ޗައިނާގެ ޒިންޖިއާންގް ޕްރޮވިންސްގައި އިންސާނީ ހައްގުތަކާއި ޚިލާފަށް ޗައިނާއިން އަމަލުކުރަމުންދާ މައްސަލައިގައި ޗައިނާގެ އިތުރު ކުންފުނިތަކާއި ދެކޮޅަށް ފިޔަވަޅު އެޅުމަށް އެމެރިކާއިން ނިންމައިފިއެވެ.
މިދިޔަމަހުވެސް އެމެރިކާއިން ވަނީ ޗައިނާގެ ކުންފުނިތަކެއް އެޤައުމުގެ އިކޮނޮމިކް ބްލެކް ލިސްޓުގައި ހިމަނާފައެވެ.
ޗައިނާގެ ކުންފުނިތަކާއި ދެކޮޅަށް އެމެރިކާއިން އަޅަމުންދާ ފިޔަވަޅުތަކަކީ ޗައިނާގެ މުސްލިމުންނާއި ދެކޮޅަށް އެޤައުމުން ހިންގާ ލާއިންސާނީ އަމަލުތަކާއި ދެކޮޅަށް، ޗައިނާ ޖަވާބުދާރީކުރުވުމަށް އެމެރިކާގެ ރައީސް ބައިޑަން ސަރުކާރުން ފަށާފައިވާ މަސައްކަތެކެވެ. ނަމަވެސް ޗައިނާއިން ދަނީ އެމެރިކާގެ ތުހުމަތުތައް ދޮގުކުރަމުންނެވެ. ޗައިނާއިން ބުނާގޮތުން އެޤައުމުން ކުރާ މަސައްކަތަކީ ހަރުކަށި ފިކުރާއި ދެކޮޅަށް ކުރާ މަސައްކަތެކެވެ.
ޚަބަރުތައް ބުނާގޮތުން އެމެރިކާއިން ދަނީ ޗައިނާގެ 14 ކުންފުންޏަކާއި ދެކޮޅަށް ފިޔަވަޅު އެޅުމަށް ތައްޔާރުވަމުންނެވެ. އެކުންފުނިތަކުގެ ތަފްސީލް ނޭނގުނަސް، އޭގެތެރޭގައި އެހެން ބައެއް ޤައުމުތަކުގެ ކުންފުނިތައްވެސް ހިމެނިދާނެކަމަށް ޚަބަރުތައް ބުނެއެވެ. މިކަމާއި ބެހޭގޮތުން ވައިޓް ހައުސްއިން އެއްވެސް އެއްޗެއް ބުނެފައިނުވާއިރު އެމެރިކާގެ ކޮމާރސް ޑިޕާރޓްމަންޓުންވެސް ވަކިއެއްޗެއް މިހާތަނަށް ބުނެފައެއް ނުވެއެވެ.
ޗައިނާގެ ކުންފުނިތަކާއި ދެކޮޅަށް އެމެރިކާއިން އަޅާ ފިޔަވަޅުގެ ސަބަބުން، ޗައިނާގެ ކުންުފުނިތަކަށް އެމެރިކާ ކުންފުނިތަކުން ތަކެތި ފޯރުކޮށްދިނުމަށް ހުރަސްތަކެެއް ކުރިމަތިވާނެއެވެ.
ބައިޑަންގެ ސަރުކާރުގެ އިތުރުން، މީގެކުރިން ޑޮނާލްޑް ޓްރަމްޕްގެ ވެރިކަމުގައިވެސް ޗައިނާގެ ގިނަ ކުންފުނިތަކަކާއި ދެކޮޅަށް އެމެރިކާއިން ވަނީ ފިޔަވަޅުތައް އަޅާފައެވެ. އަދި އެކަމުގެ ސަބަބުން ދެ ޤައުމުގެ ގުޅުން ވަނީ ވަރަށް ބޮޑަށް ގޯސްވެފައެވެ.