އެގްރި ސެންޓަރުން ދަނޑުވެރިކަމުގެ އިތުރު ބާވަތްތައް ގަތުމަށް ނިންމައިފިއެވެ.
އެސްޓީއޯ އެގްރި ސެންޓަރުން މިހާރު ދަނީ ދަނޑުވެރިންގެ އަތުން 17 ބާވަތެއް ގަންނަމުންނެވެ. އޭގެތެރޭގައި ހިމެނެނީ ކަރާ، ކެޕްސިކަމް، ޓޮމާޓޯ، ކައްޓަލަ، ދަނޑިއަލުވި، ކިޔުކަންބާ، މެލަން، ލެޓިއުސް، ޗައިނީޒް ކެބެޖް، ބީންސް، ބަށި، ބަރަބޯ، ބަޓާނަ، ފަތްކެޔޮ، ގިތެޔޮމިރުސް އަދި ތޮޅިމިރުހެވެ.
ޕީއެސްއެމް ނިއުސްއަށް ދެއްވި އިންޓަރވިއުއެއްގައި އެސްޓީއޯ އެގްރި ސެންޓަރުގެ އޮޕަރޭޝަންސް މެނޭޖަރ މުޙައްމަދު ޝަހާދު ވިދާޅުވީ، ދަނޑުވެރިކަމުގެ އިތުރު ބާވަތްތައް ގަތުމަށް ނިންމާފައިވާ ކަމަށެވެ.
" ލިބޭ ރިކުއެސްޓާއި ސަޕްލައިއަށް ބަލާފައި ގަސްތުކުރަނީ ލިސްޓު އިތުރު ކުރަން، ކުރިއަށް އޮތްތާގައި އިތުރުކުރުމަށްފަހު، އެ މައުލޫމާތު އެސްޓީއޯ ވެބްސައިޓުގައާއި އެހެންނިހެން ގޮތްތަކަށް ސަރކިއުލޭޓްކުރާނަން،" ޝަހާދު ވިދާޅުވިއެވެ.
ޝަހާދު ވިދާޅުވީ މި ބަދަލު އަންނަ މަސްތެރޭ އިޢުލާން ކުރާނެ ކަމަށެވެ. ދަނޑުވެރިންގެ ފަރާތުން އެގްރި ސެންޓަރަށް ބޮޑު އެއްބާރުލުމެއް ލިބެމުންދާއިރު، މިހާތަނަށް ގާތްގަނޑަކަށް 500 އެއްހާ ދަނޑުވެރިންވަނީ އެސެންޓަރުގައި ރަޖިސްޓްރީކޮށްފައެވެ.
ޝަހާދު ވިދާޅުވީ އެގްރި ސެންޓަރާއި ގުޅިގެން ތަކެތި ވިއްކުމަށް ބޭނުންވާ ދަނޑުވެރިންނަށް އަދިވެސް އެ ފުރުސަތު ހުޅުވާލެވިފައިވާ ކަމަށެވެ.
" މިހާރު ރަޖިސްޓްރީކޮށްފައިވާ ފަރާތްތަކަކީ އެކްޓިވްކޮށް ދަނޑުވެރިކަން ކުރަމުންދާ ފަރާތްތައް، ރާއްޖޭގެ އެކި ހިސާބުތަކުން ދަނޑުވެރިން ރަޖިސްޓްރީކޮށްފައިވޭ، ބައެއް އަތޮޅުތަކުން ގިނަ، އއ.ލ.ގދ އަތޮޅުން ގިނަ އަދަދެއްގެ ދަނޑުވެރިން ރަޖިސްޓްރީކޮށްފައިވަނީ،" ޝަހާދު ވިދާޅުވިއެވެ.
އެގްރި ސެންޓަރުން ދަނޑުވެރިންގެ އަތުން ގަންނަ ބާވަތްތައް ދަނީ ހޯލްސޭލްކޮށް ވިޔަފާރިތަކަށް ވިއްކަމުންނެވެ. މިއާއެކު ދަނޑުވެރިންނަށް ދެމެހެއްޓެނިވި ގޮތެއްގައި ދަނޑުވެރިކަންކޮށް، އެކަމުން ދަނޑުވެރިންނަށް ލިބެންޖެހޭ ނަފާ ފުރިހަމަ ގޮތުގައި ލިއްބައިދާނެ ކަމަށް އެގްރި ސެންޓަރއިން ދެކެއެވެ.
ދިވެހި ދަނޑުވެރިން ހައްދާ ތަކެތި ގަނެ، ދަނޑުވެރިންނަށް ހަމަ އަގު ހޯދައިދިނުމުގެ ބޭނުމުގައި އެސްޓީއޯއިން އެގްރި ސެންޓަރުގެ ނަމުގައި ސެންޓަރެއް ހުޅުވީ މިމަހުގެ 13 ވަނަ ދުވަހުއެވެ.