ޗައިނާގެ ޝިންޖިއާންގް ޕްރޮވިންސްގައި އިންސާނީ ހައްގުތަކާއި ޚިލާފަށް އެޤައުމުން ޢަމަލުކުރަމުންދާކަމަށް ތުހުމަތުކުރާ މައްސަލައިގައި ޗައިނާގެ 23 ކުންފުންޏަކާ ދެކޮޅަށް އެމެރިކާއިން ފިޔަވަޅު އަޅަން ނިންމި ނިންމުމާއިމެދު ޗައިނާއިން އެމެރިކާއަށް ފާޑުކިޔައިފިއެވެ.
މިކަމާ ގުޅިގެން ޗައިނާގެ އީ-ކޮމާރސް ވުޒާރާއިން ނެރުނު ބަޔާނެއްގައި ވާގޮތުން މިލިސްޓަށް ޗައިނާގެ ކުންފުނިތައް އިތުރުކުރުމުން ދޭހަވަނީ ބައިނަލްއަޤުވާމީ އިޤްޠިޞާދީ އަދި ވިޔަފާރީގެ އުޞޫލުތަކުގެ އެއްވެސް ބާރެއްނެތްކަމެވެ. އަދި ޗައިނާގެ ކުންފުނިތަކަށް ޙައްޤު ހޯދައިދިނުމަށް ޗައިނާ ސަރުކާރުން މަސައްކަތްކުރާނެކަމަށްވެސް އެ ބަޔާނުގައިވެއެވެ.
އެމެރިކާގެ ޑިޕާރޓްމަންޓް އޮފް ކޮމާރސްއިން ބުނިގޮތުގައި ހުކުރު ދުވަހު އެ ޑިޕާރޓްމަންޓުން ވަނީ ޗައިނާގެ 14 ކުންފުންޏަކާއި އިތުރު އެހެން ބައެއް ތަންތަންވެސް އެމެރިކާގެ ބްލެކް ލިސްޓަށް އިތުރުކޮށްފައެވެ. މީގެއިތުރުން ޗައިނާގެ އަސްކަރިއްޔާއަށް ސީދާގޮތެއްގައި އެހީވެދޭ 5 ކުންފުންޏެއްވެސް އެމެރިކާއިންވަނީ މި ލިސްޓަށް އިތުރު ކޮށްފައެވެ. އަދި އެމެރިކާއިން މިހާރުވެސް މުދާ އެތެރެކުރުން މަނާކޮށްފައި ހުރި ކުންފުނިތަކަކަށް މުދާ އެތެރެކޮށްދޭ 4 ކުންފުންޏެއްވެސް މި ލިސްޓުގައި ހިމެނެއެވެ.
އެމެރިކާގެ ކުރީގެ ރައީސް ޑޮނާލްޑް ޓްރަމްޕްގެ ރިޔާސަތުގައިވެސް އެމެރިކާއިން ވަނީ ޗައިނާގެ 20 ޕަބްލިކް ސެކިއުރިޓީ ބިއުރޯއާއި ވީޑިއޯ ސާރވެލަންސް ކުންފުނި ހައިކް ވިޝަން ހިމެނޭހެން އިތުރު 8 ކުންފުންޏަކަށް ފިޔަވަޅުއަޅާފައެވެ.
ޗައިނާގެ ކުންފުނިތަކާ ދެކޮޅަށް އެމެރިކާއިން އަޅަމުންދާ ފިޔަވަޅުތަކަކީ ޗައިނާގެ މުސްލިމުންނާއި ދެކޮޅަށް އެޤައުމުން ހިންގާ ލާއިންސާނީ އަމަލުތަކާއި ދެކޮޅަށް، ޗައިނާ ޖަވާބުދާރީކުރުވުމަށް އެމެރިކާގެ ރައީސް ބައިޑަން ސަރުކާރުން ފަށާފައިވާ މަސައްކަތެއްކަމަށް އެޤައުމުން ބުނެއެވެ. ނަމަވެސް ޗައިނާއިން ދަނީ އެމެރިކާގެ ތުހުމަތުތައް ދޮގުކުރަމުންނެވެ. ޗައިނާއިން ބުނާގޮތުން އެޤައުމުން ކުރާ މަސައްކަތަކީ ހަރުކަށި ފިކުރާ ދެކޮޅަށް ކުރާ މަސައްކަތެކެވެ.