ކުޑަކުދިންނާ ގުޅުންހުރި އެކި ބާވަތުގެ މައްސަލަތައް ސޯޝަލް މީޑިއާއަށް ދޫކޮށްލުމަކީ ތަޙްޤީޤަށް އެޅޭ ހުރަހެއްކަމަށް ފުލުހުން ވިދާޅުވެއްޖެއެވެ.
ކުޑަކުދިންނާގުޅޭ މައްސަލަތައް ތަޙްޤީޤުކުރުމަށް ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަނުން ކުރާ މަސައްކަތްތަކާ ގުޅޭގޮތުން ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަދައްކަމުން ޗީފް އިންސްޕެކްޓަރ އޮފް ޕޮލިސް ރިފްޢާން އަޙްމަދު ވިދާޅުވީ، ކުޑަކުދިންނާ ގުޅުންހުރި އެކި މައްސަލަތައް ބައެއް ފަހަރު ވަރަށް ފަސޭހައިން ސޯޝަލް މީޑިއާގައި އާއްމުކޮށްލާކަން ފާހަގަކުރެވޭކަމަށެވެ.
ނަމަވެސް އެފަދަ މައްސަލަތައް ސޯޝަލް މީޑިއަށް އެގޮތަށް ދޫކޮށްލުމަކީ ފުލުހުންގެ ތަޙްޤީޤަށް ހުރަސްއެޅި، އެ މައްސަލައެއް ކުރިއަށްގެންދިއުމުގައި ގިނަ ގޮންޖެހުންތަކަކާ ކުރިމަތިވާކަމެއްކަމަށް ރިފްޢާން ވިދާޅުވިއެވެ. އަދި އެގޮތަށް އެފަދަ މަޢުލޫމާތުތައް ސޯޝަލް މީޑިއާގައި އާއްމުކުރުމުން، އެ މައްސަލައެއްގައި ޝާމިލުވާ ކުށްކުރި ފަރާތަކަށް، ހެކި ނައްތާލުމަށާއި، ހެއްކަށް ނުފޫޒު ފޯރުވުމުގެ ފުރުޞަތު ލިބިގެންދާކަމަށް ރިފްޢާން ވިދާޅުވިއެވެ.
"މިސާލަކަށް ސޯޝަލް މީޑިއާގައި މި ބުނަނީ ވިކްޓިމަށް މިކަން ދިމާވިއިރު އެ ގޭގައި އުޅުނު ކުއްޔަށް ނޫނީ އެހެންބަޔަކަށްވެސް އެކަންތައް އެނގޭނެއޭ. އެހާ ހިސާބުން އެއްކަލަ ސަސްޕެކްޓް ހެއްކަށް ނުފޫޒު ފޯރުވުމަށް މަސައްކަތްކޮށްފާނެ. އޭރު އެގޭގައި އުޅުނު ފަރާތްތަކާ ވާހަކަދައްކައިގެން ޕްރެޝަރކޮށްގެން ތިމަންނައާ ދެކޮޅަށް ހެކިބަސް ނުދޭށޭ ނޫނިއްޔާ އެހެންގޮތެއް ބޭނުންކޮށްގެންވެސް. އޭރުން ވާނެގޮތަކީ އަޅުގަނޑުމެންނަށް ކުރިން އެނގިފައި އޮތް ހެއްކެއް މިހާރު ސޯޝަލް މީޑިއާ މެދުވެރިކޮށް ސަސްޕެކްޓަށް އެނގުނީމަ، ސަސްޕެކްޓަށް އެއްކަލަ ހެއްކަށް ނުފޫޒު ފޯރުވުމުގެ ބާރު އެއޮތީ" ރިފްޢާން ވިދާޅުވިއެވެ.
ރިފްޢާން ވިދާޅުވީ، ކުޑަކުދިންނާއި ގުޅުންހުރި މައްސަލަތަކުގައި އަނިޔާ ލިބޭ ކުއްޖާ ނުވަތަ އެ މައްސަލައިގައި ހިމެނޭ އިތުރު ވިކްޓިމެއްގެ ޒާތީ މަޢުލޫމާތުތައްވެސް ބައެއް ފަހަރު ސޯޝަލް މީޑިއާއަށް ވަރަށް ފަސޭހައިން އާއްމުކޮށްލާކަމަށެވެ. މިހެންމިކަން ކުރުމަކީ އެ މައްސަލައެއްގައި ހިމެނޭ ވިކްޓިމަށާއި އެކުއްޖާގެ އާއިލާއަށްވެސް އިތުރު އިޖުތިމާޢީ މައްސަލަތަކަކާ ކުރިމަތިލާންޖެހި، ނިޒާމާމެދު އޮންނަ އިތުބާރު ވަރަށް ބޮޑަށް ގެއްލިގެންދާކަމެއްކަމަށް ފުލުހުން ވިދާޅުވެއެވެ.
