ފައިސާގެ ދަތިކަން ކުރިމަތިވެ ޙާލުގައި ޖެހިފައިވާ ލުބްނާންގެ އާޢިލާތަކަށް ފައިސާގެ އެހީ ދިނުމަށް ލުބްނާންގެ ޤާނޫނު ހަދާ މަޖީލީހުން ނިންމައިފިއެވެ.
މިއީ އަހަރަކު 556 މިލިއަން އެމެރިކާ ޑޮލަރު ހޭދަވާނެ ކަމެއް ކަމަށާއި މިކަމުގެ ސަބަބުން އާންމުކޮށް ކައިބޮއި އުޅޭ ތަކެތީގެ ސަބްސިޑީޒްއަށް 6 ބިލިއަން އެމެރިކާ ޑޮލަރު އިތުރުވެގެންދާނެކަމަށްވެސް ޚަބަރުތައް ބުނެއެވެ.
މި އެހީގެ ދަށުން ޝަރުތު ފުރިހަމަވާ ކޮންމެ އާޢިލާއަކަށް މަހަކު 93 ޑޮލަރު ލިބޭނެކަމަށް ލުބްނާންގެ ސަރުކާރުން ބުނެއެވެ.
މެދުއިރުމަތީގެ ޤައުމުތައް މިހާރު ވަނީ މާލީ ގޮތުން ވަރަށް ބޮޑެތި ގޮންޖެހުންތަކަކާއި ކުރިމަތިލާން ޖެހިފައެވެ. މިއާއެކު ޤައުމުތަކުގެ ދެބައިކުޅައެއްބައި މީހުން ވަނީ ފަޤީރުކަމަށް ހުށަހެޅި ކާބޯތަކެއްޗަށް ޖެހިފައެވެ. މީގެއިތުރުން 2019 ވަނަ އަހަރުން ފެށިގެން ލެބަނާންގެ ފައިސާގެ އަގު ވަނީ 90 އިންސައްތަ ދަށަށްގޮސްފައެވެ.
މާލީ ގޮންޖެހުންތަކުގެ ސަބަބުން އެ ޤައުމުގެ ރައްޔިތުން ދަނީ ސަރުކާރާއި ދެކޮޅަށް އަޑު އުފުލާ މުޒާހަރާ ކުރަމުންނެވެ. އަދި ބައިނަލްއަޤުވާމީ އެހީ ލިބޭނެ މަގުތައް ހޯދައި މާލީ ޙައްލެއް ހޯދުމަށް ލެބަނާންގެ ސަރުކާރުން ވަނީ ނުކުޅެދިފައި ކަމަށްވެސް ބައެއް ފަރާތްތަކުން ބުނެއެވެ.
ވޯލްޑް ބޭންކުން މީގެކުރިން ބުނެފައިވާ ގޮތުގައި ލެބަނާންއަށް ކުރިމަތިވެފައިވާ މި އިޤްޠީޞާދީ ހީނަރުކަމަކީ ވޭތުވެދިޔަ 150 ވަރަކަށް އަހަރުގައިވެސް ނުފެންނަ ވަރުގެ އިޤްޠިޞާދީ ހީނަރުކަމެކެވެ.
ރައްޔިތުންނަށް ކޮންމެހެން ބޭނުންވާ ބައެއް ތަކެތި ކަމުގައިވާ ބޭހާއި ތެޔޮ ލިބުން ވޭތުވެދިޔަ ދުވަސްތަކުގައި ވަނީ ވަރަށް ބޮޑަށް ދަތިވެފައެވެ. މީގެއިތުރުން ލުބްނާންގެ ހަކަތައާބެހޭ ވުޒާރާއިން ވަނީ ތެލުގެ އަގު 35 އިންސައްތައަށް ބޮޑު ކޮށްފައެވެ. ތެޔޮ ހޯދަން ދިގު ކިއުތަކުގައި ޖެހިގެން ތިބެންޖެހުމުގެ ސަބަބުން ރައްޔިތުންގެ މެދުގައި ވަނީ އިތުރު ހަމަނުޖެހުންތައް އުފެދިފައެވެ.