ކުޑަކުދިންގެ ރައްކާތެރިކަން ކަށަވަރުކުރުމަށް ކުރާ މަސައްކަތް މިހާރަށްވުރެ ވަރުގަދަވާންޖެހޭ: ޖެންޑަރ މިނިސްޓަރ
ކުޑަކުދިންގެ ރައްކާތެރިކަން ކަށަވަރުކުރުމަށް މުއައްސަސާތައް ގުޅިގެން ކުރާ މަސައްކަތް މިހާރަށްވުރެ ބަދަހިވެ ވަރުގަދަވާންޖެހޭ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޢާއިޝަތު މުޙައްމަދުދީދީ ވިދާޅުވެއްޖެއެވެ.
13 އަހަރުގެ ކުޑަކުއްޖަކު ރަޙީނުކޮށް، މަރާލުމަށްފަހު އެއްލާލާފައި އޮއްވާ ފެނުނު މައްސަލައާ ގުޅިގެން ކުރެއްވި ޓުވީޓެއްގައި ޖެންޑަރ މިނިސްޓަރ ޢާއިޝަތު މުޙައްމަދުދީދީ ވިދާޅުވީ، ލޯތްބާއި، އަޅާލުމާއެކު ރައްކާތެރިކަމުގައި ބޮޑުވުމުގެ ހައްގު ލިބިފައިވާ ކުޑަކުއްޖެއްގެ ފުރާނަ ގަސްދުގައި ދުއްވާލުމަކީ މުޅި ޤައުމު ކަރުނަ އަޅަންޖެހޭ ވަރުގެ ކަމެއްކަމަށެވެ. އަދި މިފަދަ އަނިޔާވެރި ޢަމަލުތައް ތަކުރާރުވިޔަ ނުދިނުމަށްޓަކައި މުޅި މުޖުތަމަޢުގެ އަޅާލުމާއި، އެހީތެރިކަން މިހާރަށްވުރެ ފުރިހަމައަށް އެންމެ ޅައިރުއްސުރެ ފެށިގެން ކުދިންނަށް ބޭނުންވާކަމަށް މިނިސްޓަރ ވިދާޅުވިއެވެ.
ޖެންޑަރ މިނިސްޓަރ ވިދާޅުވީ، ކުޑަކުދިންގެ ރައްކާތެރިކަން ކަށަވަރުކުރުމަށްޓަކައި ސަރުކާރުން ކުރަމުން އަންނަ މަސައްކަތުގައި ކުރިމަތިވާ ގިނަ ގޮންޖެހުންތައް ނައްތާލުމަށްޓަކައި މުއައްސަސާތައް ގުޅިގެން ކުރެވޭ މަސައްކަތް މިހާރަށްވުރެ ބަދަހިވެ ވަރުގަދަވާން ޖެހޭކަމަށެވެ.
ލޯތްބާއި، އަޅާލުމާއެކު ރައްކާތެރިކަމުގައި ބޮޑުވުމުގެ ހައްގު ލިބިފައިވާ ކުޑަކުއްޖެއްގެ ފުރާނަ ގަސްދުގައި ދުއްވާލުމަކީ މުޅި ޤައުމު ކަރުނަ އަޅަންޖެހޭ ވަރުގެ ކަމެއް.
— Aishah Didi (@aishamdidi) June 22, 2021
13 އަހަރުގެ ފިރިހެން ކުއްޖަކު ރަހީނުކޮށް، މަރާލުމަށްފަހު ހުޅުމާލޭ ދެވަނަ ފިޔަވަހީގެ މޫދާ ދިމާލަށް އެއްލާލާފައި އޮއްވާ ފެނިފައިވަނީ ރޭ ދަންވަރު 02:38 ހާއިރެވެ. ކުއްޖާގެ ހަށިގަނޑު އައި.ޖީ.އެމް.އެޗަށް ގެންގޮސް، ފުލުހުންގެ ބެލުމުގެ ދަށުން ޓެސްޓުތަކެއްދަނީ ހަދަމުންނެވެ. މި މައްސަލައިގައި މިހާތަނަށް 2 މީހަކު ވަނީ ހައްޔަރުކޮށްފައެވެ. އެއީ 17 އަހަރުގެ ފިރިހެން ކުއްޖަކާއި 27 އަހަރުގެ ފިރިހެނެކެވެ.
މި ކުއްޖާ ރަހީނުކޮށްގެން އުޅޭކަމުގެ ރިޕޯޓް ފުލުހުންނަށް ހުށަހަޅާފައިވަނީ މިދިޔަ އާދިއްތަ ދުވަހުއެވެ. މި މައްސަލަ ފުލުހުން އަންނަނީ ވަރަށް ސީރިއަސް މައްސަލައެއްގެ ގޮތުގައި ތަޙްޤީޤުކުރަމުންނެވެ.