މިދިޔަ މާރިޗް މަހުގެ ފަހުކޮޅު މިޞްރުގެ ސުވޭސް ކެނަލްގައި ތާށިވި އާގުބޯޓު "އެވަރގިވަން" 106 ދުވަހަށްފަހު އިއްޔެ ދޫކޮށްލައިފިއެވެ.
ބޯޓު ދޫކޮށްލާފައި މިވަނީ ސުވޭސް ކެނަލް އޮތޯރިޓީ (އެސްސީއޭ)އާއި އެބޯޓު ނިސްބަތްވާ ޖަޕާނުގެ ކުންފުންޏާ ދެމެދު އެއްބަސްވުމަކަށް އާދެވިއްޖެކަމަށް އެސްއީސީއިން ބުނުމާއެކު މިޞްރުގެ ކޯޓުން އެބޯޓާ ދެކޮޅަށް އަޅާފައިއޮތް ޤާނޫނީ ފިޔަވަޅުތައް އުވާލިތާ އެއް ދުވަސް ފަހުންނެވެ.
"އެވަރގިވަން" ދޫކޮށްލީ މިޞްރުގެ ސަރުކާރުކުރުން ހުށަހަޅާފައިވާގޮތަށް އެބޯޓު ނިސްބަތްވާ ޖަޕާނުގެ ކުންފުނި "ޝޯއި ކިޝެން ކައިޝާ"އިން ބަދަލުދޭން އެއްބަސްވުމުން ކަމުގައި އެސްސީއޭއިން ބުނެއެވެ. މި އެއްބަސްވުމުގެ މާބޮޑު ތަފްޞީލެއް އެ ފަރާތުން ހާމަކޮށްފައިނުވިނަމަވެސް އެއްބަސްވުމުގައި ސޮއިކުރުން އޮތީ ސުވޭސް ކެނަލް ސިޓީ، އިސްލާމިއްޔާގައި ބުދަ ދުވަހު ބޭއްވި ރަސްމިއްޔާތެއްގައެވެ.
އެސްސީއޭގެ ވެރިޔާ އުސާމާ ރާބިޢީ މީގެކުރިން ވިދާޅުވެފައިވާގޮތުގައި މިޞްރު ސަރުކާރު ހުށަހަޅާފައިވާ ބަދަލަށް ދެ ފަރާތުންވެސް ވަނީ އެއްބަސް ވެފައެވެ. ނަމަވެސް މި ކަމުގެ ތަފްޞީލު ހާމަކުރާނީ އެންމެ ފަހުގެ އެއްބަސްވުމުގައި ސޮއި ކުރުމަށްފަހު ކަމަށްވެސް އޭނާ ވިދާޅުވިއެވެ.
މިދިޔަ މާރިޗް މަހުގެ 23ވަނަ ދުވަހު ސުވޭސް ކެނަލްގައި ހުރަސްވި ބޯޓު ފުންކުރެވުނީ 6 ދުވަސްފަހުން މާރިޗް 29ވަނަ ދުވަހުއެވެ. މި މުއްދަތުގެ ތެރޭގައި ބޯޓުފުންކުރުމަށާއި މިކަމުގެ ސަބަބުން އެސްސީއޭއަށް ލިބުނު ބަދުނާމުގެ ގެއްލުމާއި މީގެއިތުރުން ޢާމްދަނީގެ ގޮތުގައި ލިބުނު ގެއްލުމުގެ ބަދަލުގެގޮތުގައި 916 މިލިއަން ޑޮލަރު ދިނުމަށް އެސްއީއޭއިން މީގެކުރިން އެދިފައި ވީނަމަވެސް ފަހުން މި ޢަދަދު ވަނީ 550 މިލިއަން ޑޮލަރަށް ކުޑަކޮށްފައެވެ.
6 ދުވަސް ވަންދެން ސުވޭސް ކެނަލްގައި ތާށިވެފައި އޮތް އެވަރގިވަން ބޯޓުގެ ސަބަބުން ދުނިޔޭގެ ކާގޯގެ ދަތުރުތަކަށްވަނީ ބުރޫ އަރާފައެވެ. މިބޯޓު ފުންކުރަންދެން 100އަށްވުރެ ގިނަ ބޯޓު މަޑުކޮށްގެން ތިބެންޖެހުމާއި ބައެއް ބޯޓުތަކަށް ގިނަ ޢަދަދެއްގެ ތެޔޮ ޚަރަދުކޮށްގެން އެފްރިކާގެ ދެކުނުން އޮންނަ ދިގު މަގު "ކޭޕް އޮފް ގުޑް ހޯޕް" ޚިޔާރު ކުރަންޖެހުންފަދަ ގެއްލުންތައް ވަނީ ލިބިފައެވެ.