ދުނިޔޭގެ ބަޒާރުގައި ކާބޯތަކެތީގެ އަގު އުފުލެމުންދާތީ، ބަނޑުހައިހޫނުކަން ތަހަމަލްކުރަމުންދާ މީހުންގެ އަދަދު 40 އިންސައްތައަށް އިތުރުވެފައިވާކަމަށް ޔުނައިޓެޑް ނޭޝަންސް ވޯރލްޑް ފުޑް ޕްރޮގްރާމް (ޑަބްލިޔުއެފްޕީ) އިން ބުނެފިއެވެ.
ޑަބްލިޔުއެފްޕީން ބުނާގޮތުން ޤައުމުތަކުގައި ކާބޯތަކެތީގެ އަގު އުފުލެމުންދަނީ ހަމަނުޖެހުންތަކާއި، މޫސުމީ ބަދަލުތަކުގެ އިތުރުން، ކޯވިޑްގެ ބަލިމަޑުކަމާއި ގުޅިގެން ކުރިމަތިވާ މައްސަލަތަކުންކަމަށެވެ.
އދ.ގެ ކާނާއާބެހޭ ޖަމުޢިއްޔާ، ޑަބްލިޔުއެފްޕީން ބުނާގޮތުން ކާބޯތަކެތި ނުލިބުމުގެ ސަބަބުން ބަނޑުހައިހޫނުކަން ތަހައްމަލުކުރަމުންދާ މީހުންގެ އަދަދު 270 މިލިއަނަށް އެރުމަކީ އެކަށީގެންވާކަމެކެވެ.
އިޤްތިޞާދީ މާހިރުން ބުނާގޮތުން މޫސުމީ ބަދަލުތަކާއި ހަމަނުޖެހުންތަކުގެ ސަބަބުން ކާބޯތަކެތީގެ އަގު އުފުލިފައިވަނިކޮށް، ކޯވިޑާއެކު އަނެއްކާވެސް ކާބޯތަކެތީގެ އަގު އުފުލިގެން ގޮސްފައިވާކަމަށެވެ. އެގޮތުން ބައެއް ސަރަޙައްދުތަކުގައި ފުށް ކިލޯއެއްގެ އަގު 219 ޕަސަންޓަށް ބޮޑުވެފައިވާއިރު، އެހެން ބައެއް ސަޜަހައްދުތަކުގައި ކައްކާ ތެލުގެ އަގު 440 ޕަސަންޓް ބޮޑުވެފައިވާކަމަށް ޚަބަރުތައް ބުނެއެވެ.
ދުނިޔޭގެ ބާޒާރުގައި ޖޫންމަހު ކަބޯތަކެތީގެ އަގު ހުރީ 33.9 އިންސައްތައަށް އިތުރުވެފައެވެ. ނަމަވެސް މެއިމަހު މި ޢަދަދު ވަނީ ދަށްވެފައެވެ.
ދުނިޔޭގައި ބަނޑުހައި ހޫނުކަން ތަހައްމަލު ކުރަމުންދާ މީހުންގެ އަދަދު ދަށަށްދާތާ އެތައް އަހަރެއްފަހުން، 2016 ވަނަ އަހަރުން ފެށިގެން އެ އަދަދުތައް ދަނީ އުފުލެމުންނެވެ.
އދއިން ބުނާގޮތުން ދުނިޔޭގެ އާބާދީގެ 690 މިލިއަން މީހުން ނުވަތަ އާބާދީގެ 9 އިންސައްތަ މީހުން ކޮންމެރެއަކުވެސް ނިދަނީ ބަނޑުހައިހޫނުކަންމަތީގައެވެ. މިއާއެކު 139 މިލިއަން މީހުންނަށް މިއަހަރު އެހީވުމަށް ޑަބްލިޔުއެފްޕީން ވަނީ އަމާޒު ހިފާފައެވެ. މިއީ އެ ޖަމިއްޔާގެ ތާރީޚްގައިވެސް ހިންގާ މިފަދަ އެންމެބޮޑު އޮޕަރޭޝަނެވެ.
ސަލީމް
ދިވެހިން މި ދައްކާ ޒަކާތުގެ ފައިސާއިން މިފަދަ ފަގީރުންނަށް ނޫންތޯ އެހީވާންވީ...