ޗައިނާ އޮސްޓްރޭލިއާ އަދި އެސޯސިއޭޝަން އޮފް ސައުތު އީސްޓް އޭޝިއާ ނޭޝަންސް (އާޝިއާން) އިން ބައިވެރިވާ ދުނިޔޭގެ އެންމެބޮޑު ވިޔަފާރީގެ އެއްބަސްވުންކަމަށްވާ ރީޖަނަލް ކޮމްޕްރިހެންސިވް އިކޮނޮމިކް ޕާރޓްނަރޝިޕް އާރްސީއީޕީގެ އެއްބަސްވުމުގައި ޖަޕާނުން ސޮއިކޮށްފިއެވެ.
މިދިޔަ އަހަރު ނޮވެމްބަރުގައި 15 ޤައުމަކުން ސޮއި ކޮށްފައިވާ މި އެއްބަސްވުމުގައި ސޮއިކުރާނެކަމުގެ ޔަޤީންކަންދިން 3 ވަނަ މެމްބަރު ޤައުމަކީ ޖަޕާނެވެ.
ސިންގަޕޫރު އަދި ޗައިނާއިން ވަނީ އެއްބަސްވުމުގައި ބައިވެރިވުމަށް ހުށަހަޅަންޖެހޭ ލިޔެކިޔުންތައް ހުށަހަޅާފައެވެ. ޖަޕާނުގެ ކެބިނެޓުން ހުކުރު ދުވަހު މި އެއްބަސްވުމުގައި ސޮއިކުރުމަށް ނިންމިއިރު މިއީ ޗައިނާ އަދި ދެކުނު ކޮރެއާ ހިމެނޭ އެއްބަސްވުމަކަށް ޖަޕާނުން ދާ ފުރަތަމަ ފަހަރެވެ.
މި އެއްބަސްވުމުގެ ސަބަބުން ޖަޕާނާއި އޭޝިއާ ޕެސިފިކް ރީޖަނާއި ދެމެދެ އޮންނަ ގުޅުން ރަނގަޅުވެ، ޖަޕާނުގެ އިޤްޠިޞާދަށް ރަނގަޅު ކުރިއެރުންތަކެއް ހޯދައިދޭނެކަމަށް ޖަޕާނުގެ އިޤްޠިޞާދާއި ވިޔަފާރި އަދި ސިނާޢަތްތަކާއިބެހޭ ވަޒީރު ހިރޯޝީ ކަޖިޔާމާ ވަނީ ވިދާޅުވެފައެވެ. އެއްބަސްވުމާއެކު ދުނިޔޭގެ ތިންވަނައަށް އެންމެބޮޑު އިޤްޠިޞާދެއް އޮންނަ ޖަޕާނުގެ ޖީޑީޕީ 2.7 އިންސައްތައަށް އުފުލިގެންދާނެކަމަށް އެޤައުމުގެ ސަރުކާރުން ލަފާކުރެއެވެ.
މިދިޔަ ނޮވެމްބަރުމަހު އެއްބަސްވުމުގައި ސޮއިކުރި 15 ޤައުމަށް އެއްބަސްވުމުގެ ދަށުން ޢަމަލުކުރަން ފަށާނީ 60 ދުވަސް ފަހުންނެވެ.
އާޝިއާންގެ 10 ޤައުމުކަމަށްވާ ބުރޫނާއި، ކެމްބޯޑިއާ، އިންޑޮނޭޝިއާ، ލާއޯސް، މެލޭޝިއާ، މިޔަންމާ، ފިލިޕީންސް، ސިންގަރޕޫރު، ތައިލޭންޑް، އަދި ވިއެޓްނާމްގެ އިތުރުން އޮސްޓްރޭލިއާ، ޗައިނާ، ޖަޕާން، ނިއުޒީލޭންޑް އަދި ދެކުނު ކޮރެއާ ހިމެނޭ އާރްސީއީ ގްރޫޕުން އެއްބަސްވާ މި އެއްބަސްވުމަކީ މިހާތަނަށް ޤާއިމުކުރާ އެންމެބޮޑު ސަރަޙައްދީ އެއްބަސްވުމެވެ.
މި އެއްބަސްވުމުގެ ވާހަކަ އެންމެ ފުރަތަމަ ދައްކާފައިވަނީ އިންޑިއާވެސް ހިމެނޭގޮތަށް 16 ޤައުމަކާއެވެ. ނަމަވެސް އިންޑިއާއިން ބޭނުންވާ މުހިންމު މައުޞޫތަކަށް އެއްބަސްވުމުގައި ވާހަކަ ނުދައްކާކަމަށްބުނެ ނޮވެމްބަރުމަހު އިންޑިއާއިން ވަނީ އެއްބަސްވުމުގައި ބައިވެރިވާން ބޭނުންނުވާނެ ކަމަށް ބުނެފައެވެ.