރީ ސެކްރެޓަރީ ޖެނެޓް ޔެލެން ބައްދަލުކުރައްވައިފިއެވެ.
ބުދަ ދުވަހު ފޯނުން ގުޅުއްވައި ބޭއްވެވި މި ބައްދަލުވުމުގައި ދެ ޤައުމުގެ ދެމެދުގައި ޤާއިމުކުރެވިފައިވާ އެއްބަސްވުމާއި އިޤްޠިޞާދީ ޙާލަތު އަދި ދެފަރާތުންވެސް ކަންބޮޑުވާ ބައެއް ކަންތައްތަކާއި މަޝްވަރާކޮށްފައިވާކަމަށް ޚަބަރުތައް ބުނެއެވެ. ނަމަވެސް ޓެކްސްއާއި ގުޅިގެން އަޅާފައިވާ ފިޔަވަޅުތަކަށް ނިމުމެއް ގެނައުމުގެ އިޝާރާތެއް ދެ ޤައުމުންވެސް ދީފައިނުވާކަމަށް ޚަބަރުތައް ބުނެއެވެ.
ޗައިނާއިން ބޭރުކުރާ މުދަލުން ނަގާ ޓެކްސް އިތުރުކުރުމަށް އެމެރިކާގެ ކުރީގެ ރައީސް ޑޮނާލްޑް ޓްރަމްޕް އަޅާފައިވާ ފިޔަވަޅުތައް ލުއިކުރަން ހަދާނެ ގޮތެއް ޖެނުއަރީމަހު އެމެރިކާގެ ވެރިކަމާއި ޙަވާލުވި ޖޯ ބައިޑަން މިހާތަނަށް ހާމަކޮށްފައެއްނުވެއެވެ.
ޗައިނާއިން ވަނީ އެމެރިކާއިން އެޤައުމަށް އެތެރެކުރާ ސޯޔާ ބީންސްއިން ނަގާ ޓެކްސް އިތުރުކޮށް އެހެނިހެން މުދަލުންވެސް ނަގާ ޓެކްސް އިތުރުކޮށްފައެވެ.
އެމެރިކާގެ ވިޔަފާރިތަކާއި ޓެކްސްގެ މައްސަލަތައް ތަމްސީލުކުރާ ކެތްރީން ތައި އާއި ލިޔު ވަނީ މިދިޔަ ހަފްތާ ފޯނުން ގުޅުއްވައި މަޝްވަރާ ކޮށްފައެވެ. މި ބައްދަލުވުމުގައި މަޝްވަރާތައް ކުރީ ދެ ޤައުމުގެ ދެމެދުގައި ޤާއިމުކޮށްފައިވާ ވިޔަފާރީގެ ގުޅުން އަލުން މުރާޖާކުރުމާއި ބެހޭގޮތުންކަމަށް ކެތްރީންގެ އޮފީހުން ވަނީ ބުނެފައެވެ.
ޓެކްސްގެ މައްސަލަތައް ނިމުމަކަށް ގެނައުމަށް ފޭސް 1 ގެ ގޮތުގައި 2019 ވަނަ އަހަރުން ފެށިގެން ކޮންމެ މަހަކު އޮފިޝަލުންގެ ބައްދަލުވުންތައް އަންނަނީ ބާއްވަމުންނެވެ. މިގޮތުން ފޭސް 1 ގައި ދެ ފަރާތުންވެސް ވަނީ އެއްވެސް މުދަލަކުން ނަގާ ޓެކްސް އިތުރުނުކުރުމަށް އެއްބަސްވެފައެވެ.
އެމެރިކާއިން އެޤައުމަށް އެތެރެކުރާ ސޯޔާ ބީންސްއާއި އެހެނިހެން މުދާ ގިނައިން ގަންނާނެކަށް ޗައިނާއިން ބުނެފައިވީނަމަވެސް ކޯވިޑްގެ ބަލިމަޑުކަމާއި ހެދި ދުނިޔޭގެ ވިޔަފާރިތައް ބުރޫއެރުމާއެކު އެކަންތައް އަދި ފުރިހަމަނުކުރެވޭ ކަމަށްވެސް ޚަބަރުތައް ބުނެއެވެ.