ސަރުކާރުގެ އިސް މަޤާމުތަކުގައި، އަންހެނުންގެ ނިސްބަތް %40އަށް އިތުރުކުރުމަކީ އަމާޒެއް - ޞަބްރާ
2025ވަނަ އަހަރާ ހަމަޔަށް ސަރުކާރުގެ އިސް މަޤާމުތަކުގައި ތިއްބަވާ އަންހެނުންގެ ނިސްބަތް %40 އިތުރުކުރުމަކީ މިސަރުކާރުގެ އަމާޒެއްކަމަށް ސްޕެޝަލް އެންވޯއީ ފޮރ ކްލައިމެޓް ޗޭންޖް ޞަބްރާ އިބްރާހީމް ނޫރައްދީން ވިދާޅުވެއްޖެއެވެ.
އެކަމަނާ މިހެން ވިދާޅުވީ، "ދަ ޖަނަރޭޝަން އިކުއަލިޓީ ފޯރަމް ހައިލެވެލް ވަރޗުއަލް ރައުންޑްޓޭބަލް"ގައި ރާއްޖެ ތަމްސީލުކުރައްވައި ދެއްކެވި ވާހަކަފުޅުގައެވެ. މޫސުމީ ބަދަލުތަކުގެ ސަބަބުން ދުނިޔޭގެ ވެށްޓަށްކުރާ ނޭދެވޭ އަސަރުތަކާ ދެކޮޅަށް ބޭނުންވާ ސިޔާސަތުތައް އެކަށައެޅުމުގައި މިންތީގެ ހަމަހަމަކަން ޤާއިމުކޮށް، އަންހެނުންގެ ބައިވެރިވުން އިތުރުކުރުމާގުޅޭގޮތުން ކުރިއަށްދިޔަ މި މަޝްވަރާ ބައްދަލުވުމުގައި ޞަބްރާވަނީ، ގިނަ އަންހެނުން އިސް މަޤާމުތަކަށް ޢައްޔަނުކުރެވިއްޖެނަމަ އަންހެނުންގެ ޚިޔާލުތައް، މޫސުމީ ކަންކަން ހައްލުކުރުމަށް ލިބިގެންދާނެކަން ފާހަގަކުރައްވާފައެވެ.
މި ބައްދަލުވުމުގައި ވާހަކަފުޅު ދައްކަވަމުން ޞަބްރާ ވަނީ ރާއްޖޭގައި ޖެންޑަރ އީކުއަލިޓީ ޕްލޭނެއް ނިމުމުގެ މަގުމަތީގައިވާކަން ފާހަގަކުރައްވާ އެ ޕްލޭން ނިމުމުން ރާއްޖޭގެ ސަރުކާރާއި މުޖުތަމަޢުގެ ހުރިހާ ހަރުފަތެއްގައި މި ޕްލޭންއާއި އެގޮތަށް ކަންކަން ތަންފީޒުކުރުމަށް ޚާއްޞަ އަހަންމިއްޔަތުކަމެއް ދެއްވާނެކަމުގައި ވިދާޅުވެފައެވެ. މި ޕްލޭގައި ހިމެނޭ ބައެއް މުހިންމު ކަންތައްތައްވެސް ޞަބްރާ ވަނީ ފާހަގަ ކުރައްވައިފައެވެ.
އެގޮތުން 2025ވަނަ އަހަރާ ހަމަޔަށް ސަރުކާރުގެ އިސް މަޤާމުތަކުގައި ތިއްބަވާ އަންހެނުންގެ ނިސްބަތް %40 އިތުރުކުރުމަށް ނިންމެވުމާއި، ޖުޑިޝަރީގައި %25 އިތުރުކުރުން މި ޕްލޭންގައި ހިމެނެއެވެ. އަދި ޑޭކެއާ ސަރވިސްތައް އިތުރުކޮށް، ޖެންޑަރ ރެސްޕޮންސިވް ބަޖެޓެއް ފެށުމާއި، ޤައުމުގެ ޑާޓާ ސިސްޓަމުގައި ހުރި ޖިންސީ އަދި އުމުރުގެ ތަފާތުކުރުންތައް ހުރި ކަންކަން ރިވައިސްކުރުންވެސް ހިމެނެއެވެ. ޞަބްރާ ވިދާޅުވީ އަންހެނުންގެ ބައިވެރިވުން އިތުރުވީ ވަރަކުން މުޖުތަމަޢުގައި ހުރި ކަންކަން ދެނެގަނެވި އެކަންކަން ހައްލުކުރުމަށް މަގުފަހިވެގެން ދާނެކަމަށެވެ.