ރާއްޖެމިއަދު ޕްރޮގްރާމުގައި ވާހަކަދައްކަވަމުން އިންސްޕެކްޓަރ އޮފް ޕޮލިސް އަޙްމަދު ޞަފްވަތު ރައޫފް ވިދާޅުވީ، މާކުރިން ހިނގާފައިވާ ބައެއް ޙާދިސާތައްވެސް ސޯޝަލް މީޑިއާގައި ފަހަކަށް އައިސް ހިއްސާކުރާ މިންވަރު އިތުރުވެފައިވާކަމަށެވެ. މިގޮތަށް ހިއްސާކޮށްފައިވާ ކަންކަންވެސް ފުލުހުންގެ ސަމާލުކަމަށް އަންނަ ހިސާބުން، އެ މައްސަލައެއްގެ ތަޙްޤީޤު ފުރިހަމަކުރުމަށް ކުރަންޖެހޭ މަސައްކަތްތައް ފުލުހުން ކުރަމުންދާކަމަށް އޭނާ ވިދާޅުވިއެވެ. ނަމަވެސް އެފަދަ މައްސަލަތަކަކީ ދުވަސްވެފައިވާ މައްސަލައެއްކަމުން، އެންމެ އެކަށީގެންވާ ގޮތެއްގައި ތަޙްޤީޤު ކުރިއަށްގެންދަން އުނދަގޫވާކަން އޭނާ ފާހަގަކުރެއްވިއެވެ. އެހެންކަމުން އެފަދަކަމެއް ހިނގާ ހިސާބުން ވީހާވެސް އަވަހަކަށް އެ މައްސަލައެއް ފުލުހުންނަށް ރިޕޯޓްކުރުމަކީ މުހިއްމުކަމެއްކަމަށް ޞަފްވަތު ވިދާޅުވިއެވެ.
"ކުރިން ހިނގާފައިވާކަމެއްވެސް ރިޕޯޓްކުރުމުން ނުވަތަ ސޯޝަލް މީޑިއާ މެދުވެރިކޮށް ސަމާލުކަމަށް އަންނަ ހިސާބުން އެފަދަ މައްސަލަތައްވެސް އިސްކަމެއްދީގެން ބަލަން. އެކަމު ޤަބޫލުކުރަންވާނެ އެފަދަ މައްސަލަތަކަކީ ދުވަސްވެފައިވާ މައްސަލަތަކެއްކަމުން، ތަޙްޤީޤު އެންމެ ބޭނުންވާ ބާރުމިނުގައި ގެންދަން ދަތިވެދާނެ. ހެކި ހޯދުމުގައިވެސް ގޮންޖެހުންތަކެއް ދިމާވާނެ. އެހެންކަމުން އަޅުގަނޑުމެން އަބަދުވެސް ބާރުއަޅާކަމެއް އެއީ ކަމެއް ހިނގީމަ، ވީހާވެސް އަވަހަކަށް އަޅުގަނޑުމެންނަށް ރިޕޯޓްކުރުން. އޭރުން އެ މައްސަލައެއް ކުރިއަށްގެންދަން ފަސޭހަވާނެ" ޞަފްވަތު ވިދާޅުވިއެވެ.
އަލަށް އެކުލަވާލި ކުޑަކުދިންގެ ހައްޤުތައް ރައްކާތެރިކުރުމުގެ ޤާނޫނާއި، ކުޑަކުދިންގެ އަދުލުގެ ޤާނޫނާއެކު، ކުޑަކުދިންނާ ގުޅުންހުރި ތަފާތު މައްސަލަތައް ބަލާ ތަޙްޤީޤުކުރުމުގައި ފުލުހުންގެ ދައުރު ކުރިއަށްވުރެ ފުޅާވެ، އިތުރު ފަސޭހަތަކެއް ލިބިފައިވާކަމަށް ޞަފްވަތު ވިދާޅުވިއެވެ. އަލަށް އެކުލަވާލެވުނު މި ދެ ޤާނޫނަށް ފުލުހުންގެ ފްރަންޓް ލައިންގައި މަސައްކަތް ކުރާ އޮފިސަރުންނާއި، އިންވެސްޓިގޭޝަން އޮފިސަރުން އަޙުލުވެރިކުރުމަށް ރާއްޖޭގެ އެކި ކަންކޮޅުތަކުގައި ތަފާތު ޕްރޮގްރާމްތަކެއް ހިންގާ، 300 އެއްހާ ފުލުހުން ތަމްރީންކޮށްފައިވާކަމަށް ޞަފްވަތު ވިދާޅުވިއެވެ. ނަމަވެސް މިފަދަ މައްސަލަތަކަކީ ހަމައެކަނި ޤާނޫނަކުން ހައްލުކުރެވޭނެ މައްސަލަތަކެއްނޫންކަމަށާއި، ކުޑަކުދިންނަށް ބޭނުންވާ ރައްކާތެރިކަމާއި ޙިމާޔަތް ކަށަވަރުކޮށްދިނުމުގައި އެކުދިންގެ އާއިލާއާއި މުޖުތަމަޢުގެ ދައުރު ބޮޑުކަންވެސް އޭނާ ފާހަގަކުރެއްވިއެވެ.