ގެދޮރުވެރިޔާ ލޯން ސްކީމުން ލޯނު ދޫކުރާ މިންވަރު އިތުރުކުރުމުގެ ވިސްނުން ސަރުކާރުން ގެންގުޅުއްވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ.
މި ލޯނު ސްކީމަކީ ރާއްޖޭގެ ބޯހިޔާވަހިކަމުގެ މައްސަލަ ހައްލުކޮށް، މި ދާއިރާއިން ރައްޔިތުންނަށް ބޭނުންވާ މާލީ އެހީތެރިކަން ފޯރުކޮށްދިނުމަށް ސަރުކާރުން ތަޢާރަފުކުރި ލޯނު ސްކީމެކެވެ. ފިޔަވަހިތަކަކަށް ބަހާލައިގެން ކުރިއަށްގެންދިއުމަށް ނިންމާފައިވާ މި ސްކީމުގެ ދަށުން މިވަގުތު ލޯނަށް އެދުމަށް ހުޅުވާލާފައިވަނީ އަތޮޅުތަކުގެ ރައްޔިތުންނަށެވެ. މި ލޯން ސްކީމް ސަރުކާރުން ރަސްމީކޮށް އިފްތިތާޙްކޮށްފައިވަނީ ޖޫން 14 ގައެވެ.
މި ސްކީމްގެ ދަށުން ލޯނުގެ ގޮތުގައި ދޫކުރާނީ މަޝްރޫއުގެ ޖުމުލަ އަދަދުގެ 80 އިންސައްތައަށްވާ ފައިސާއެވެ. އަދި ބާކީ 20 އިންސައްތައަކީ ލޯނު ނަގާ ފަރާތުގެ ހިއްސާއެވެ. އެ 20 އިންސައްތައަކީ މަޝްރޫއަށް ކޮށްފައިވާ ޚަރަދާއި ގަނެފައިވާ ތަކެތި ނުވަތަ ގޯތީގައި ބޭނުންކުރާ އިމާރާތް އަދި ހުސް ބިމެއް ނަމަ، އެ ބިމުގެ ގޮތުގައި ވެސް އަގުކުރެވިދާނެއެވެ. މި ސްކީމްގެ ދަށުން ގިނަވެގެން ނެގޭނީ 7 ލައްކަ ރުފިޔާއެވެ. އަދި 15 އަހަރާއި 20 އަހަރުގެ މުއްދަތެއް ލޯނު އަނބުރާ ދެއްކުމަށް ދީފައިވެއެވެ. ލޯނުގެ މޯގޭޖަކަށް ނަގާނީ އިމާރާތް ކުރެވޭ ތަން އެކަންޏެވެ. އިމާރާތް ކުރުމަށްދޭ ގްރޭސް ޕީރިއަޑަކީ 12 މަހާއި 15 މަހެވެ. އަދި މިލޯނަށް އެދެވޭނީ މަދުވެގެން ދެ ފަރާތް ހިމަނައިގެންނެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މިއަދު ނޫސްވެރިންނާއި ބައްދަލުކުރައްވާ ވިދާޅުވީ، ގެދޮރުވެރިޔާ ލޯން ސްކީމްގެ ސަބަބުން އަތޮޅުތަކުގައި ހަދަން ފަށާ ނުނިމި ހުރި ގެތައް ނިންމުމަށާއި، އަލުން އިމާރާތް ކުރުމަށްވެސް ރައްޔިތުންނަށް ފުރުޞަތު ލިބިގެންދާނެކަމަށެވެ. އަދި މިވަގުތު މި ސްކީމުގެ ދަށުން ކޮންމެ މީހަކަށްވެސް 7 ލައްކަ ރުފިޔާއާއި ހަމައަށް ލޯނު ދޫކުރިނަމަވެސް މިޢަދަދު އިތުރުކޮށް، ލޯނުގެ ގޮތުގައި ދޫކުރެވޭ މިންވަރު މައްޗަށް ޖެއްސުމުގެ ވިސްނުން ސަރުކާރުން ގެންގުޅުއްވާ ކަމަށް އެމަނިކުފާނު ވިދާޅުވިއެވެ.
"މިއީ ރަށްރަށުގައި ދިރިއުޅުއްވާ ފަރާތްތަކުން ހަދަން ފަށާ ނުނިމިހުރި ގެއާއި، ލިބިފައިވާ ގޯތީގައި އިމާރާތްކުރުމަށް ބޭނުންވާ އެހީތެރިކަން ފޯރުކޮށްދިނުމަށްޓަކާ ތަޢާރަފުކުރި ސްކީމެއް. މި ސްކީމުގެ ދަށުން ކޮންމެ މީހަކަށް 7 ލައްކަ ރުފިޔާއާއި ހަމައަށް ލޯނު ދޫކުރެވޭނެ. އެހެންނަމަވެސް ލޯނު ސްކީމަށް އިތުރުކޮށް މި ޢަދަދު ކުރިއަށްއޮތްތަނުގައި މައްޗަށް ޖެއްސުމަށްވެސް އަޅުގަނޑުމެން ވަނީ ވިސްނާފައި" ރައީސުލްޖުމްހޫރިއްޔާ ވިދާޅުވިއެވެ.
މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗރ އާއި އެޗް.ޑީ.އެފް.ސީ ގުޅިގެން ހިންގާ މި ސްކީމްގައި ލޯނަށް އެދޭ ފަރާތުގެ ނަމުގައި ބިމެއް ރަޖިސްޓްރީ ކުރެވިފައި އޮންނަން ޖެހެއެވެ. އަދި ބިން ރަޖިސްޓްރީ ކޮށްފައިވާ ރަށުގެ ރަށްވެއްސެއް ކަމުގައިވުމާއި ރަށްވެހިވެފައިވާ ރަށުގައި ލޯނަށް އެދޭ ފަރާތް ނުވަތަ އާއިލާ ދިރިއުޅުން ބިނާކޮށް އެރަށުގައި ދިރިއުޅޭތާ ތިން އަހަރުވެސް ވާންޖެހެއެވެ. ލޯނު ދިނުމުގައި އިސްކަންދެނީ ކައިވެނި ކޮށްގެން އުޅޭ ފަރާތްތަކާއި އެކަނި ދަރިން ގޮވައިގެން އުޅޭ ފަރާތްތަކަށެވެ.
މި ލޯން ސްކީމް ހިންގައި، މެނޭޖު ކުރާނީ އެޗްޑީއެފްސީންނެވެ. އެހެންނަމަވެސް ލޯނަށް އެދި ހުށަހަޅާ އެޕްލިކޭޝަންތައް އެޕްރޫވް ކުރާނީ އެޗްޑީއެފްސީއާއި ޕްލޭނިން މިނިސްޓްރީ ގުޅިގެން އެކުލަވާލާ ޖޮއިންޓް ކްރެޑިޓް ކޮމެޓީއަކުންނެވެ.