އެކަމަނާ ވަނީ އަންހެނުންނާއި އަންހެން ކުދިން ބާރުވެރިކުރުމުގެ މުހިންމުކަމަށް އަލިއަޅުއްވާލައްވާ ޤައުމު އަލުން އާރާސްތުކުރުމަށާއި، ފެހި އަދި ނޫ އިޤްތިޞާދެއް ތަރައްޤީކުރުމަށް އެންމެން ހިމަނައިގެން މަސައްކަތްކުރުމުގެ މުހިންމުކަމުގެ މައްޗަށް ވާހަކަފުޅު ދައްކަވާފައެވެ. މީގެ އިތުރުން ޞަބްރާ ވަނީ މިހާރު މިއޮތް ކޯވިޑް-19ގެ ހާލަތުގައި ދުނިޔޭގެ ގިނަ ފަރާތްތަކަށް ކުރިމަތިވާ ދަތިތަކާއި ގުޅޭގޮތުން ވާހަކަފުޅު ދައްކަވާ އެގޮތުން މިދިޔަ އަަހަރު ޔޫ.އެން. ވިމެން އިން ކުރި ދިރާސާއިން ދައްކާ ގޮތުން ޕެންޑެމިކް ހާލަތުގައި ހީވެސްނުކުރާ ވަރަށް ގިނަ އަންހެނުންނަށް ނަފްސާނީ ގޮތުންނާއި، އެހެނިހެން ގޮތްގޮތުން އަސަރުކޮށްފައިވާ މިންވަރު އިތުރުވެފައިވާކަން ފާހަގަކުރައްވާފައެވެ.
ޞަބްރާ ވިދާޅުވީ، އަންހެނުންނާއި އަންހެން ކުދިންނަށް ހިތްވަރުދީ އަދި މޫސުމީ ބަދަލުތައް ކުޑަކުރުމަށާއި ރައްކާތެރިކަމުގެ ފިޔަވަޅުތައް އެޅުމަށް ހޭދަކުރުމަކީ ދުރު މުޞްތަޤްބަލަކަށް އަމާޒުކޮށް ކުރުމަށް ރާއްޖެ ނޫނަސް ހުރިހާ ޤައުމަކުންވެސް ނިންމަންވާނެކަމެއްކަން ފާހަގަކުރައްވާފައެވެ. އަދި މިކަމަކީ ވަކި ޤައުމަކަށް ދޫކޮށްލައިގެން ތިބެވޭނެކަމެއް ނޫންކަމުގައިވެސް އެކަމަނާ ފާހަގަކުރެއްވެވިއެވެ. ޞަބްރާ ވަނީ މިދާއިރާއިން މިހާރުވެސް ސަރުކާރުން ސިޔާސަތުތައް ކުރިއަރުވައި ތަންފީޒުކުރުމުގެ މަސައްކަތްތައް ކުރެވެމުންދާކަން ފާހަގަކުރައްވާފައެވެ. އަދި މިހާރުވެސް ރާއްޖޭގައި ތަންފީޒުކުރަމުންދާ ބައެއް ޕޮލިސީތަކުގެ މައްޗަށް އެކަމަނާ ވަނީ އަލިއަޅުވާލައްވާފައެވެ. އެގޮތުން 6 މަސް ދުވަހުގެ ޕެއިޑް މެޓަރނިޓީ ލީވް ދެމުންދާކަމާއި، 1 މަސް ދުވަހުގެ ޕެޓަރނިޓީ ލީވް ދެމުންދާކަމަށާއި، ސްޕްރީމް ކޯޓުގެ ފަނޑިޔާރަކަށް ފުރަތަމަ ފަހަރަށް އަންހެނުން ޢައްޔަނުކުރުމާއި، ލޯކަލް ކައުންސިލް އިންތިހާބުގައި 3 ބައިކޮށްފައި އެއްބައި އަންހެންނުނަށް ޚާއްޞަކޮށް އަންހެންނުން ޢައްޔަނުކޮށްފައިވާކަން ފާހަގަކުރައްވާފައިވެއެވެ.
މި ބައްދަލުވުމަކީ ޔޫ.އެން ވިމެން އިން އިންތިޒާމުކޮށް، މެކްސިކޯ އަދި ފްރާންސުން ކޯ ހޯސްޓްކޮށްގެން ކުރިއަށްގެންދިޔަ ފޯރަމެކެވެ. މި ފޯރަމްގެ މައިގަނޑު އަމާޒެއްގެ ގޮތުގައި ކަނޑައަޅުއްވާފައިވަނީ އީޖާދީ ގޮތެއްގައި އަންހެނުންނާއި އަންހެން ކުދިންގެ ދައުރު ހިމެނޭނެހެން، މޫސުމަށް އަންނަ ބަދަލުތަކަށް ހައްލު ހޯދުމަށް ކުރެވެންހުރި ކަންތައްތަކާއި ގުޅޭގޮތުން ވާހަކަދެއްކުމެވެ.