ކޯވިޑްގެ ބަލިމަޑުކަމާހެދި، 18 މަހަށްފަހު ކަނޑުމަގުން މުދާ އުފުލާ އަގުތައް އުފުލިއްޖެއެވެ.
ދޭދޭ ޤައުމުތަކަށް މުދާ ސަޕްލައިކުރުމާއި ކޮންޓައިނަރ ހިފައިގެން ކުރާ ދަތުރުތަކުގެ ކަންކަން ދިރާސާކުރާ، ސީ އިންޓެލިޖެންސްގެ ވެރިޔާ އެލަން މާރފީ ވިދާޅުވިގޮތުގައި މުދާ އުފުލާނެ އުޅަނދުތައް މަދުވެ ހުސް ކޮންޓެއިނަރު ވެސް ވަނީ މަދުވެފައެވެ. ހުސް ކޮންޓެއިނަރުތައް ހުރީ އެކި ތަންތަނުގައި ތާށިވެފައިކަމަށްވެސް އެލަން ވިދާޅުވިއެވެ.
ކަނޑުމަގުން މުދާ އުފުލާ އަގުތައް ބަލާ ބެންޗްމާރކްގައި އަގުތައް ހުރީ އަހަރެއްގެ ތެރޭގައި ތިންގުނައަށް އިތުރުވެފައެވެ. ޗައިނާއިން އެމެރިކާއަށް ކުރާ ދަތުރެއްގެ މިހާރުގެ އަގަކީ 7000 އެމެރިކާ ޑޮލަރެވެ. ޔޫރަޕަށް ކުރާ ދަތުރެއްގެ އަގު ވަނީ 10000 އެމެރިކާ ޑޮލަރަށް އުފުލިފައެވެ. މީގެ ކުރިން މިދިޔަ އަހަރު މި އަގު އުޅެނީ 1600 އެމެރިކާ ޑޮލަރުގައެވެ.
ކޯވިޑްގެ ބަލިމަޑުކަމުގެ ސަބަބުން ހީވެސްނުކުރާހާ ބޮޑަށް ޑިމާންޑް ދަށްވުމާއެކު ކަނޑުމަގުން މުދާއުފުލުން މުޅިންހެން ހުއްޓުނުކަމުގައި މާހިރުން ބުނެއެވެ. މީގެއިތުރުން ބަލިމަޑުކަމުގެ ސަބަބުން މުވައްޒަފުން ބަލިވުމާއި ، މުދާ އެރުވުމާއި ބޭލުމަށްވެސް ދަތިތައް ކުރިމަތިވެ މިއާއެކު ކޯވިޑުން ރައްކާތެރިވުމަށް އަޅާފައިވާ ފިޔަވަލުތަކުންވެސް މުދާ އުފުލުމަށް އިތުރު ދަތިތަކާއި ކުރިމަތިވިއެވެ. މާރިޗް މަހު މިޞްރުގެ ސުއޭސް ކެނަލްގައި ހުރަސްވީ ބޯޓުގެ ސަބަބުންވެސް މުދާ އުފުލުމަށް އެތައް ގެއްލުމެއް ކުރިމަތިވީކަމަށް ކަމާއިބެހޭ މާހިރު ވިދާޅުވެއެވެ.
ކޮންޓެއިނަރު އުފުލާ އަގު ބަރޯސާވަނީ އެއަށް އޮންނަ ޑިމާންޑެއްގެ މައްޗަށްކަމަށާއި ނަމަވެސް ޑިމާންޑްތަކަށް ބޭނުންވާވަރަށް މުދާ އުފެއްދިފައި ހުންނަންޖެހޭ ކަމަށްވެސް މާހިރުން ވިދާޅުވެއެވެ.
މުދާ އުފުލާ އުޅަނދުތަކުގެ ވެރިން އަގަށް ބަދަލެއް ގެންނާނެކަމަށް އެއްވެސް ވަރަކަށް އުންމީދު ނުކުރައްވާ ކަމަށް ގިނަ މާހިރުދެކެއެވެ. އަދި އަންނަ އަހަރުގެ ފުރަތަމަ ކުއާޓަރުގެ ކުރިން އަގުތައް ޢާއްމު ޙާލަތަކަށް ނުދާނެކަމަށްވެސް ގިނަ ފަރާތްތަކުން ބުނެއެވެ.