ކޯވިޑް ބަލީގައި އުމުރުން 60 އަހަރު އަންހެނަކު ނިޔާވެއްޖެއެވެ. މި މީހާ ނިޔާވެފައިވަނީ ދަރުމަވަންތަ ހޮސްޕިޓަލިގައި ފަރުވާދެމުން ގެންދަނިކޮށް މިއަދު ހެނދުނުގެ ވަގުތެއްގައެވެ.
މިއަދު މިބަލީގައި ނިޔާވެފައިވަނީ ރައީސް އޮފީހުގެ މިނިސްޓަރ އަހްމަދު ސަމީރުގެ ދައްތައެވެ. ސަމީރު ވިދާޅުވީ ދައްތަ ކޯވިޑަށް ޕޮޒިޓިވްވެ އެ ބަލީގެ ފަރުވާ ހޯދަމުން ގެންދާތާ 21 ދުވަސްވެފައިވާކަމަށެވެ.
إِنَّا لِلَّهِ وَإِنَّا إِلَيْهِ رَاجِعُونَ
— Ahmed Sameer (@meeraazu) June 11, 2021
ކޯވިޑްގެ ބަލީގެ ވޭނުގައި 21 ދުވަހަށް ފަހު އަޅުގަނޑު ގެ ލޮބުވެތި ދައްތަ އާމިނަތު ޒާހިރާ ، މިއަދު 11 ޖޫން 2021 ވީ ހުކުރު ، ދުވަހުގެ ހެދުނު ވަނީ ނިޔާވެފަ. ދައްތައަށް ސުވަރުގޭގެ ދާއިމީ ނިޢުމަތް މިންވަރު ކުރައްވާށި. އާމީން
މި މަރާއި އެކު މިބަލީގައި ރާއްޖެއިން ނިޔާވި މީހުންގެ އަދަދު މިވަނީ ދުއިސައްތައާއި ގާތްކޮށްފައެވެ. މިހާތަނަށް 192 މީހުން ރާއްޖެއިން ނިޔާވިއިރު އޭގެތެރޭގައި ހިމެނެނީ 175 ދިވެހިންނާއި 17 ބިދޭސީންނެވެ.
ކޯވިޑް ބަލީގައި ރާއްޖޭގެ ހާލަތު މިދިޔަ މަހު ގޯސްކޮށް އޮތުމަށްފަހު މިހާރު އަންނަނީ ރަނގަޅުވަމުންނެވެ. މިދިޔަ މޭމަހު ދުވާލަކަށް ކޯވިޑް ޖެހޭ މީހުންގެ އަދަދު 1000 މަތީގައި 19 ދުވަހު ހުއްޓެވެ. އަދި މަހުގެ 20 ވަނަ ދުވަހު މިއަދަދު ވަނީ 2000 މައްޗަށްވެސް އަރާފައެވެ. މޭމަހު ކޯވިޑްގެ ހާލަތު ގޯސްވުމުން ރައްކާތެރިކަމުގެ ފިޔަވަޅުތައް އިތުރަށް ވަރުގަދަކުރުމުން މި ބަލީގައި ޕޮޒިޓިވްވާ މީހުންގެ އަދަދު ދަށްވަމުން އައިސް މިހާރުވަނީ އަދަދުތައް 500 އިން ދަށަށް ވެއްޓިފައެވެ.