ބައިނަލްއަޤުވާމީ ބޯޑަރުތައް މަޑުމަޑުން ހުޅުވާލަމުންދާތީ އޭވިއޭޝަން ސިނާޢަތް އަންނަ އަހަރު އާރާސްތުވާނެކަމަށް އެއަރ އޭޝިއާ ގްރޫޕްގެ ސީއީއޯ ޓޯނީ ފެނާންޑެޒް ވިދާޅުވެއްޖެއެވެ.
އެއަރ އޭޝިއާ ގްރޫޕްގެ ސީއީއޯ ޓޯނީ ފެނާންޑެޒް ވިދާޅުވީ ބޯޑަރުތައް ހުޅުވާލައި ދަތުރުފަތުރުތައް ފެށުމުން ދިމާވާނެ މައްސަލަތައް ޙައްލު ކުރުމަށް މިހާރުއްސުރެ ރަނގަޅު އުޞޫލުތަކެއް އެކަށައެޅުމަށް ސަރުކާރުތަކަށް މަސައްކަތްކުރަންޖެހޭކަމަށެވެ. މީގެ ތެރޭގައި ދަތުރުކުރުމަށް ބޭނުންވަނީ ކޮންކަހަލަ ލިޔުންތަކެއްކަމާއި އޭގެ އިތުރަށް ބޭނުންވާ އެހެނިހެން ކަންތައްތައްވެސް ސާފުކޮށް އެގޭނެހެން ޢާންމުކުރުން މުހިންމުކަމުގައި އޭނާ ވިދާޅުވިއެވެ.
މީގެއިތުރުން އަންނަ ސެޕްޓެމްބަރު ނުވަތަ އޮކްޓޫބަރުމަހު އެތެރޭގެ އުދުހުންތަކާއި ބައެއް ބައިނަލްއަޤުވާމީ އުދުހުންތަކަށް އަލުން ހުޅުވާލާއިރު މި ހުރިހާ ކަމެއް ނިމިފައިހުރުން މުހިންމުކަމުގައިވެސް ޓޯނީ ވިދާޅުވިއެވެ.
ކޯވިޑްގެ ބަލިމަޑުކަން ކުރިމަތިވުމާއެކު އެންމެ ބޮޑު އަސަރެއްކުރި އެއް ސިނާޢަތަކީ އޭވިއޭޝަން ސިނާޢަތެވެ. މުޅި ދުނޔެއަށް ބަލާއިރު ދަތުރުފަތުރުކުރާ މީހުން މިދިޔަ އަހަރު ވަނީ ބޮޑުތަނުން ދަށަށްގޮސްފައެވެ. ބަލިމަޑުކަމުގެ ކުރިން 4.5 ބިލިއަން މީހުނަށްވުރެ ގިނައިން މީހުން އެއްތަނުން އަނެއްތަނަށް ދަތުރުކުރިއިރު ބަލިމަޑުކަމާއިއެކު މި ޢަދަދު ވަނީ 1.76 ބިލިއަނަށް ވެއްޓިފައެވެ.
މިދިޔަ އަހަރު އޯގަސްޓްމަހު ހަދާފައިވާ ދިރާސާއަކުން ދައްކާގޮތުގައި 33 އިންސައްތަ މީހުން ނިންމާފައިވަނީ ބަލިމަޑުކަން ކޮންޓްރޯލް ވީކަމުގައިވިޔަސް އަދި އިތުރު މަހެއް ނުވަތަ ދެ މަހެއް ފަހުން އެމީހުން ދަތުރުތައް ރޭވުން މަޑުޖެއްސުމަށް ނިންމާފައެވެ. މާލީ ގޮތުން މި ސިނާޢަތަށް ލިބުނު ގެއްލުމަށް ބަލާއިރު ދަތުރުކުރާ މީހުން އުފުލާ އެއާރލައިންތަކުން ލިބުނު ޢާމްދަނީއަކީ 189 ބިލިއަން ޑޮލަރުކަމަށްވާއިރު ބަލިމަޑުކަމުގެ ކުރީން ލިބިފައިވަނީ 581 ބިލިއަން ޑޮލަރެވެ. މީގެއިތުރުން އެއަރޕޯރޓްތަކަށް މިދިޔަ އަހަރުވަނީ 124.8 ބިލިއަން ޑޮލަރުގެ ގެއްލުން ލިބިފައެވެ. އަދި މިއަހަރު 94 ބިލިއަން ޑޮލަރުގެ ގެއްލުން ލިބޭނެކަމަށްވެސް ވަނީ ލަފާކޮށްފައެވެ.