ދުނިޔޭގެ އެންމެ މުއްސަނދި ހަތް ޤައުމުތަކުގެ ބޭންކުތަކުން ކުރިއަށްއޮތް ފަސް އަހަރު ދުވަހަށް 80 މިލިއަން ޑޮލަރު އެފްރިކާގެ ކުންފުނިތަކަށް ދޭން ނިންމައިފިއެވެ.
ކޯވިޑްގެ ބަލިމަޑުމަކަމުން އަރައިގަތުމަށާއި މި ބަލިމަޑުކަމުގެ ސަބަބުން އިތުރަށް ގޯސްވެފައިވާ ފަޤީރުކަން ނައްތާލައިމުށް މިހާރުން ފެށިގެން 2025 ވަނަ އަހަރާއި ދެމެދު އިތުރު 425 ބިލިއަން ޑޮލަރު އެފްރާކާގެ ސަބް ސަހާރަން ސަރަޙައްދުތަކަށް ބޭނުންވާނެކަމަށް އައިއެމްއެފްއިން ވަނީ ލަފާކޮށްފައެވެ.
ޤައުމުތަކުން ދޭން އެއްބަސްވި 80 މިލިއަން ޑޮލަރަކީ މޫސުމީ ކާރިސާތައްވެސް ގިނަވެފައިވާ މި ސަރަޙައްދަށް އެމެރިކާގެ ޑިވެލޮޕްމަންޓް ފައިނޭންސް އިންސްޓިއުޝަން، ޑީއެފްއައި ޔޫރަޕް އަދި މުއްސަނދި ޤައުމުތަކުން މިފަދަ ބޮޑު ޢަދަދެއް އެއްފަހަރާ ދިން ފުރަތަމަ ފަހަރުކަމަށް ޚަބަރުތައް ބުނެއެވެ.
އެމެރިކާގެ އިންޓަރނޭޝަނަލް ޑިވެލޮޕްމަންޓް ފައިނޭންސް ކޯޕަރޭޝަން (ޑިއެފްސީ) ގެ ޗީފް އޮޕަރޭޓިންގ އޮފިސަރ ޑޭވިޑް މާރޗިކް ވިދާޅުވޮގޮތުގައި އެފްރިކާ ސަރަޙައްދުގައި އިންވެސްޓްކުރުން އިތުރުކުރުމަކީ މިހާރު ބައިޑަން ސަރުކާރުން ގެންގުޅޭ މުހިންމު އެއް ސިޔާސަތު ކަމަށެވެ. މީގެ އިތުރުން އެފްރިކާއަށް އަދިވެސް އެހީތެރިކަން ފޯރުކޮށްދިނުމުގައި އެ ބޭންކުން އެއްބާރުލުންދޭނެކަމަށް މިދިޔަ އަހަރު އެފްރިކާއަށް 6 ބިލިއަން ޑޮލަރު ދީފައިވާ ޔޫރަޕިއަން އިންވެސްޓްމަންޓް ބޭންކުގެ ވެރިޔާ ވޯރނަރ ހެޔަރވެސް ވަނީ ވިދާޅުވެފައެވެ.
މީޑިއާ ރިޕޯޓްތައް ބުނާގޮތުގައި މި ފިޔަވަޅު ހުޅަނގުގެ ޤައުމުތަކުން ނަގާފައި މިވަނީ އެފްރިކާ ސަރަޙައްދުގައި އިތުރުވަމުންދާ ޗައިނާ އަދި ރަޝިއާގެ އިޤްޠިޞާދީ އަދި ސިޔާސީ ނުފޫޒުގެ ބާރު ކުޑަކުރުމުގެ ގޮތުންނެވެ.
ދުނިޔޭގެ އެންމެ ފަޤީރު ބައެއް ޤައުމުތަކަށް ވެކްސިން ފޯރުކޮށްދިނުމުގެ މަޤްޞަދުގައި ދުނިޔޭގެ ސިއްޙަތު ޖަމިއްޔާއިން ވަނީ ކޮވެކްސް ޕްރޮގްރާމް މިދިޔަ އޭޕްރީލްމަހު ތަޢާރަފް ކޮށްފައެވެ. ނަމަވެސް މިކަމަށް މުއްސަނދި ޤައުމުތަކުގެ މާބޮޑު ތަރުޙީބެއް ލިބިފައިނުވާކަމަށް ޚަބަރުތައް ބުނެއެވެ.